Read Hindi, Fiji Methiu 16 Bible Online

Methiu 16 - Hindi, Fiji bible

Methiu 16

¹Kuchh Farisi aur Saduuki log Yeeshu ke lage aay ke, uske ṭesṭ le ke waaste usse bolin, “Ham log ke asmaan se koi saain dekhaao.”

²Lekin Yeeshu bolis, “Jab sanjha hoy hei tab tum bolta hei, ‘Kal mausam achchha rahi, kaahe ki asmaan ke rang laal hei.’

³Sabere tum bolta hei, ‘Aaj paani barsi, kaahe ke asmaan laal aur kariya hei.’ Tum asmaan ke dekh ke to jaan leta hei, lekin i ṭaaim ke saain kaahe nai dekhe paata hei?

⁴I generaishan ke log ketna dushṭ aur kharaab hei! Tum ham se chamatkaar mañgta hei? Lekin Jona ke saain chhoṛ ke tumme aur koi saain nai mili.” Tab Yeeshu ulog ke chhoṛ ke chala gais.

⁵Tab chela log laik ke upaar pahuñchin. Lekin ulog roṭi laay ke waaste bhuul gay rahin.

⁶Yeeshu ulog se bolis, “Dekho tum log ke Farisi aur Saduuki log ke yeesṭ se bach ke rahe ke paṛi”

⁷Ulog apne meñ baat cheet kar ke bolin, “U to i khaatir bole hei kaahe ke ham log roṭi nai laaya hei.”

⁸Lekin Yeeshu i sab jaanat raha ki ulog kon cheej bole hei, aur ulog se puuchhis, “Tum kaahe apne meñ baat karta hei ki tumhaar lage roṭi nai hei? Sachche ke tum log ke lage kamti biswaas hei!”

⁹“Kaa tum log ab bhi i nai samajhe paaya? Kaa tum log ke yaad nai ki paañch hajaar log ke khaatir ham paañch roṭi tuuṛa raha, aur tab tum ketna baaskeṭ bhara raha?

¹⁰Aur chaar hajaar ke waaste saat roṭi raha, tab tum ketna baaskeṭ bhara raha?

¹¹Tum kaahe nai samajhta ki ham tum se roṭi ke baare meñ nai bola raha, lekin yahi ki Farisi aur Saduuki ke yeesṭ se bacha rahna.”

¹²Tab ulog ke samajh meñ aais ki u roṭi ke yeesṭ ke baare meñ nai, lekin Farisi aur Saduuki ke baat se bache ke baare meñ bolis raha.

¹³Yeeshu Kaisaria Filippi ke des meñ aais aur aapan chela log se puuchhis, “Sab log kaa bole hei ki Manush ke laṛka kon hei?”

¹⁴Ulog bolin, “Koi bole hei ki u Yuhanna baptisma de waala hei, aur koi bole hei u Ilaayja hei aur baaki bole hei Jeremaayah aur nabi log meñ se ek.”

¹⁵Yeeshu ulog se bolis, “Lekin tum log kaa bolta hei ki ham kon hei?”

¹⁶Saayman Peeṭa jawaab dees, “Tum to jinda Parmeshwar ke laṛka Maseeh hei.”

¹⁷Yeeshu usse bolis, “Saayman, Jona ke laṛka, tum ṭheek bola hei kaahe ke i sach tumme admi log se nai mila hei, lekin hamaar Pita dees hei jon swarag meñ hei.

¹⁸Ham tum se i bhi bolta hei ki Peeṭa tum ek chaṭṭaan ke rakam hei aur yahi chaṭṭaan pe ham aapan chech banaayga, aur iske maut bhi nai haṭaay saki.

¹⁹Ham tumme swarag ke raaj ke chaabhi dega, aur jon bhi kuchh tum dharti pe mañgta hei, wahi tumme Parmeshwar swarag meñ dei aur jon kuchh tum dharti pe nai mañgta hei, u tumme swarag meñ bhi nai mili.”

²⁰Tab u chela log ke chetaaoni dees ki koi se nai bataana ki, “U Maseeh hei.”

²¹Wahi ṭaaim se Yeeshu aapan chela log se bataay laga, “Hamme Yarushalam jaay ke jaruuri hei, aur huañ ke baṛa paadri aur des ke agua log se bahut dukh uṭhaay ke hei aur hamme maar dewa jaai, lekin tisra roj ham jinda hoy jaayga.”

²²Ispe Peeṭa uske alag le gais aur gussaay ke bolis, “Parmeshwar kabhi eise nai howe dei, Prabhu!”

²³Tab Yeeshu ghuum ke Peeṭa se bolis, “E saitaan, ham se duur hoy jaao! Tum hamaar waaste rukaawaṭ hei, kaahe ke i bichaar Parmeshwar se nai lekin admi ke bagal se aay hei.”

²⁴Tab Yeeshu aapan chela log se bolis, “Agar koi hamaar pichchhe aay maañge, to apne aap ke bhulaay de aur aapan kros uṭhaay ke hamaar pichchhe hoy le.”

²⁵Kaahe ke jon koi apne aap ke bachaay maañgi u uske khoy dei, lekin jon koi hamaar waaste aapan jaan khoi, to u uske paai.

²⁶Agar admi puura jagat ke paay le aur aapan praan ke khoy de, to usse kaa faayda? Manush aapan praan ke badle meñ kuchh nai de sake hei.

²⁷Manush ke laṛka aapan ainjals ke sañghe Pita ke mahima meñ aaywaala hei. Tab u sab log ke uske kaam ke mutaabik fal dei.

²⁸Ham tumme sachche bataata hei ki hiañ kuchh log hei, jon jab tak Manush ke laṛka ke uske raaj meñ aate dekh nai lei, tab tak ulog nai mari.