Read Hindi, Fiji Methiu 15 Bible Online

Methiu 15 - Hindi, Fiji bible

Methiu 15

¹Tab Yarushalam se kuchh Farisi aur teechas Yeeshu ke lage aay ke bole lagin.

²“Tumhaar chela log hamaar baap daada ke reeti riwaaj kaahe nai maane hei? Ulog khaana khaay se pahile haath nai dhowe hei.”

³Yeeshu jawaab dees, “Tum log bhi to Parmeshwar ke reeti riwaaj nai maanta hei, aur aapan reeti riwaaj pe chalta hei.

⁴Kaahe ke Parmeshwar bolis raha, ‘Aapan amma aur bappa ke aadar karna, aur jon koi aapan amma aur bappa ke aadar nai kare hei uske maar ḍaale ke chaahi’

⁵Lekin tum log bolta hei ki agar koi aapan amma bappa se bole ki jon cheej se ulog ke madat hoy sake hei u to Parmeshwar ke bheñṭ chaṛhaay dewa gay hei.

⁶Kaa yahi rakam aapan amma bappa ke aadar karta hei? Tum Parmeshwar ke hukum nai maanta hei ki jisse tum aapan reeti pe chale sako.

⁷E ḍhoñgi log, Aayzaaya to tumhaar khaatir ṭheek bolis raha,

⁸‘Ilog to muh se hamaar aadar kare hei lekin ilog ke dil ham se bahut duur rahe hei.

⁹I tumhaar waaste bekaar hei ki hamaar weship karo kaahe ke i wahi sikhaay hei jon ruuls admi banaais hei.” ’

¹⁰Yeeshu sab log ke aapan lage bolaay ke ulog se bolis, “Suno aur samjho.”

¹¹“Jon khaana muh meñ jaay hei, u tumme meila nai kare hei ki tum Parmeshwar ke weship nai karo. Jon kharaab baat muh se nikre hei wahi tumme meila kare hei.”

¹²Tab chela log usse aay ke bolin, “Kaa tum janta hei ki jon cheej tum bola hei usse Farisi log dukhi bhais?”

¹³Yeeshu jawaab dees, “Jon peṛ hamaar swarag ke pita nai bois hei uske ukhaaṛ dewa jaai.

¹⁴Ulog se duur raho! Ulog weisan hei jeise ek añdha dusra añdha ke rasta dekhaate dekhaate duuno gaḍḍha meñ gir paṛin.”

¹⁵Tab Peeṭa bolis, “I hamme samjhaao jab tum bola ki kon kon cheej log ke meila kare hei.”

¹⁶Yeeshu bolis, Kaa tum meñ se koi nai jaane hei ki ham kaa bolta hei?

¹⁷Kaa tum nai janta ki jon khaana tum khaata hei u peṭ meñ jaay hei aur fir tumhaar deñhi se bahire nikre hei.

¹⁸Lekin jon baat tumhaar muh se nikre hei, u dil se nikre hei. Aur wahi admi ke meila kar de hei, ki u Parmeshwar ke weship nai kare sake hei.

¹⁹Kaahe ke kharaab bichaar, hatya, kharaab kaam (aḍalṭri), chori, jhuuṭ bolna, dusra ke ninda karna, i sab tumhaar man se nikre hei.

²⁰Yahi sab baat admi ke meila kare hei, lekin bina haath dhoy khaana khaay se admi meila nai hoy hei, ki u Parmeshwar ke weship nai kare saki.

²¹Yeeshu huañ se nikar ke Ṭaaya (Tyre) aur Seida ṭaaun ke nagichche chala gais.

²²U des meñ ek Kanaani aurat chillaate aais, “E Prabhu, Ḍeiviḍ ke laṛka, ham pe daya karo. Hamaar laṛki meñ saitaan hei aur uske haalat kharaab hei.”

²³Lekin Yeeshu kuchh jawaab nai dees, aur uske chela log Yeeshu se bolin ki uske jaay deo, kaahe ke u ulog ke pichchhe chillaate aay hei.

²⁴Yeeshu bolis, “Hamme khali Israayel ke log ke waaste bheja gais hei! Ulog heraan bheṛa log ke rakam hei.

²⁵Tab u aurat aur nagichche aais. Uske aage gir ke bolis, “E Prabhu, hamaar madat karo!”

²⁶U bolis, “I achchha nai hei ki laṛkan ke roṭi le ke kutta ke aage chhoṛ deo.”

²⁷“I sach hei Prabhu.” u bolis, “lekin kutta bhi u bacha kucha khaay hei jon uske maalik ke ṭaibal pe se gire hei.”

²⁸Yeeshu jawaab dees, “E aurat, tumhaar biswaas bahut hei, tumhaar sañghe weise hee hoi, jeise tum mañgti hei.” Aur uske laṛki wahi lage ṭheek hoy gais.

²⁹Yeeshu huañ se chala gais, aur Galeel ke laik ke lage aais, aur pahaaṛ pe chaṛh ke beiṭh gais.

³⁰Baṛa bheeṛ aais, aapan sañghe langṛa, guuñga, añdha aur ketna bimaria ke laay ke Yeeshu ke goṛ ke lage rakh deen, aur Yeeshu ulog ke achchha kar dees.

³¹Jab sab log i dekhin ki guuñga bole laga hei, langṛa chale laga hei aur añdha dekhe laga hei, tab ulog chakit hoy gain aur Israayel ke Parmeshwar ke baṛaai kare lagin.

³²Yeeshu aapan chela log ke bolaay ke bolis, “Hamme ilog pe daya aay hei. Ilog hamaar sañghe teen roj se hei aur ilog ke lage kuchh khaay ke bhi nai hei. Aur ham ilog ke bhuuka nai bheje sakta. Ilog rasta meñ gir ke behosh hoy jaay sake hei.”

³³Chela log usse bolin, “I jagha to ḍezaṭ hei. Hamme etna khaana kahañ se mili ki ham bheeṛ ke khawaay saki?”

³⁴Yeeshu ulog se puuchhis, “Tum log ke lage ketna roṭi hei?” Ulog bolin, “Saat. Aur kuchh machhri.”

³⁵Tab Yeeshu ulog se bolis ki sab nichche beiṭh jaay.

³⁶U saat roṭi aur machhri leke dhanbaad dees, aur tuuṛ ke aapan chela log ke dees, aur ulog sab ke khawaain.

³⁷Sab koi peṭ bhar ke khaain, aur bacha kucha, saat baaskeṭ meñ bharin.

³⁸Huañ pe chaar hajaar admi rahin, aurat laṛkan ke chhoṛ ke.

³⁹Tab Yeeshu sab ke jaay dees aur bauṭ meñ chaṛh ke Magadan ṭaaun chala gais.