Read Hindi, Fiji Methiu 22 Bible Online

Methiu 22 - Hindi, Fiji bible

Methiu 22

¹Ek dafe fir Yeeshu ek kahaani sunaais.

²“Swarag ke raaj i rakam hei jahañ ek raaja raha jon aapan laṛkan ke saadi ke bhoj dees.

³Raaja aapan naukar log ke bhejis ki jaay ke sab log jiske neota mila raha, bolaay laay, lekin ulog nai aain.

⁴Fir u, aur naukar ke i bol ke bhejis, ‘Khaana taiyaar hei! Hamaar beil aur paaltu jaanwar kaṭaay gain hei, aur sab kuchh taiyaar hoi gais hei. Saadi ke paaṭi meñ aao!’

⁵Lekin mehmaan log kuchh dhyaan nai deen aur aapan kaam pe chal deen, ek aapan khet meñ to dusra aapan biznes dekhe.

⁶Aur baaki mehmaan u naukar log ke pakaṛ ke khuub peeṭin aur maar ḍaalin.

⁷Ab raaja gussa meñ aay ke aapan saulja log ke bhejis ki u hatyaara log ke maar de aur puura ṭaaun meñ aagi lagaay de.

⁸Tab u naukar log se bolis, 'Saadi ke khaana to taiyaar hei, bolaay gay mehmaan ke aay ke kismat meñ nai hei.

⁹Yahi khaatir rasta pe jaao, aur chaaro bagal jetna admi dekhaay, ulog ke saadi ke khaana pe bolaao.’

¹⁰Tab naukar log gali gali jaay ke aur jon bhi bhala bura ulog ke milin, sab ke le aain, aur saadi ke ghar mehmaan se bhar gais.

¹¹“Jab raaja aapan mehmaan se mile aais, to huañ ek admi ke dekhis jon saadi ke kapṛa nai pahinis raha.

¹²Raaja usse bolis, 'Dost, kaahe nai tum saadi ke achchha kapṛa pahin ke aaya?’ Lekin mehmaan ke lage koi jawaab nai raha.

¹³Tab raaja aapan naukar log se bolis, 'Uske haath aur goṛ baañdh ke bahire añdhiyaar meñ feñk deo. Huañ u roi aur aapan daañt peesi.’ ”

¹⁴Yeeshu aakhri meñ bolis, “Bahut ke bolaaya jaay hei lekin thoṛa ke chuna jaay hei.”

¹⁵Tab Farisi log ek sañghe mil ke plen banaain ki keise ulog Yeeshu ke baat meñ fañsaai.

¹⁶Ulog Heraḍ ke log ke, Yeeshu ke lage ek baat puuchhe ke bhejis, “E guru, ham log janta hei ki tum sachcha hei aur Parmeshwar ke rasta sachchaai se dekhaata hei, aur sab ke ekke rakam dekhta hei, chaahe u koi hoy.

¹⁷Hamme bataao ki tum kaa sochta hei, ‘Caesar ke ṭeks dewa jaay ki nai?” ’

¹⁸Yeeshu ulog ke kharaab bichaar jaan gais aur bolis, “E kapṭi log, tum hamme kaahe ke ṭesṭ karta hei?

¹⁹Hamme u peisa dekhaao jisse ṭeks bhara jaay hei.” Ulog uske lage ek chaañdi ke peisa laain.

²⁰Yeeshu puuchhis, “Kiske chhaapa aur naam ispe hei?”

²¹“Caesar ke.” Tab Yeeshu ulog se bolis, “Jon Caesar ke hei u Caesar ke deo aur jon Parmeshwar ke hei, u Parmeshwar ke deo.”

²²I sab sun ke ulog chakit bhain aur ulog Yeeshu ke chhoṛ ke chala gain.

²³Saduuki log biswaas nai karat rahin ki mare ke baad meñ laaif hei. To kuchh Saduuki log wahi roj Yeeshu ke lage aay ke puuchhin, “E guru, Maozas likhis raha ki, agar koi admi ke aurat hei, aur bina laṛkan ke mar jaai, to uske bhaiya u aurat se saadi kar le ki jisse u aapan bhaiya ke khaatir laṛka peida kare sake.”

²⁵Ek dafe saat bhaiya rahin. Pahila saadi kar ke, bina laṛkan ke mar gais. Uske aurat uske bhaiya ke hoy gais.

²⁶Yahi rakam dusra bhaiya ke sañghe bhi bhais, aur tisra aur hiañ tak ki saato ke sañghe wahi bhais.

²⁷Aakhri meñ u aurat bhi mar gais.

²⁸Ab jon roj sab jinda hoi to u saato meñ se u kis ke aurat hoi. Kaahe ke u sab ke aurat rahis.”

²⁹Lekin Yeeshu ulog ke jawaab dees, “Tum ketna roñg hei! Tum nai janta ki Baaibal kon cheej sikhaay hei. Aur tum Parmeshwar ke sakti nai janta hei.

³⁰Jab Parmeshwar log ke jiaay hei, tab ulog saadi nai kari. Ulog to ainjals ke rakam hoiyeñ.

³¹Aur mar ke jinda hoy ke baare meñ, tum vachan nai paṛha jon Parmeshwar tum se bataais raha,

³²“Ham Abraham ke Parmeshwar aur Aayzak ke Parmeshwar aur Jaykab ke Parmeshwar hei. Aur u mara log ke nai, lekin jon jinda hei uske Parmeshwar hei.”

³³Jab log i baat sunin, tab chakit rahe gain.

³⁴Jab Farisi log sunin ki Yeeshu Saduuki log ke muh band kar dees hei, tab ulog ek sañghe hoy gain.

³⁵Usman se ek jon kaanuun jaanat raha, ṭesṭ kare ke waaste ek queschan karis.

³⁶“E guru, kaanuun meñ kon se hukum sab se khaas hei?”

³⁷Yeeshu bolis, “Tum Prabhu aapan Parmeshwar se aapan man se aur aapan praan se, aur aapan saara buddhi se prem karo.

³⁸Yahi sab se pahila aur sab se khaas hukum hei.

³⁹Aur dusra khaas hukum i hei ki, “Tum aapan paṛosi se aapan rakam prem karo.”

⁴⁰I dui hukum, sab nabi log ke buk pe baisḍ hei.”

⁴¹Jab Farisi ek sañghe rahin, tab Yeeshu ulog se ek queschan karis,

⁴²“Maseeh ke baare meñ tum log kaa sochta hei? U kiske laṛka hei?” Ulog bolin, “U Ḍeiviḍ ke laṛka hei.”

⁴³Yeeshu jawaab dees, “Tab Ḍeiviḍ Aatma meñ hoy ke kaahe uske ‘Prabhu’ bole hei?”

⁴⁴Ḍeiviḍ bolis, “Prabhu hamaar Prabhu se bolis raha, Hamaar raaiṭ saaiḍ beiṭho, jab tak ham dusman ke tumhaar goṛ ke nichche nai rakh dei.”

⁴⁵Agar Ḍeiviḍ uske ‘Prabhu’ bole hei tab uske laṛka keise hoi?

⁴⁶Koi bhi uske jawaab nai de sakis. Aur u roj se koi bhi usse ekko queschan nai puuchhis.