Read Hindi, Fiji Methiu 17 Bible Online

Methiu 17 - Hindi, Fiji bible

Methiu 17

¹Chhe roj ke baad Yeeshu Peeṭa aur Jeims aur ulog ke bhaiya Yuhanna ke aapan sañghe leke akele meñ ek uchcha pahaaṛ pe gais.

²Huañ ulog ke saamne Yeeshu ke chehra badal gais. Uske muh suuraj ke rakam chamke lagis, aur uske kapṛa laaiṭ ke rakam ujjar hoy gay.

³Tab u teen log dekhin ki Maozas aur Ilaayja, Yeeshu se baat kare hei.

⁴Peeṭa Yeeshu se bolis, “E Prabhu, i achchha hei ki ham hiañ hei! Ham log ke teen sheḍ banaawe deo, ek tumhaar waaste, ek Maozas ke waaste aur ek Ilaayja ke waaste.”

⁵U bolte raha ki ek chamke waala baadar ulog ke uppar se gujris. U baadar meñ se ek awaaj aais, “I hamaar pyaara laṛka hei, jisse ham bahut khusi hei. Iske baat suno.”

⁶Jab chela log i baat sunin, to bahut ḍar gain, aur muh ke bal jameen pe gir gain.

⁷Yeeshu ulog ke lage aay ke ulog ke chhuis aur bolis, “Ḍaro nai! Uṭho!”

⁸Ulog jab aañkhi kholin, to Yeeshu ke akele dekhin.

⁹Jab ulog pahaaṛ se nichche aat rahin, tab Yeeshu ulog ke hukum de ke bolis, “Jab tak Manush ke laṛka mar ke jinda nai hoy jaai, tab tak i jon dekha hei iske baare meñ koi se nai bataana.”

¹⁰Uske chela log usse puuchhin, “Kaa kaanuun ke guru log nai bolin raha ki Ilaayja, Maseeh se pahile aai?”

¹¹Yeeshu jawaab dees, “Ilaayja jaruur pahile aai aur sab taiyaari kari.

¹²U to aay gais hei. Aur log uske nai pahichaanin aur jeise maañgin weise uske sañghe karin. Aur yahi rakam Manush ke laṛka bhi ulog ke haath dukh uṭhaai.”

¹³Tab chela log samajh gain ki Yeeshu, Yuhanna baptisma de waala ke baare meñ bole hei.

¹⁴Jab Yeeshu aur uske chela log bheeṛ meñ lauṭin, tab ek admi uske lage aais aur ghuṭna ṭek ke bolis, “E Prabhu, hamaar laṛka pe daya karo! Iske eisan mirgi aay hei ki tab i u ṭaaim paani aur aagi meñ gir paṛe hei.

¹⁶Ham iske tumhaar chela log ke lage bhi le gay raha, lekin ulog iske ṭheek nai kare sakin.”

¹⁷Yeeshu jawaab dees, “Tum log ketna jiddi hei, ki tum log ke lage biswaas nai hei! Ham ketna roj tum log ke sañghe rahega? Ham kab tak tum log ke sahte rahega? Laṛka ke hamaar lage laao.”

¹⁸Tab Yeeshu saitaan ke ḍaaṭis, aur u laṛka meñ se nikar gais, aur wahi lage laṛka ṭheek hoy gais.

¹⁹Baad meñ chela log akele meñ Yeeshu ke lage aay ke puuchhin, “Kaahe ke ham log u saitaan ke nai nikaare paaya?”

²⁰Yeeshu bolis, “Kaahe ke tum log ke lage biswaas kamti hei! Lekin ham tumme sachche bataata hei, agar tumhaar lage ek sarso ke bia ke baraabar biswaas hei to tum i pahaaṛ se bolega ki hiañ se haṭ ke huañ chala jaay, tab u chala jaai. Aur tum kuchh bhi kare sakta hei.”

²¹(Lekin khali preya aur upwaas eisan saitaan ke nikaare sake hei.)

²²Jab Yeeshu aur uske chela log Galeel meñ rahin, tab u bolis, “Manush ke laṛka ke admi log ke haath meñ de dewa jaai.

²³Ulog uske maar dei. Lekin tisra roj u jinda hoy jaai.” I sab sunke chela log bahut udaas hoy gain.

²⁴Jab Yeeshu aur uske chela log Kafarnahuum pahuñchin, tab Mandir ke ṭeks le waala log Peeṭa ke lage aay ke puuchhin, “Kaa tumhaar guru Mandir ke ṭeks dewe hei?”

²⁵Peeṭa bolis, “Haañ dewe hei.” Jab Peeṭa ghar meñ aais, tab Yeeshu uske puuchhe se pahile bolis, “E Saayman, tum kon cheej sochta hei? I dharti ke raaja kis se ṭeks le hei? Aapan log se, ya dusra jagha se aay waala log se?”

²⁶Peeṭa usse bolis, “Dusra log se.” Yeeshu jawaab dees, “Tab to hiañ ke log ke ṭeks nai bhare ke hei.

²⁷Lekin ham ulog ke waaste rukaawaṭ nai bane mañgta hei. Yahi kaaran laik meñ jaao, ḍori feko aur jon pahila machhri mile, uske muh kholna. Usman tumme ek sikka mili. Uske leke aapan aur hamaar ṭeks bhar dena.”