Read Hindi, Fiji Methiu 1 Bible Online

Methiu 1 - Hindi, Fiji bible

Methiu 1

¹Yeeshu Maseeh aur Raaja Ḍeiviḍ, Abraham ke palwaar rahin. Aur i ulog ke generaishan ke lisṭ hei.

²Abraham se leke Raaja Ḍeiviḍ tak, ulog ke baap daada i rahin: Abraham, Aayzak, Jeims, Juḍas aur uske bhaiya, (Juḍas ke laṛka Perez aur Zerah. Zerah ke amma Tamaar rahi.) Aur Perez se Hisron peida bhais. Aur Hisron se Eraam peida bhais. Aur Eraam se Ameenaadaab aur Ameenaadaab se Nahshon, aur Nahshon se Salmon, aur Salmon aur Raahaab se Boaz, aur Boaz aur Ruth se Obed, aur Obed se Jesse aur Jesse se Ḍeiviḍ Raaja peida bhais.

⁶Ḍeiviḍ se leke Baibilon meñ des se nikaare tak Yeeshu ke baap-daada i rahin, Ḍeiviḍ aur Uriyah ke patni se Soloman peida bhais. Aur Soloman ke laṛka Rahbaam ke laṛka Abiyaah aur Abiyaah ke laṛka Aasa aur Aasa ke laṛka Yahoshaafaat aur Yahoshaafaat se Jeraam aur Jeraam ke beṭa Uzziah, aur Uzziah se Jotaam ke laṛka Aahaaz se Hizkiyaah peida bhais. Aur Hizkiyaah se Manashe aur Manashe ke laṛka Aamon ke laṛka Josiah peida bhais. Fir Josiah se Jakunyaah aur uske bhaiya peida bhais.

¹²Ulog ke des se nikaare ke ṭaaim se, Yeeshu ke peida hoy ke ṭaaim tak, uske baap daada i rahin: Jakunyaah, Shaaltiyal, Zarubbabel, Abihud, Ilyaakim, Azar, Zadok aur Akhim; Ilihud, Ilaayja, Maaltaan, Jeims aur Josaf jon Meri ke admi raha, aur jisse Yeeshu peida bhais.

¹⁷Abraham se Ḍeiviḍ tak chauda (14) generaishan raha. Aur Ḍeiviḍ se Baibilon meñ bandi bane tak chauda generaishan aur rahin. Aur Maseeh ke peida hoy tak chauda generaishan aur rahin.

¹⁸Ab Yeeshu ke peidaais i rakam bhais. Uske amma Meri ke mañgni Josaf, jon ki Raaja Ḍeiviḍ ke palwaar ke raha, uske sañghe bhais raha. Lekin eise bhais ki uske sañghe rahe se pahile hee Meri Pawitr Aatma ke taagat se amma bane waali rahi.

¹⁹Uske admi Josaf chuppe se uske chhoṛe maañgat raha, kaahe ke u ek dharmi admi raha aur Meri ke badnaam nai kare maañgat raha.

²⁰Josaf i sab baat sochat raha ki uske sapna meñ Prabhu ke duut i bolte dekhaay dees, “Josaf, Ḍeiviḍ ke laṛka! Meri ke jon bachcha hoi, u Pawitr Aatma se hei, uske aapan ghare laay se nai ḍaraao.

²¹Meri ek laṛka peida kari aur tum uske naam Yeeshu rakhna, kaahe ke u aapan log ke paap se bachaai.”

²²I sab i khaatir hoi ki nabi ke muh se Prabhu jon cheej bolis raha, u puura hoy jaai.

²³“Dekho ek kuaari, maañ bane waali hoi aur ek laṛka peida kari. Aur uske naam Immanuel rakkha jaai, jiske matlab hei Parmeshwar, hamaar sañghe hei.”

²⁴Josaf neeñd se uṭh ke Prabhu ke duut ke mutaabik, Meri se saadi karke aapan ghare laais.

²⁵Josaf, Meri ke lage tab tak nai gais jab tak laṛka peida nai bhais. Aur Josaf uske naam Yeeshu rakkhis.