Read Hindi, Fiji Methiu 12 Bible Online

Methiu 12 - Hindi, Fiji bible

Methiu 12

¹Thoṛa roj ke baad Yeeshu sabat ke roj khet meñ se hoy ke jaat raha. Uske chela log ke bhuuk lagis aur ulog baali tuuṛ tuuṛ ke khaay lagin.

²Farisi log i dekh ke usse bolin, “Dekho tumhaar chela log u kaam kare hei jon sabat ke roj nai kare ke chaahi!”

³Yeeshu jawaab dees, “Kaa tum i nai paṛha ki Ḍeiviḍ aur uske saathi log jab bhukka rahin to ulog kaa karin?

⁴U Parmeshwar ke ghar meñ jaay ke aur jon bheñṭ meñ roṭi chaṛhaawa gais raha, u apne bhi khaais aur aapan saathi log ke bhi dees, u khaana paadri log ke chhoṛ ke koi aur nai khaay sakat raha.

⁵Kaa tum Maozas ke kaanuun meñ nai paṛha ki sabat ke roj paadri log chech meñ sabat ke kaanuun tuuṛe hei aur fir bhi ulog pe dos nai lage hei?

⁶Lekin ham tum se bataata hei ki hiañ kuchh hei jon chech se bhi baṛa hei.

⁷Baaibal bole hei, “Ham daya mañgta hei, jaanwar ke khuun nai.” Agar tum janta hei ki iske matlab kaa hei, tab tum bhola bhaala ke dosi nai banaata.

⁸To, Manush ke laṛka, sabat ke roj ke bhi Prabhu hei.

⁹Yeeshu huañ se chala gais aur chech meñ aais.

¹⁰Huañ pe ek admi raha jon ke haath lunj raha. Kuchh Farisi Yeeshu pe dos lagaay ke waaste queschan puuchhin, “Kaa i raaiṭ hei ki sabat ke roj bimaari achchha kare ke chaahi?”

¹¹Yeeshu jawaab dees, “Tum meñ se kon hei jon ke lage ekke bheṛa hei aur u sabat ke roj gaḍḍha meñ gir jaay, aur u uske usman se nai nikaari?

¹²Ek admi ke daam to ek bheṛa se bahut jaada hei. Yahi khaatir sabat ke roj kaanuun ke mutaabik bhalaai kare ke ṭheek hei.”

¹³Tab Yeeshu u admi se bolis, “Haath aage karo.” U admi haath aage karis aur uske haath dusra haath ke rakam achchha hoy gais.

¹⁴Tab Farisi log bahire jaay ke Yeeshu ke maare ke waaste plen banaay lagin.

¹⁵Jab Yeeshu jaanis ki huañ kaa plen bane hei, to huañ se chala gais aur uske pichchhe ek baṛa bheeṛ hoy lees. Aur usman se jon jon bimaar rahin u sab ke Yeeshu ṭheek karis.

¹⁶Lekin ulog ke hukum dees ki uske baare meñ koi se nai bataay.

¹⁷Yeeshu i kaaran bolis raha ki jon vachan Aayzaaya nabi bolis raha, u puura hoi.

¹⁸“Dekho i hamaar chuna naukar hei! Ham isse prem karta hei, aur i hamme khusi rakkhe hei. Ham isman aapan Aatma bharega, aur i sab jaati ke log ke nyaay dewaai.

¹⁹U naa to jhagṛa kari, naa chillaai aur bajaar meñ uske awaaj bhi koi nai suni.

²⁰U ṭehṛa karal narkul ke nai tuuṛi aur bute waala batti ke nai butaai, lekin i dhyaan meñ rakkhi ki nyaay hoy ke chaahi.

²¹Aur sab jaati ke log uske naam pe aasra lagaay rakkhi.”

²²Tab kuchh log ek añdha aur guuñga admi ke jisman saitaan raha, Yeeshu ke lage laain. Yeeshu uske achchha kar dees, aur u admi dekhe aur bole laga.

²³Bheeṛ etna chakit hoy gain ki bole lagin, “Kaa i Ḍeiviḍ ke laṛka hei?”

²⁴Lekin Farisi log i sun ke bolin, “I Baalazbul jon saitaan ke sardaar hei, uske sakti se saitaan nikaare hei!”

²⁵Yeeshu ulog ke dil ke baat jaanat raha, aur ulog se bolis, “Jon raaj meñ jhagṛa jhanjhaṭ hoy hei, u raaj barbaad hoy jaay hei aur yahi rakam jon ṭaaun aur palwaar meñ jhagṛa jhanjhaṭ hoy hei u bhi barbaad hoy jaay hei.”

²⁶Aur agar saitaan hee saitaan ke nikaari, to u apne meñ dusman hoy jaai, to fir uske raaj keise chali?

²⁷Agar ham Baalazbul ke sakti se saitaan nikaarta hei, to tumhaar log kiske madat se saitaan nikaare hei? Tumhaar aapan log hee nyaay kari.

²⁸Lekin jab ham Pawitr Aatma ke sakti se saitaan nikaarta hei, to i dekhaay hei ki Parmeshwar ke raaj tumhaar lage aay gais hei.

²⁹Keise koi ek tagṛa admi ke ghare jaay ke uske cheej luuṭe sake hei, jab tak u pahile tagṛa admi ke baañdh nai de? Aur tab u uske ghar luuṭi.

³⁰Jon hamaar sañghe nai hei u hamaar agaiñsṭ hei, aur jon hamaar sañghe baṭore meñ madat nai kare hei, u chhitraay de hei.

³¹Ham tum se bataata hei ki tum koi rakam ke paap karega, u maaf kar dewa jaai, lekin koi Pawitr Aatma ke buraai kari, uske maafi nai dewa jaai.

³²Jon koi Manush ke laṛka ke agaiñsṭ baat kari, uske to maafi mil jaai, lekin jon Pawitr Aatma ke agaiñsṭ kuchh boli, uske i janam meñ aur aay waala janam meñ maafi nai mili.

³³Ek achchha peṛ achchha fal de hei aur kharaab peṛ kharaab fal de hei. Tum u peṛ ke baare meñ uske fal dekh ke bataay sakta hei.

³⁴E saañp ke jhunḍ! Tum kharaab hoy ke keise achchha baat kare sakta hei? Tum wahi bolega jon tumhaar dil meñ bhara hei.

³⁵Achchha log aapan dil se achchha achchha baat nikaare hei, aur bura log khali kharaab kharaab baat dil se nikaare hei.

³⁶Ham tum se bataata hei ki nyaay ke roj, hisaab de ke paṛi ki sab koi kon kon kharaab cheej bolin raha.

³⁷Wahi roj tum aapan baat ke kaaran jaan lega ki tumhaar kasuur hei ki nai.

³⁸I baat pe Maozas ke kaanuun ke guru aur Farisi log bolin, “E guru, ham log mañgta hei ki tum hamme swarag ke koi saain dekhaao.”

³⁹Lekin Yeeshu jawaab dees, “Tum saain mañgta hei kaahe ke tum log kharaab hei, aur biswaas nai karta hei! Lekin tumme khali Jona nabi ke saain mili.

⁴⁰Jona nabi teen raat aur teen din ek baṛa machhri ke peṭ meñ raha, wahi rakam se Manush ke laṛka bhi teen raat aur teen din maṭṭi meñ rahi.

⁴¹Nyaay ke roj, Ninweh ke log uṭh ke tum log pe iljaam lagaai, kaahe ke ulog Jona ke parchaar sun ke uske biswaas karin, lekin hiañ to kuchh hei jon Jona se bhi baṛa hei

⁴²Saauth ke raani bhi nyaay ke roj tumhaar sañghe khaṛi hoy ke tumpe iljaam lagaai, kaahe ke u Soloman ke gyaan ke baat sune ke khaatir bahut duur se aais hei, lekin hiañ to jon hei u Soloman se bhi baṛa hei.

⁴³Jab kharaab aatma admi meñ se nikar jaay hei, to suunsaan jagha se gujre hei aur aapan waaste araam kare ke jagha khoje hei, lekin jab uske jagha nai mile hei.

⁴⁴Tab u bole hei, “Ham wahi ghar meñ lauṭ jaayga jahañ se nikra hei.” Aur jab huañ pahuñche hei to dekhe hei ki jagha khali aur safa hei.

⁴⁵Tab u jaay ke aur bhi jaada kharaab se kharaab saat aatma khoj ke laay hei aur wahi ghar meñ rahe lage hei. Ab to u admi ke dasa pahile se bhi aur kharaab hoy jaay hei. Yahi dasa i ṭaaim tum kharaab log ke sañghe bhi hoi.”

⁴⁶Jab Yeeshu bheeṛ se baat karat raha, tab uske amma aur bhaiya log, bahire khaṛa rahin, kaahe ke ulog us se baat kare maañgat rahin.

⁴⁷Koi aay ke usse bolis, “Tumhaar amma aur bhaiya log bahire khaṛa hei aur tum se baat kare maañge hei.”

⁴⁸I sun ke Yeeshu jawaab dees, “Hamaar amma kon hei?

⁴⁹Aur hamaar bhaiya kon hei?” Aur tab u aapan chela log ke dekhaay ke bolis, “I sab hamaar amma aur bhaiya log hei.

⁵⁰Jon koi hamaar swarag ke Pita ke baat maane hei, wahi hamaar bhaiya, bahini aur amma hei.”