Read Hindi, Fiji Methiu 21 Bible Online

Methiu 21 - Hindi, Fiji bible

Methiu 21

¹Jab Yeeshu aur uske chela log Yarushalam ke paas aain, tab u Jaituun pahaaṛ pe Beitfage meñ gain aur Yeeshu dui chela log ke aage bhej dees.

²Yeeshu ulog se bolis, “Saamne waala gaaoñ meñ jaao, huañ tumme ek gadha aur uske bachcha bañdha mili. Uske khol ke hamaar lage laao.

³Agar koi tum se kuchh puuchhi to bolna, ‘Prabhu ke iske jaruurat hei,’ aur u wahi lage tumme de dei.”

⁴I sab i kaaran bhais ki jon vachan nabi log bolin raha, u puura hoi.

⁵“Yarushalam ke log se bolo, Tumhaar raaja tumhaar lage aay hei! U dayaalu hei, aur ek gadha pe beiṭha hei. Aur u gadha ke bachcha pe aay hei.”

⁶Chela log jaay ke weise karin jeise Yeeshu hukum dees raha.

⁷Ulog gadha aur uske bachcha ke laay ke uspe aapan kapṛa bichhaain. Yeeshu uspe beiṭh gais.

⁸Bheeṛ meñ se ketna log aapan kapṛa rasta pe bichhaay deen aur kuchh log peṛ se ḍaar tuuṛ ke rasta pe bichhaain.

⁹Kuchh log uske aage aage jaat rahin aur kuchh log uske pichchhe. Sab chillaay ke bolat rahin, “Ḍeiviḍ ke Santaan! ‘Hosaana!’ Dhann hei u jon Prabhu ke naam se aay hei. Swarag meñ Hosaana!”

¹⁰Jab Yeeshu Yarushalam meñ aais, to ṭaaun meñ halchal mach gais, aur sab bole lagin, “I kon hei?”

¹¹Bheeṛ ke log bolin, “I Yeeshu hei, Galeel ke Naasrat ke nabi.”

¹²Yeeshu Mandir meñ aay ke, u sab jon huañ len-den karat rahin, ulog ke bahire khader dees. Aur jon kabuttar bechat rahin, ulog ke bench aur peisa badle waala log ke ṭaibal ulṭaay dees.

¹³Yeeshu ulog se bolis, “Baaibal meñ likhaan hei, ‘Hamaar ghar preya ke ghar bola jaai,’ lekin tum log to iske chor ke aḍḍa banaay dia!”

¹⁴Tab añdha aur langṛa log uske lage Mandir meñ aain aur u ulog ke achchha kar dees.

¹⁵Lekin baṛa paadri aur paṛha likha log u sab chamatkaar kaam ke baare meñ sun ke, aur jab dekhin ki laṛkan uske baṛaai kare hei, tab ulog bahut gussa bhain.

¹⁶Ulog Yeeshu se bolin, “Kaa tum sunta hei ki i laṛkan kaa bole hei?” Yeeshu jawaab dees, “Haañ! Lekin kaa tum log nai paṛha, ‘Chhoṭa laṛkan aur janma bachcha log stuti kari.” ’

¹⁷Tab Yeeshu ulog ke chhoṛ ke ṭaaun ke bahire Beitniyaah chala gais aur wahiñ raat bitaais.

¹⁸Sabere ṭaaun se lauṭte ṭaaim Yeeshu ke bhuuk laga.

¹⁹Rasta ke kinaare u ek anjeer ke peṛ dekh ke uske lage gais, lekin uspe patti ke alaawa aur kuchh nai raha. Tab u bolis, “Ab se tum meñ koi fal nai lagi!” Wahi lage u anjeer ke peṛ jhuraay gais.

²⁰I dekh ke chela log chakit hoy gain aur bolin, “Anjeer ke peṛ jurte keise sukhaay gais?”

²¹Lekin Yeeshu ulog se bolis, “Ham tum se sachche bolta hei ki agar tum biswaas rakkho aur sandeh nai karo to tum i kare sakta hei jon ham anjeer ke peṛ ke sañghe kara hei. Aur isse jaada bhi kare sakta hei. Tum i pahaaṛ se bole sakta hei ki uṭho aur samundar meñ kuudo, aur wahi hoi.

²²Agar tum biswaas karega, to tum preya meñ jon kuchh maañgega, u sab tumme mili.”

²³Jab u chech meñ aay ke parchaar karat raha, to baṛa paadri aur huañ ke baṛkue uske lage aay ke bolin, “Kon adhikaar se tum i kaam karta hei, aur kon tumme i adhikaar dees hei?”

²⁴Yeeshu jawaab dees, “Ham bhi tum se ek baat puuchhega. Agar tum hamme iske jawaab dega, to ham bhi bataayga ki ham kis ke adhikaar se i kaam karta hei.

²⁵Yuhanna baptisma de waala kis ke bagal se aais raha, swarag se, ki admi log ke bagal se?” U sab aapas meñ baat cheet kare lagin, “Agar ham bolega, ‘Swarag ke bagal se,’ to u boli, ‘Tab fir tum uske biswaas kaahe nai kara?’

²⁶Lekin agar ham log bolega, ‘Admi ke bagal se,’ to hamme bheeṛ ke ḍar hei, kaahe ke u sab Yuhanna ke nabi maanat rahin.”

²⁷Tab ulog Yeeshu se bolin, “Ham log nai janta.” Yeeshu bolis, “Ham bhi tumme i nai bataayga ki ham kis ke adhikaar se i kaam karta hei.”

²⁸Yeeshu ek kahaani sunaais, “Ek admi raha, uske dui laṛkan rahin. Tum hamme bataana ki tum kaa sochta hei. U baṛa laṛka ke lage jaay ke bolis, “Beṭa. jaao aur khet meñ kaam karo!”

²⁹U bolis, ‘Ham nai jaayga,’ Lekin u baad meñ pastaais aur chala gais.

³⁰Tab u dusra laṛka ke lage gais aur khet meñ jaay ke waaste bolis, aur u jawaab dees, ‘Achchha, ham jaayga,’ lekin u nai gais.

³¹I duuno meñ se kon aapan bappa ke ichchha puura karis?” Ulog bolis, “Baṛa laṛka.” Tab Yeeshu ulog se bolis, “Ham tum se sachche bataata hei ki tum se pahile, ṭeks le waala log aur veshya log Parmeshwar ke raaj meñ jaai.

³²Kaahe ke tumhaar lage dharam ke rasta dekhaay Yuhanna aais raha, lekin tum log uske biswaas nai kara, lekin ṭeks lewaala aur veshya log biswaas karin. Aur i dekh ke bhi tum baad meñ nai pastaaya aur naa biswaas kara.”

³³Yeeshu baṛa paadri aur agua log ke ek aur kahaani sunaais, “Ek jameendaar raha, jiske añguur ke khet raha, aur u chaaro bagal gher dees. U khod ke ras ke waaste kunḍ banaais. Aur pahra de ke khaatir ek ṭaawa bhi banaais. Tab u khet ke renṭ pe de ke ghuume chala gais.

³⁴Jab añguur tuuṛe ke ṭaaim aais, tab maalik ek naukar ke bhejis ki uske hissa ke añguur laawe.

³⁵Lekin ulog naukar log ke pakaṛ ke khuub maarin, ek to mar gais aur dusra ke patthar se maar deen.

³⁶Ab u kisaan pahile se bhi jaada naukar ke bhejis. Lekin bharaita log ulog ke bhi weisaiyeñ karin jeise pahile kare rahin.

³⁷Aakhri meñ u aapan laṛka ke ulog ke lage bhejis, kaahe ke u sochis ki ulog uske laṛka ke aadar kari.

³⁸Lekin jab ulog kisaan ke laṛka ke dekhis, to aapas meñ baat karin, “Ek roj i jameen iske hoy jaai. Aao ham iske jaan se maar dei. Tab iske jaaydaad ham log ke hoy jaai.”

³⁹Ulog uske pakṛin aur khet ke bahire nikaar ke jaan se maar deen.

⁴⁰Yeeshu puuchhis, “Ab jab khet ke maalik aai tab u bharaita ke sañghe kaa kari?”

⁴¹Ulog usse bolis, “U ulog ke bahut kharaab se maari, aur khet dusra bharaita ke de dei, jon, ṭaaim se uske añguur dei.”

⁴²Yeeshu ulog se bolis, “Tumme jaane ke chaahi ki Baaibal meñ kaa bataay hei, ‘Jon patthar ke kaapenṭa log bagal meñ feñk deen raha, wahi kona ke sab se sundar patthar ban gais hei. I Prabhu karis hei aur dekhe meñ hamme bahut achchha lage hei.” ’

⁴³Ham tumme bataata hei ki Parmeshwar ke raaj tum se le lewa jaai aur ulog ke de dewa jaai, jon wahi kare hei jon u maañge hei.

⁴⁴Jon bhi koi i patthar pe giri, u chuur chuur hoy jaai, lekin jispe i giri, u pisaay jaai.”

⁴⁵Jab baṛa paadri aur Farisi uske kahaani sunin to samajh gain ki u wahi log ke baare meñ bole hei.

⁴⁶Lekin jab uske ulog aresṭ kare maañgin, tab ulog bheeṛ se ḍar gain, kaahe ke ulog Yeeshu ke nabi maanat rahin.