Read Hindi, Fiji Methiu 23 Bible Online

Methiu 23 - Hindi, Fiji bible

Methiu 23

¹Tab Yeeshu bheeṛ aur chela log se bolis,

²“Kaanuun aur Guru aur Farisi log, Maozas ke kaanuun samjhaay ke waaste chuna gain hei.

³Yahi kaaran ulog jon kuchh bhi boli, uske karna aur maanna, lekin ulog ke rakam nai karna, kaahe ke ulog jon bole hei, kare nai hei.

⁴Ulog baṛa bojha admi ke kañdha pe laad de hei lekin ulog ke madat ke waaste ek uñgri bhi nai uṭhaay hei.

⁵Ulog jon sab kare hei admi ke dekhaay ke waaste kare hei. Ulog aapan tabeej ke baṛa kare hei aur aapan kapṛa ke jhaalar lamba kare hei.

⁶Aur paaṭi meñ achchha jagha, chech meñ khaas kursi, bajaar meñ aadar, aur jab log ulog ke ‘Guru’ bole hei to ulog ke achchha lage hei.

⁸Lekin tum ‘Guru’ nai bolwaana, kaahe ke tumhaar ekke guru hei, aur tum sab bhaiya aur bahini hei.

⁹Dharti pe koi ke aapan Pita nai bolna, kaahe ke tum sab ke ekke Pita hei jon swarag meñ hei.

¹⁰Tum ‘Agua’ bhi nai bolwaana, kaahe ke tumhaar ekke agua hei aur u hei Maseeh.

¹¹Lekin tum meñ se jon sab se baṛa hei, u tumhaar sewak hoi.

¹²Jon koi apne aap ke baṛa banaai, u chhoṭa kara jaai, aur jon apne aap ke chhoṭa banaai, u baṛa bani.”

¹³“E pakhanḍi Farisi aur Shaastri log, tum pe haay hei! Kaahe ke tum admi log ke waaste swarag ke raaj ke palla band kar deta hei. Tum naa to apne bhittar jaata hei aur naa dusra log ke bhittar jaay deta hei.”

¹⁵“E pakhanḍi, Farisi aur Shaastri log, tum pe haay hei! Tum admi log ke aapan bagal ghumaay ke khaatir, jameen aur paani ek kar deta hei, aur jab u aay jaay hei, tab uske aapan se bhi jaada narak jaay laayk banaay deta hei!

¹⁶“E añdha agua log, tum pe bhi haay hei! Tumme to dusra ke rasta dekhaay ke hei, lekin tum sab to añdha hei. Tum bolta hei, ‘Agar koi Mandir ke kasam khaay, to u kuchh nai, lekin agar koi Mandir ke sona ke kasam khaay to u sab kuchh hei.’

¹⁷E muurakh aur añdha log! Kon cheej baṛa hei, sona ki u Mandir jon sona ke pawitr kar de hei?

¹⁸Tum fir bolta hei, ‘Agar koi bedi ke kasam khaay to kuchh nai, lekin jon bheñṭ uspe hei, agar koi uske kasam khaay to sab kuchh hei.’

¹⁹E añdha log! Kon jaada baṛa hei, bheñṭ ki u bedi jon bheñṭ ke pawitr banaay hei?

²⁰Yahi kaaran jon koi bedi ke kasam khaay hei, u bedi aur uspe rakhaan bheñṭ duuno ke kasam khaay hei,

²¹aur jon Mandir ke kasam khaay hei, u Mandir aur usman rahe waala Parmeshwar ke bhi kasam khaay hei.

²²Aur jon swarag ke kasam khaay hei, u Parmeshwar ke siñghaasan aur uspe beiṭhe waala duuno ke kasam khaay hei.”

²³“E pakhanḍi Farisi aur Shaastri log, tum pe bhi haay hei! Tum pudeena, sauf aur jeera ke daswa hissa to deta hei, lekin kaanuun ke jaruuri baat jeise ki nyaay, daya aur biswaas ke nai maanta hei, tumme to chaahat raha ki sab karte raho, aur uske bhi nai chhoṛo.

²⁴E añdha agua log, tum chhoṭa makkhi ke to chhaan deta hei, lekin uuñṭ ke leel leta hei!”

²⁵“E pakhanḍi Farisi aur Shaastri log, tum pe museebat aai! Tum thariya aur pyaala ke bahire se to safa karta hei, lekin bhittar to sab rakam ke laalach aur swaarth bhara paṛa hei.

²⁶E añdha Farisi log, pahile pyaala ke bhittar to safa karo, tab bahire bhi safa hoy jaai.

²⁷E pakhanḍi Farisi aur Shaastri log, tum pe haay! Tum chuuna se dhowaan kabar ke rakam hei, jon bahire se sundar dekhaay hei, lekin bhittar to haḍḍi aur saṛa murda se bhara paṛa hei.

²⁸Yahi rakam bahire se tum bhi admi log ke saamne achchha dekhaata hei, lekin bhittar se to tum buraai se bhara paṛa hei.”

²⁹“E pakhanḍi Shaastri aur Farisi log, tum pe haay! Tum nabi log ke sundar kabar to banaata hei aur jon achchha jeewan bitaais hei uske kabar sajaata hei.

³⁰Aur tum bolta hei, ‘Agar ham aapan baap daada ke jamaane meñ rahta to, nabi log ke hatya meñ bhaag nai leta.’

³¹I to tum safa bataata hei ki tum nabi log ke hatyaara log ke laṛkan hei!

³²To jaao aur jon tumhaar baap daada suru karin hei, uske tum puura karo!

³³E saañp aur saañp ke bachcha log, tum narak ke saja se keise bachega?

³⁴Yahi kaaran ham tum se bolta hei ki ham tum log ke waaste nabi, aur samajhdaar log, aur guru log ke bhejta hei. Tum usman se kuchh ke maar dega, aur kuchh ke kros pe chaṛhaay dega, aur kuchh ke aapan chech meñ chaabuk se maar ke ek ṭaaun se dusra ṭaaun khaderte rahega.

³⁵Isse jetna hatya bhais hei u sab ke saja tum pe paṛi. Hiañ tak ki Aibal se leke Birikyaah ke laṛka Zakaryaah tak, jon ke tum Mandir aur bedi ke beech meñ maar dia raha.

³⁶Ham tum se sachche bataata hei ki i sab baat i ṭaaim ke log pe paṛi.”

³⁷“E Yarushalam, E Yarushalam! Tum nabi log ke maar deta hei, aur jon tumhaar lage bheja jaay hei, ulog ke patthar se maar deta hei! Ham ketna dafe maañgta raha ki jeise murgi aapan bachcha ke aapan pañkha ke nichche baṭor ke rakkhe hei, weisaiyeñ ham bhi tumhaar bachchan ke aapan sharan meñ le lei, lekin tum i nai chaaha.

³⁸Yahi kaaran tumhaar Mandir ujaṛ jaai.

³⁹Tum hamme tab tak nai dekhega jab tak tum nai bolega, ‘Dhann hei u jon Prabhu ke naam se aay hei,” ’