Read Hindi, Fiji Methiu 13 Bible Online

Methiu 13 - Hindi, Fiji bible

Methiu 13

¹Wahi roj Yeeshu ghar se nikar ke laik ke kinaare jaay ke beiṭh ke sikhaay lagis.

²Aur uske agal bagal etna bheeṛ hoy gais ki u bauṭ meñ jaay ke beiṭh gais aur bheeṛ kinaare khaṛa rahis.

³Tab Yeeshu ulog ke bahut kahaani bataay ke bolis, “Ek kisaan khet meñ bia bowe nikris.

⁴Jab u bia bowat raha, tab kuchh bia rasta ke kinaare gir gais, aur chiṛia aay ke uske khaay lees.

⁵Kuchh bia patthar waala jameen pe gira, jahañ uske bahut maṭṭi nai milis. Maṭṭi gahira nai raha aur u jaldi se jam gais.

⁶Lekin jab ghaam nikris to jaldi se sukhaay gais, kaahe ke uske jaṛ maṭṭi meñ nai pakṛis raha, u sab mar gais.

⁷Kuchh bia huañ giris, jahañ kaaṭa waala jañgal baṛh ke uske dabaay dees.

⁸Lekin kuchh bia achchha maṭṭi meñ giris, u sab faris, koi sao guna, koi saaṭh (60) guna, koi tees (30) guna.

⁹Agar tumhaar lage kaan hei to suno.”

¹⁰Chela log Yeeshu ke lage aay ke puuchhe lagin, “Kaahe tum sab log se kahaani bataay ke baat karta hei?”

¹¹U jawaab dees, “Ham swarag ke raaj ke bhed tum log ke dia, lekin aur log ke nai.

¹²Jon ke lage kuchh hei uske aur dewa jaai. Lekin jon ke lage kuchh nai hei, to jon bhi cheej ulog ke lage hei, u bhi le lewa jaai.

¹³Ham ulog ke kahaani kaahe bataata hei ki, ulog dekhe to hei lekin kuchh dekhe nai paay hei, aur sune to hei lekin, sune aur samajhe nai paay hei.

¹⁴Ulog ke baare meñ Aayzaaya nabi pahile se bataais raha. U sab puura bhais, “Ilog kaan se suni lekin samjhe nai paai. Aur aañkhi se dekhi lekin kuchh samjhi nai, ki kaa dekhe hei.

¹⁵Kaahe ke ilog ke man bahut kaṛa hei! Ilog ke kaan band hoy gais hei, aur aañkhi bhi band hoy gais hei. Ilog dekhe aur sune nai sake hei aur samjhe nai sake hei. Agar eise hota, to ilog hamaar bagal ghuum aate, aur ham ilog ke achchha kar deta.”

¹⁶Lekin Parmeshwar tumme aasheesh dees hei, kaahe ke tumhaar aañkhi dekhe hei aur tumhaar kaan sune hei!

¹⁷Bahut nabi log aur dharmi log dekhe maañgat rahin ki tum kaa dekhta hei aur sune maañgat rahin ki tum kaa sunta hei. Lekin ham tumme bataata hei ki ulog naa to dekhin aur naa to sunin.

¹⁸Ab suno ki u kisaan ke kahaani ke kaa matlab hei.

¹⁹Jon bia rasta pe gira raha, i ulog hei jon raaj ke baare meñ vachan sune hei, lekin samjhe nai hei, kaahe ke saitaan aay ke vachan ulog se chheen le jaay hei.

²⁰Aur jon patthar waala jameen pe gire hei, i ulog hei jon vachan ke sun ke jurte maan le hei.

²¹Lekin ulog ke jaṛ gahira nai hei, aur bahut roj nai rahe hei. Aur vachan ke kaaran jab dukh aur takleef aay hei, tab ilog haar maan le hei.

²²Jon bia kaaṭa ke jañgal meñ gire hei, i ulog hei jon vachan sune to hei, lekin dunia ke chinta, aur dhani bane ke dhokha, vachan ke dabaay de hei. Aur u fare nai hei.

²³Jon bia achchha jameen meñ boya gais, i ulog hei jon vachan ke sun ke samjhe hei aur fare hei, koi sao guna (100x), koi saaṭh guna (60x), aur koi tees (30x) guna.

²⁴Yeeshu ulog ke ek aur kahaani bataais, Swarag ke raaj u admi ke rakam hei jon aapan khet meñ achchha bia bois.

²⁵Lekin jab sab koi sowat rahin, tab uske dusman aay ke geñhu meñ jañgli bia boy dees.

²⁶Jab peṛ baṛa bhais aur usman baali nikre lagis, to jañgli peṛ bhi baṛhe lagis.

²⁷Is pe ghar ke naukar, maalik se bolin, “E maalik, kaa tum aapan khet meñ achchha bia nai boya raha? Fir jañgli peṛ isman kahañ se aay gais hei?”

²⁸Tab u ulog se bolis, “I koi dusman ke kaam hei.” Uske naukar puuchhin, “Kaa tum mañgta hei ki ham jaay ke jañgli peṛ ke ukhaaṛ dei?”

²⁹“Nai! kahiñ eise nai hoy jaai ki jab ham jañgli peṛ ukhaaṛi to u ṭaaim geñhu bhi ukhaṛ jaai.”

³⁰Kaaṭe tak duuno ke sañghe baṛhan deo. Jab kaaṭe ke ṭaaim aai, tab ham kaaṭe waala log se bolega ke pahile jañgli peṛ ke bojha banaay ke uske jaraay de. Aur geñhu ke hamaar godaam meñ laay ke rakkhe.”

³¹Yeeshu ulog ke ek aur kahaani bataais, Swarag ke raaj sarso ke daana ke rakam hei. Ek kisaan aapan khet meñ sarso ke daana bois.

³²U sab bia se chhoṭa raha lekin jab baṛa bhais tab sab peṛ se baṛa hoy gais, aur chiṛia log aay ke usman aapan ghosla banaain.

³³Yeeshu bolis, “Swarag ke raaj yeesṭ ke rakam hei jon ke ek aurat teen hissa aaṭa meñ milaay dees. Aur, sab aaṭa fuul jaay hei.

³⁴Yeeshu kahaani se i sab baat sab log se bataais. Aur bina kahaani ke u sab log ke kuchh nai bataat raha.

³⁵Ki jon vachan nabi bataais raha, u puura hoi “Ham kahaani bataay ke aapan sandes sunaayga. Ham u sab baat jon dunia ke suru se chhipa raha u sab ke saamne laayga.”

³⁶Tab u bheeṛ ke chhoṛ ke ghar meñ aais. Aur uske chela log uske lage aay ke bolin, “Khet meñ jañgli bia aur geñhu ke baare meñ hamme samjhaao.”

³⁷Yeeshu jawaab dees, Achchha bia ke bowe waala Manush ke laṛka hei.

³⁸Khet dunia hei, achchha bia raaj ke aapan log hei, aur jañgli bia kharaab log hei.

³⁹Aur jon koi uske bois hei, u saitaan hei. Haavesṭ, dunia ke ant hei, aur kaaṭe waala, ainjals hei.

⁴⁰Jeise jañgli bia baṭora aur jaraawa jaay hei, weisaiyeñ dunia ke ant hoi.

⁴¹Manush ke laṛka aapan ainjals ke bheji, aur uske raaj ke sab paapi log dusra ke bura chaahe waala log ke baṭori.

⁴²Aur tab u ulog ke aagi meñ feki aur huañ ulog roi aur daañt peesi.

⁴³Lekin Parmeshwar ke log aapan Pita ke raaj meñ suuraj ke rakam chamki. Agar tumhaar lage kaan hei to suno!

⁴⁴Swarag ke raaj u rakam hei jeise jab koi khet meñ lukaawal peisa paay hei aur fir wahiñ lukaay de hei. I rakam ke admi bahut khusi hoy hei aur jaay ke aapan sab kuchh bech ke u khet khareed le hei.

⁴⁵Swarag ke raaj u rakam hei jab ek dukaandaar mahañga moti ke khoje hei.

⁴⁶Jab uske u moti mil jaay hei, tab u jaay ke aapan sab kuchh bech de hei ki jisse u mahañga moti khareede saki.

⁴⁷Swarag ke raaj u rakam hei, jab ek baṛa jaal paani meñ giraawa jaay hei aur u sab rakam ke machhri pakaṛ le hei.

⁴⁸Aur jab jaal bhar jaay hei, tab uske kinaare kheech laawa jaay hei, aur machhua log usman se achchha achchha machhri ke bartan meñ rakkhe hei aur kharaab machhri ke feñk de hei.

⁴⁹Yahi rakam dunia ke ant hoi. Ainjals aay ke kharaab log ke aur achchha log ke alag kari.

⁵⁰Tab u bura log narak ke aagi meñ feka jahiyeñ aur huañ rowaai gawaai hoi aur daañt peesa jaai.

⁵¹Yeeshu aapan chela log se puuchhis ki kaa ulog sab baat samajh leen hei? Ulog bolin, “Haañ, ham log samajh lia hei.”

⁵²Yeeshu ulog se bolis, “Jon koi bhi i dharam ke buk paṛhe hei, aur swarag ke raaj ke chela ban jaay hei, u maalik ke rakam hei jon aapan godaam meñ se nawa aur puraana khajaana nikaare hei.

⁵³Jab Yeeshu i sab kahaani sunaay dees, tab huañ se u chala gais.

⁵⁴Aapan ṭaaun meñ aay ke sabha ghar meñ updes de laga aur sab log achambha kare lagin aur ek dusre se puuchhe lagin, “Iske eisan gyaan aur chamatkaar kare ke sakti kahañ se mila?

⁵⁵Kaa i kaapenṭa ke laṛka nai hei? Aur kaa Meri iske amma nai hei, aur Jeims, Josaf, Saayman aur Juḍas iske bhaiya log nai hei?

⁵⁶Kaa iske bahini log yahi ṭaaun meñ nai rahe hei? Fir i sab i keise kare sake hei?”

⁵⁷Yahi sab ke khaatir ulog Yeeshu se khusi nai rahin. Lekin Yeeshu bolis, “Ek nabi ke aadar aapan des aur palwaar ke chhoṛ ke sab jagha hoy hei.”

⁵⁸Aur kaahe ke ulog meñ biswaas nai raha, to Yeeshu huañ pe bahut chamatkaar waala kaam nai karis.