Read Hindi, Fiji Methiu 19 Bible Online

Methiu 19 - Hindi, Fiji bible

Methiu 19

¹Jab Yeeshu i sab baat kar lees, tab u Galeel chhoṛ ke Joḍan ke paar Juḍia meñ aais.

²Baṛa baṛa bheeṛ uske peechha karis, aur Yeeshu sab bimaria ke achchha karte gais.

³Kuchh Farisi uske ṭesṭ kare maañgat rahin aur uske lage aay ke bolin, “Kaa i raaiṭ hei ki ek admi aapan aurat ke koi bhi kaaran se ḍivos de de?”

⁴Yeeshu jawaab dees, “Kaa tum i nai paṛha ki dunia jab racha gais, tab dunia banaay waala ek admi aur ek aurat banaais raha? Yahi kaaran admi aapan amma bappa se alag hoy ke aapan aurat se juṛ jaay hei, aur u duuno ek hoy jaay hei.”

⁶Aur ab u dui nai lekin ek hei. Aur koi bhi ulog ke alag nai kari jon ke Parmeshwar joṛis hei.”

⁷Tab Farisi log usse puuchhis, “Tab kaahe ke Maozas bolis ki ek admi ḍivos ke kaagaj likh ke aapan aurat ke alag kare sake hei?”

⁸Yeeshu bolis, “Tum log ke lage dil nai hei! Wahi kaaran Maozas tumme aapan aurat ke ḍivos de ke raaji bhais. Suru se Parmeshwar i rakam nai chaahis raha.

⁹Ham tum se bataata hei ki jon admi aapan aurat jon sekshual paap nai karis hei, uske ḍivos deke dusra se saadi kare hei, u faitful nai hei.”

¹⁰Tab chela log bolin, “Agar eisehiyeñ sambandh ek aurat aur admi ke beech meñ hei, to saadi nai kare ke chaahi.”

¹¹Lekin Yeeshu bolis, “Khali wahi log jiske Parmeshwar akele rahe ke gifṭ dees hei, wahi log i seekhi.

¹²Kaahe ke ek dusra kaaran hei ki ek admi saadi nai kare sake hei, kuchh to eisehiyeñ peida bhain hei, aur kuchh ke admi log eisan banaay deen hei, aur kuchh eisan bhi hei, jon swarag ke raaj ke khaatir saadi nai karin hei. Jon log i ṭeeching ke apnaay sake hei to apnaay leo.”

¹³Kuchh log aapan laṛkan Yeeshu ke lage laain, ki jisse Yeeshu aapan haath ulog pe rakh ke aur preya kare. Uske chela log ulog ke rokin ki Yeeshu ke tang nai kare.

¹⁴Lekin Yeeshu bolis, “Laṛkan ke hamaar lage aay deo, aur ilog ke nai roko! Jon log i laṛkan ke rakam hei, wahi log ke swarag ke raaj hei.”

¹⁵Laṛkan pe haath rakkhe ke baad Yeeshu huañ se chala gais.

¹⁶Ek admi aay ke Yeeshu se puuchhis, “Ṭeecha, kon achchha kaam ham kari ki hamme anant jeewan mile?”

¹⁷Yeeshu bolis, “Tum ham se kaahe puuchhta hei ki kon achchha cheej hei? Khali Parmeshwar achchha hei. Agar tum anant jeewan mañgta hei, to uske aagya ke maano.”

¹⁸U admi puuchhis, “Kon aagya?” Tab Yeeshu bolis, “Hatya nai karo, saadi meñ faitful raho, chori nai karo, jhuṭṭa gawaahi nai deo.

¹⁹Aapan maiya aur bappa ke aadar karo, aur aapan paṛosi se aapan rakam prem rakkho.”

²⁰Naojawaan Yeeshu se bolis, “I sab ke to ham chhoṭa se maante aaya hei, isse aage hamme kon cheej kare ke hei?”

²¹Yeeshu bolis, “Agar tum ekdam achchha hoy mañgta hei, to jaao, aapan sab dhan daulat bech deo! Sab peisa gareeb meñ baaṭ deo, tab tumme swarag meñ khajaana mili. Aur aay ke hamaar pichchhe chalo.”

²²Lekin jab naojawaan i baat sunis, to soch meñ paṛ gais, aur huañ se chala gais, kaahe ke u bahut dhani admi raha.

²³Tab Yeeshu aapan chela log se bolis, “Ham sachche bolta hei ki dhani log ke swarag ke raaj meñ jaay ke kaṛa hei.

²⁴I sahaj hei ki uuñṭ sui ke naake se nikre, lekin i mushkil hei ki ek dhani admi Parmeshwar ke raaj meñ jaay.”

²⁵Jab chela log i sab sunin, to ulog bahut chakit bhain aur bole lagin, “To fir kon bache sake hei?”

²⁶Yeeshu ulog ke bagal dekh ke bolis, “Kuchh cheej hei jon admi nai kare sake hei, lekin Parmeshwar sab kuchh kare sake hei.”

²⁷Ispe Peeṭa bolis, “Dekho, ham to sab kuchh chhoṛ ke tumhaar pichchhe chal paṛa hei. Hamme kaa mili?”

²⁸Yeeshu usse bolis, “Ham tum se bataata hei, ki tum jon hamaar pichchhe chala aaya hei, to jab nyaay ke roj jab Manush ke laṛka aapan mahima meñ gaddi pe beiṭhi, to tum baarah gaddi pe beiṭh ke Israayel ke baarah ṭraaib ke nyaay karega.

²⁹Sab koi jon aapan ghar, ya bhaiya-bahini, ya amma-bappa, ya laṛkan bachchan, ya khet ke chhoṛ dees hei, u isse kahiñ sao guna jaada paai.

³⁰Lekin jon jon pichchhe hei, ulog aage hoy jaai, aur jon aage hei, ulog pichchhe hoy jaai.”