Read Hindi, Fiji Methiu 14 Bible Online

Methiu 14 - Hindi, Fiji bible

Methiu 14

¹U ṭaaim, Galeel ke raaja Heraḍ, Yeeshu ke baare meñ sunis.

²U aapan naukar log se bolis, “I Yuhanna baptisma de waala hei. U jinda hoy gais hei. Yahi kaaran uske lage i sakti hei ki u chamatkaar ke kaam kare sake hei.

³Heraḍ aapan bhaiya Filip ke aurat Heraḍiaas ke waaste Yuhanna ke pakaṛ ke baañdhis, aur jel meñ ḍaar dees.

⁴Aur Yuhanna usse bolis raha, “Tumhaar waaste i ṭheek nai hei ki tum Heraḍiaas ke aapan aurat banaao.”

⁵Heraḍ Yuhanna baptisma de waala ke maare maañgat raha lekin ḍarat raha kaahe ke Yahuudi log uske aapan nabi maanat rahin.

⁶Heraḍ ke janam din pe Heraḍiaas ke laṛki naach dekhaay ke Heraḍ ke khusi kar dees raha.

⁷Yahi khaatir u uske promis karis ki jon kuchh bhi u maañgi uske dei.

⁸Lekin laṛki ke amma, uske bataais ki eise bolo, “Yuhanna baptisma de waala ke muuṛ ek thariya meñ abhi yahiñ mañgwaay deo!”

⁹Raaja dukhi bhais ki u sab ke saamne laṛki se promis karis raha, aur u bolis, “I jon cheej maañge hei iske deo.”

¹⁰Aur u kuchh log ke jel meñ bhej ke Yuhanna ke muuṛ kaṭwaay dees.

¹¹Uske muuṛ thariya meñ laawa gais aur laṛki ke dewa gais, aur u laṛki aapan amma ke de dees.

¹²Yuhanna ke chela log uske boḍi le jaay ke gaaṛ deen, aur jaay ke Yeeshu se i baat bataain.

¹³Jab Yeeshu i khabar sunis to bauṭ pe chaṛh ke ek akele jagha chala gais. Jab sab log i sunin to aapan aapan ṭaaun se paidar chal ke uske pichchhe hoy leen.

¹⁴Jab Yeeshu bauṭ se utra, to u ek baṛa bheeṛ dekhis, aur ulog pe taras khaais, aur sab ke bimaari ṭheek kar dees.

¹⁵Wahi roj sanjha ke chela log Yeeshu ke lage aain aur bolin, “I to suunsaan jagha hei, aur deri hoy gais hei. Bheeṛ ke bhej deo ki ulog jaay ke gaaoñ meñ aapan waaste kuchh khaana khareed le.”

¹⁶Yeeshu ulog se bolis, “Ulog ke jaay ke jaruurat nai hei! Tumahi log i sab ke khaatir kuchh khaay ke waaste deo.”

¹⁷Ulog usse bolin, “Hiañ hamaar lage paañch roṭi aur dui machhri chhoṛ ke aur kuchh nai hei.”

¹⁸Yeeshu bolis, “Hamaar lage laao.”

¹⁹Tab Yeeshu ulog ke graas pe beiṭhaay ke bolis. Aur u paañch roṭi aur dui machhri lees aur swarag ke bagal dekh ke dhanbaad dees aur roṭi tuuṛ ke chela log ke baaṭe ke dees.

²⁰Sab koi peṭ bhar ke khaain. Aur bacha khaana se baarah baaskeṭ bharin.

²¹Khaay waala meñ aurat aur laṛkan bachchan ke chhoṛ ke, paañch hajaar admi log khaana khaain.

²²Tab Yeeshu wahi lage aapan chela log ke aapan bauṭ meñ beiṭhaais ki ulog laik paar kar le. Lekin u apne ruk ke bheeṛ ke ghare bhejis.

²³Jab bheeṛ chala gais, tab u preya kare ke waaste pahaaṛ pe chala gais. Aur sanjha hoy tak u huañ akelle raha.

²⁴Ab tak bauṭ, laik meñ bahut duur nikar gais raha. Bauṭ ḍagmagaat raha kaahe ke ulṭa hawa chalat raha.

²⁵Sabere hoy se pahile, Yeeshu laik pe chal ke aapan chela log ke lage aais.

²⁶Jab ulog uske dekhin, to sochin ki koi bhuut hei. Ulog ḍar gain aur chillaay lagin.

²⁷Yeeshu jurte bolis, “Ḍaro nai! Ham Yeeshu hei. Ghabraao nai.”

²⁸Tab Peeṭa bolis, “E Prabhu, agar sachche tum hei, to hamme hukum deo ki ham bhi tumhaar lage paani pe chal ke aai.”

²⁹“Aay jaao!” Yeeshu bolis. Tab Peeṭa bauṭ se utar ke paani pe chal ke Yeeshu ke lage jaay laga.

³⁰Lekin u tej hawa dekh ke ḍar gais, aur ḍuube laga, aur chillaay ke bolis, “Hamme bachaao, Prabhu!”

³¹Yeeshu jurte haath baṛhaay ke uske pakaṛ lees, aur bolis, “Tumhaar biswaas ketna kamti hei. Kaahe ke ḍaauṭ kara hei?”

³²Jab duuno bauṭ meñ chaṛhin, tab hawa ruk gais.

³³Jon log bauṭ meñ rahin, Yeeshu ke jayjaykaar karin aur bolin, “Sachche ke tum Parmeshwar ke laṛka hei!”

³⁴Yeeshu aur uske chela log Ganesarat ke kinaare pahuñch gain.

³⁵Huañ pe sab log Yeeshu ke pahichaan leen. Aur agal bagal ke des meñ khabar bhejaay deen. Jon koi bhi bimaar rahin ulog ke Yeeshu ke lage laawa gais.

³⁶Sab log Yeeshu se binti karin, ki khali uske kapṛa ke kona chhue ke de de, aur jetna log uske chhuin, ulog achchha hoy gain.