Read Hindi, Fiji Methiu 2 Bible Online

Methiu 2 - Hindi, Fiji bible

Methiu 2

¹Yeeshu ke peidaais Juḍia ke Bethlaham meñ raaja Heraḍ ke ṭaaim bhay raha. Iske baad waaismen eesṭ se Yarushalam aain,

²aur bolin, “Juḍia meñ jon abhi peida bhais hei, u raaja kahañ hei? Ham log uske taara nikarte dekha. Ham uske weship kare aaya hei.”

³I sun ke Raaja Heraḍ aur Yarushalam ke log ghabraay gain.

⁴Raaja sab baṛa paadri aur Yahuudi jaati ke baṛkuan log ke sabha bolaais aur puuchhis, “Maseeha kahañ peida hoi?”

⁵Ulog jawaab deen, “Juḍia ke Bethlaham meñ, kaahe ke yahi baat nabi log likhin hei.

⁶‘E Juḍia ke Bethlaham tum mahaan hei kaahe ke tum meñ se ek agua nikri jon Israayel meñ hamaar log ke rakhwaali kari.” ’

⁷Heraḍ baad meñ waaismen ke chuppe se bolaais aur ulog se puuchh ke i pata lagaais ki u taara kon ṭaaim ulog ke dekhaais raha.

⁸Fir ulog ke Bethlaham bhej ke bolis, “Jaao, laṛka ke ṭheek se pata lagaao aur paay ke hamme khabar karo, ki ham bhi jaay ke uske weship kare saki.”

⁹Ulog raaja ke baat maan ke chal deen. Jon taara ulog eesṭ meñ nikarte dekhin raha, ulog ke aage aage chalte chalte, u jagha ruk gais jahañ laṛka raha.

¹⁰Ulog taara dekh ke bahut khusi bhain.

¹¹Ghar ke bhittar jaay ke ulog laṛka ke uske amma Meri ke sañghe dekhin aur uske namaste karin. Fir aapan aapan theili khol ke uske lohbaan, sona, aur gandras gifṭ meñ deen.

¹²Baad meñ ulog ke sapna meñ i chetaaoni mila raha ki ulog Heraḍ ke lage nai lauṭe, yahi khaatir ulog dusra rasta se des se chala gain.

¹³Ulog ke jaay ke baad Prabhu ke duut Josaf ke sapna meñ dekhaais aur bolis, “Uṭho, laṛka aur uske amma ke leke Ijipt des bhaag jaao. Jab tak ham nai bolega, wahiñ rahna, kaahe ke Heraḍ i laṛka ke marwaay ke waaste khoje hei.”

¹⁴Josaf uṭha aur wahi raat laṛka aur uske amma ke leke Ijipt des chal dees,

¹⁵aur Heraḍ ke mare tak wahiñ raha, jisse nabi ke muh se nikra baat jon Prabhu bolis raha, u puura hoi, “Ham Ijipt des se aapan laṛka ke bolaaya hei.”

¹⁶Heraḍ ke i dekh ke bahut gussa aais ki eesṭ ke waaismen uske dhokha dees. U aapan saulja log ke bhejis aur waaismen ke mutaabik Bethlaham ke agal bagal ke u sab laṛkan ke marwaay dees, jon dui saal ke ya aur bhi chhoṭa rahin.

¹⁷Tab Jeremaayah nabi ke i baat puura hois,

¹⁸“Ramah meñ roy aur gaay ke awaaj sunaais. Raichal aapan laṛkan ke waaste rowat rahi, aur u aapan aañsu koi ke pochhe nai det rahi, kaahe ke ulog sab mar gain raha.”

¹⁹Heraḍ ke maut ke baad Prabhu ke duut Ijipt des meñ Josaf ke sapna meñ dekhaay dees aur bolis,

²⁰“Uṭho, bachcha aur uske amma ke leke Israayel des chala jaao, kaahe ke laṛka ke jon log maare maañgat rahin, ab ulog mar gain hei”

²¹Josaf uṭha aur laṛka aur uske amma ke leke Israayel des chala gais.

²²Jab u sunis ki Archelaus aapan bappa ke jagha pe Juḍia meñ raaj kare hei, yahi kaaran huañ jaay se ḍarat raha, aur sapna meñ jeise bataawa gais raha, Galeel chala gais,

²³aur huañ Naasrat naam ke gaaoñ meñ jaay ke bas gais, ki jeise nabi log bataay rahin, puura hoi, “Uske Naasri bola jaai.”