Read Hindi, Fiji Methiu 11 Bible Online

Methiu 11 - Hindi, Fiji bible

Methiu 11

¹Jab Yeeshu aapan baarah chela log ke hukum de dees, tab u huañ se chala gais, ki jisse u ṭaaun meñ parchaar kare sake.

²Jab Yuhanna jel meñ raha to u Maseeh ke kaam ke baare meñ sunis tab aapan chela log ke uske lage bhejis ki jaay ke puuchhe.

³“Kaa tum wahi hei jon aay waala hei ki ham dusra ke rasta dekhi?”

⁴Yeeshu jawaab dees, “Jaay ke Yuhanna se wahi bataao jon tum dekha aur suna hei.

⁵Añdha log ab dekhe sake hei, langṛa log chale lagin hei, koṛhi log changa hoy hei, bahra log sune lagin hei, murda jinda hoy hei, aur gareeb log ke susamaachaar sunaawa jaay hei.

⁶Parmeshwar u sab ke aasheesh dei jon hamaar kaam ke apnaay hei, aur hamme maane hei”

⁷Jab Yuhanna ke chela log jaay lagin tab Yeeshu Yuhanna ke baare meñ sab log se bataay lagis, “Tum sab ḍezaṭ meñ kaa dekhe gay raha? Kaa hawa meñ hilte uchcha graas ke?

⁸Kon rakam ke admi ke tum dekhe gay raha? Kaa u sundar kapṛa pahine raha? Jon sundar kapṛa pahine hei, u raaja ke mahal meñ rahe hei.

⁹To fir tum log kaa dekhe gay raha? Kaa koi nabi ke dekhe gay raha? Haañ sachche baat hei, u to nabi se bhi bahut baṛa hei.

¹⁰I wahi hei jiske baare meñ Baaibal meñ likhaan hei, “Ham aapan sewak ke tumhaar aage bhejta hei aur u tumhaar aage aage tumhaar rasta seedha kari.

¹¹Ham tumme sachche bataata hei ki jon koi bhi i dharti pe peida bhais hei, u Yuhanna baptisma dewaala se baṛa nai hei. Lekin jon swarag ke raaj meñ sab se chhoṭa hei, wahi Yuhanna se baṛa hei.

¹²Yuhanna baptisma dewaala ke ṭaaim se abhi tak, log taagat se swarag ke raaj apnaate chale aain hei.

¹³Yuhanna ke ṭaaim tak sab nabi aur Maozas ke kaanuun, raaj ke baare meñ bataate aain hei ki uske kaa hoi.

¹⁴Aur agar tum biswaas karta hei to samajh leo ki Yuhanna hee Ilaayja hei jon aay waala raha.

¹⁵Agar tumhaar lage kaan hei, to suno!

¹⁶Tum sab u laṛkan ke rakam hei, jon bajaar meñ beiṭh ke ek dusra ke uppar chillaay hei,

¹⁷“Ham tumhaar khaatir baañsuri bajaaya lekin tum nai naacha! Ham margi ke gaana gaaya lekin tum shok bhi nai manaaya!”

¹⁸Jab Yuhanna aais to u kuchh nai khaais pees, tab sab bolin, “Usman saitaan hei.”

¹⁹Manush ke laṛka khaate peete aais, tab sab koi bolin, “I admi peṭṭu aur piakkaṛ hei, aur i ṭeks baṭorewaala ke dost hei. Lekin Parmeshwar ke buddhi wahi hei jon uske fal se jaana jaay hei.”

²⁰Jon jon ṭaaun meñ Yeeshu chakit ke kaam karis raha, huañ ke log Parmeshwar ke bagal nai ghuumin. Yeeshu i baat dekh ke bahut dukhi bhais.

²¹E Khuraazin aur Beitseida ke log, jon chakit ke kaam tumhaar sañghe kara gais hei agar u Ṭaaya (Tyre) aur Seida meñ kara jaata, tab ulog kab ke Parmeshwar ke bagal ghuum jaate. Ulog basta ke kapṛa pahin ke aur raakhi lagaay ke apne aap ke badal lete.

²²Ham tum se bolta hei ki nyaay ke roj Parmeshwar Ṭaaya (Tyre) aur Seida pe tum se jaada daya kari.

²³E Kafarnahuum ke log, kaa tum log swarag meñ aadar paayga? Tum to narak meñ nichche feka jaayga! Jon chakit waala kaam tumhaar waaste kara gais, agar Ṭaaya (Tyre) aur Seida meñ kara jaata to u ṭaaun aaj bhi rahta.

²⁴Lekin ham tum se sachche sachche bolta hei ki nyaay ke roj Parmeshwar tum log se jaada Sadom pe daya kari.

²⁵Wahi lage Yeeshu bolis, “Hamaar Pita, swarag aur dharti ke Prabhu, ham tumme dhanbaad deta hei ki tum i sab baat samajhdaar log se lukaaya aur jon nai samjhe hei, ulog ke dekhaaya.

²⁶Haañ Pita ji kaahe ke yahi tumme khusi karis hei.

²⁷Hamaar Pita hamme sab kuchh dees hei, aur khali wahi Putr ke jaane hei. Putr ke chhoṛ ke aur koi bhi Pita ke nai jaane hei. Lekin Putr sab ke Pita ke baare meñ bataay maañge hei, ki jisse sab log uske jaan le.

²⁸Agar tum bojha ḍhote ḍhote thak gaya hei to hamaar lage aao, ham tumme araam dega.

²⁹Hamaar juaaṭha (yoke) aapan uppar uṭhaao aur ham se seekho, kaahe ke ham naram dil ke aur deen hei, aur tumme araam mili.

³⁰I juaaṭha ḍhoy meñ sahaj hei, aur bojha bhi halluk hei.