Read Hindi, Fiji Methiu 20 Bible Online

Methiu 20 - Hindi, Fiji bible

Methiu 20

¹Yeeshu bataat raha ki swarag ke raaj i rakam hei, Ek roj sabere ek admi aapan añguur ke khet meñ kaam kare ke khaatir majduur ke lagaais.

²U ek ek majduur ke ek roj ke majduuri pe, añguur ke khet meñ bhejis.

³Lagbhag nao baje sabere, u admi dekhis ki kuchh aur majduur log bajaar meñ bekaar khaṛa hei.

⁴Ulog se u bolis, “Tum bhi khet meñ jaao. Ham tum log ke bhi talab dega.”

⁵Ulog chala gais. Fir baarah baje aur teen baje bhi u weisaiyeñ karis. Ulog se bhi u wahi bolis, jon aur baaki log se bolis raha.

⁶Paañch baje ke ṭaaim jab u fir bajaar gais, to kuchh aur admi log ke bekaar meñ khaṛa paais. Aur ulog se bolis, “Tum log kaahe hiañ din bhar se bekaar khaṛa hei?”

⁷Ulog usse bolin, “Kaahe ki koi ham log ke majduuri pe nai rakkhis hei.” Tab u ulog se bolis ki uske khet meñ jaay ke kaam kare.

⁸Sanjha jab bhais, tab khet ke maalik sardaar ke bolaay ke bolis, “Majduur log ke bolaay ke sab ke talab de deo. Aur usse suru karna jon laasṭ meñ aain raha, aur jon pahile aais raha ulog ke sab se laasṭ meñ dena.”

⁹Jon log paañch baje aay rahin ulog ke din bhar ke talab mila.

¹⁰Jon log sab se pahile kaam suru karin raha, sochin ki ulog ke jaada talab mili, lekin ulog ke bhi otne mila jetna baaki log ke mila raha.

¹¹Ulog khet ke maalik se komplain karin.

¹²Ulog bolin, “I log jon laasṭ aain, khali ek ghañṭa kaam karin raha. Ham log to din bhar ghaam meñ kaam kara. Aur tum ulog ke hamlog ke baraabar talab dia.”

¹³Khet ke maalik usman se ek ke jawaab dees, “Dost, ham tumhaar sañghe kuchh kharaab nai kara. Ham to tumme wahi dia jon tum se promis kara raha.

¹⁴Jon cheej tumhaar hei u le leo aur chala jaao. Ham jetna maañgi otna de sakta hei tumme iske kaa waasta?

¹⁵Kaa ham aapan peisa se u nai kare sakta jon ham mañgta hei? Tumme jaran kaahe hoy hei, agar ham ilog pe daya kari?”

¹⁶Yeeshu bolis, “Yahi rakam jon laasṭ hei u aage hoi. Aur jon aage hei, u laasṭ hoi.”

¹⁷Jab Yeeshu Yarushalam jaat raha, tab rasta meñ aapan baarah chela log ke akele meñ le jaay ke ulog se bolis.

¹⁸“Ham log Yarushalam jaata hei. Huañ pe Manush ke laṛka ke paadri aur paṛha likha log ke haath meñ de dewa jaai, aur ulog uske maut ke saja sunaai.

¹⁹Aur ulog uske geir Yahuudi log ke haath meñ de dei, jon uske hasi uṛaai, chaabuk maari, aur kros pe chaṛhaai, lekin tisra roj u jinda hoy jaai.”

²⁰Tab Zabdi ke aurat aapan laṛkan ke sañghe Yeeshu ke lage aais aur namaste karke binti karis.

²¹Yeeshu usse puuchhis ki u kon cheej maañge hei, tab u bolis, “Jab tum aapan raaj meñ aayga, tab hamaar i duuno laṛkan meñ se ek ke aapan raaiṭ saaiḍ aur dusra ke aapan lefṭ saaiḍ beiṭhe ke mauka dena.”

²²Lekin Yeeshu jawaab dees, “Tum nai janta ki tum kaa mañgta hei. Kaa tum u pyaala piye sakta hei jon ke hamme piye ke hei?” Jeims aur Yuhanna bolin, “Ham piye sakta hei.”

²³Yeeshu ulog se bolis, “Hamaar pyaala to tum jaruur peena, lekin hamaar raaiṭ aur lefṭ meñ beiṭhe ke khaatir ham nai kuchh kare sakta. I to hamaar Pita hee tumme bataay sake hei.”

²⁴I sun ke u das chela log duuno bhaiya pe bahut gussa bhain.

²⁵Lekin Yeeshu ulog ke aapan lage bolaay ke bolis, “Tum janta hei ki geir ruula log, ulog pe raaj kare hei, aur ulog ke baṛa jan uspe hukum kare hei?

²⁶Lekin ilog ke rakam kaam nai karo. Agar tum baṛa bane maañgta hei, tab tum sab ke naukar bano.

²⁷Aur agar tum sab se aage rahe mañgta hei, tab tum sab ke naukar ban ke raho.

²⁸Jeise Manush ke laṛka aapan sewa nai karaay, lekin sab ke sewa kare aur bahut log ke chhuṭkaara ke khaatir aapan jaan de dees.”

²⁹Jab ulog Jeriko se jaat rahin, tab ek baṛa bheeṛ uske pichchhe chale lagin.

³⁰Wahi ṭaaim, dui añdha admi jon rasta ke kinaare beiṭha rahin, sunin ki Yeeshu jaay hei, to jor jor se chillaay lagin, “E Prabhu, Ḍeiviḍ ke laṛka, ham pe daya karo!”

³¹Bheeṛ ke log ulog ke chuppe rahe ke bolin, lekin ulog aur jor jor se chillaay lagin, “E Prabhu, Ḍeiviḍ ke laṛka, ham pe daya karo!”

³²Tab Yeeshu ruk ke ulog ke bolaais, aur bolis, “Tum kaa mañgta hei ki ham tum log ke waaste kari?”

³³Ulog Yeeshu se bolis, “E Prabhu, ham dekhe mañgta hei.”

³⁴Yeeshu daya karke ulog ke aañkhi chhuis, aur ulog wahi ṭaaim dekhe lagin, aur uske pichchhe hoy leen.