Read Hindi, Fiji Methiu 10 Bible Online

Methiu 10 - Hindi, Fiji bible

Methiu 10

¹Yeeshu aapan baarah chela log ke bolaay ke, ulog ke saitaan ke nikaare ke adhikaar dees aur sab rakam ke bimaari aur dukh ṭheek kare ke taagat dees.

²U baarah chela log ke naam hei, Saayman jon Peeṭa ke naam se jaana jaat raha, aur uske bhaiya Enḍru, Zabdi ke laṛka Jeims aur uske bhaiya Yuhanna.

³Filip aur Bartimaais, Thomas aur ṭeks lewaala Methiu, Halfai ke laṛka Jeims aur Taddai.

⁴Saayman Kanaani aur Juḍas Iskariyoti jon Yeeshu ke pakaṛwaais raha.

⁵U baarah chela log ke Yeeshu i bol ke bhejis, “Koi dusra jaat aur Saamri log ke koi ṭaaun meñ nai jaana.

⁶Lekin Israayel ke gharaana ke heraan bheṛa log ke lage jaana.

⁷Aur tum chalte chalte parchaar karna ki swarag ke raaj nagichche hei.

⁸Bimaar log ke achchha karna, mara log ke jiaana, koṛhi log ke achchha karna. Saitaan ke nikaarna. Tum i sab bina daam ke paaya hei, to muft meñ dena.

⁹Aapan jeb meñ naa to sona, chaañdi aur naa to taamba (copper) rakhna.

¹⁰Rasta ke waaste naa to jholi lena, naa kurta, naa juuta, aur naa to laaṭhi lena. Kaahe ke majduur ke uske khaana mile ke chaahi.

¹¹Jab koi gaaoñ ya ṭaaun meñ jaao to pata lagaao ki huañ kon achchha admi hei, jiske ghare tum rahe sako hei, aur jab tak huañ se nai nikro, wahi ghar meñ raho.

¹²Aur jab tum koi bhi ghar meñ jaao to ulog ke aasheesh deo.

¹³Agar u ghar ke log tumhaar aasheesh aur saanti lewe hei to ulog ke bhala hoi. Lekin agar ulog tumhaar welkam nai kare hei to tumhaar aasheesh aur saanti tumhaar lage hee rahi.

¹⁴Aur jon koi tumhaar baat nai suni, aur tumme nai apnaai, to aapan goṛ ke garda jhaaṛ ke u gaaoñ aur ṭaaun se nikar jaana.

¹⁵Ham tumme sachche bataata hei, ki nyaay ke roj u ṭaaun ke dasa Sadom aur Gamora des se kahiñ jaada dukh bhara hoi.

¹⁶Ham tumme bheṛa ke rakam bheṛiya ke beech meñ bhejta hei, yahi khaatir saañp ke rakam husiaar aur kabuttar ke rakam bhola bana rahna.

¹⁷Admi log se husiaar rahna, kaahe ke ulog tumme chaabuk maari.

¹⁸Tum log, hamaar khaatir Raaja aur agua log ke saamne le jaawa jaayga, ki jisse ulog ke aur baaki jaat ke susamaachaar sunaawa jaay sake.

¹⁹Jab ulog tumme pakaṛwaai to wari nai karna ki tum kon cheej aur keise bolega. Wahi lage u sab tumme bataay dewa jaai.

²⁰Kaahe ke bole waala tum nai rahega, lekin tumhaar Pita ke aatma tum meñ se boli.

²¹Ek bhaai dusra bhaai ke maar dei. Aur laṛkan aapan maañ baap ke agaiñsṭ baat kari aur ulog ke marwaay dei.

²²Hamaar naam ke khaatir, sab log tum se dusmani lei. Lekin jon aakhri tak dheeraj rakkhi, wahi ke mukti mili.

²³Jab ulog tumme ek ṭaaun meñ sataai, to tum jaldi se dusra ṭaaun meñ chala jaana. Ham tumme sachche bataata hei ki tum Israayel ke sab ṭaaun meñ aapan kaam khalaas nai kare paayga ki Manush ke laṛka aay jaai.

²⁴Ek chela aapan guru se baṛa nai hei aur naa to ek naukar aapan maalik se.

²⁵I kaafi hei ki ek chela aapan guru ke rakam rahe, aur ek naukar aapan maalik ke baraabar rahe. Jab u ghar ke maalik ke, saitaan bolis, to ghar ke baaki log ke kaa boli?

²⁶Koi se nai ḍaro! Jon bhi cheej lukaan hei, aage aay jaai, sab seekraṭ saamne aay jaai.

²⁷Jon bhi cheej tum se ham añdhiyaar meñ bolta hei, uske ujera meñ bataana. Aur jon cheej ham akele meñ tumme bataata hei, uske ruuf pe se parchaar karo.

²⁸Admi log se nai ḍaro. Ulog tumme maar dei, lekin ulog tumhaar aatma ke choṭ nai pahuñchaay sake hei. Parmeshwar se ḍaro jon ki deñhi aur aatma duuno ke narak meñ naas kare sake hei.

²⁹Kaa ek sikka meñ dui chiṛia nai bike hei? To bhi tumhaar Pita jaane hei kab u jameen pe gire hei.

³⁰Aur tumhaar muuṛ ke ek ek baar bhi gina gais hei.

³¹Yahi khaatir tum ḍaro nai, tum chiṛia se jaada mahañga hei.

³²Agar tum sab ke bataayga ki tum hamaar hei, to ham swarag meñ hamaar Pita ke saamne uske apnaayga.

³³Lekin jon koi hamme nai apnaai, ham aapan swarag meñ Pita ke saamne uske nai apnaayga.

³⁴I nai sochna ki ham dunia meñ saanti laaya hei! Ham hiañ museebat laaya hei, saanti nai.

³⁵Ham to laṛka ke bappa se alag kare aur laṛki ke uske amma se aur patoh ke uske saas se alag kare aaya hei.

³⁶Tumhaar sab se baṛa dusman, tumhaar ghar ke log hei.

³⁷Agar tum aapan maiya, bappa ya laṛka aur laṛki ke ham se jaada pyaar karta hei, tab tum hamaar chela bane laayk nai hei.

³⁸Aur jon aapan kros leke hamaar pichchhe nai chale hei, u hamaar chela bane laayk nai hei.

³⁹Jon aapan laaif bachaay hei, u uske khoi. Lekin jon aapan laaif hamaar waaste khoi, u uske paay lei.

⁴⁰Jon koi tumme welkam kare hei, u hamme bhi welkam kare hei, aur jon hamme welkam kare hei, uske bhi welkam kare hei, jon hamme bhejis hei.

⁴¹Jon koi ek sewak ke welkam kare hei, i jaan ke ki u ek sewak hei, to uske wahi fal mili jon sewak ke mile ke chaahi. Jon koi ek achchha admi ke welkam kare hei, kaahe ke u achchha admi hei, to uske weisane fal mili jon ek achchha admi ke mile hei.

⁴²Aur jon koi ek chhoṭa admi jaan ke ek pyaala ṭhanḍa paani piaay hei, ham tum se sachche bolta hei, ki uske jaruur uske fal mili.