Read Hindi, Fiji Methiu 26 Bible Online

Methiu 26 - Hindi, Fiji bible

Methiu 26

¹Jab Yeeshu i sab baat bataay dees, tab u aapan chela log se bolis,

²“Tum janta hei ki dui roj baad fasah ke teohaar aay waala hei, aur Manush ke laṛka kros pe chaṛhaawe ke waaste pakarwaawa jaai!”

³Tab baṛa paadri aur des ke agua log, Kaaifa naam ke baṛa paadri ke añgna meñ jama bhain.

⁴Aur ulog plen banaain ki Yeeshu ke chuppe se pakaṛ ke maar ḍaale ke chaahi.

⁵Lekin ulog i bhi bolin, “Ham log ke i kaam teohaar ke ṭaaim nai kare ke hei, kaahe ke admi log dañga fasaad kari.”

⁶Jab Yeeshu Bethani meñ Saayman koṛhi ke ghare khaana khaay beiṭhis,

⁷tab ek aurat ek botal mahañga pefeum leke uske lage aais, aur uske muuṛ pe chhoṛ dees.

⁸Chela log i sab dekh ke bahut gussa bhain aur bole lagin, “I barbaadi kaahe ke?

⁹I pefeum ke jaada daam meñ bech ke jon peisa mili uske gareeb meñ baaṭa jaay sakat raha.”

¹⁰Yeeshu jaanat raha ki ulog kaa soche hei aur bolis, “Tum log i aurat ke kaahe sataata hei? I to hamaar sañghe bhalaai karis hei.

¹¹Gareeb to tumhaar sañghe hardam rahiyeñ, lekin ham to tum log ke sañghe hardam nai rahega.

¹²I to hamaar deñhi pe pefeum chhoṛis hei ki i hamaar maṭṭi dewe ke khaatir taiyaari kare.

¹³Ham tum log ke sachche bataata hei ki sab dunia meñ jahañ kahiñ bhi susamaachaar ke parchaar kara jaai, huañ sab koi yaad kari ki i aurat kaa karis raha, aur ulog sab ke bataai.”

¹⁴Tab u baarah chela log meñ se ek, jiske naam Juḍas Iskariyoti raha, baṛa paadri log ke lage gais.

¹⁵Aur usse bolis, “Agar ham Yeeshu ke pakaṛwaay dei, to tum hamme ketna dega?” Ulog tees (30) chaañdi ke peisa Juḍas ke de deen.

¹⁶Aur wahi ṭaaim se u Yeeshu ke pakaṛwaay ke mauka khoje laga.

¹⁷Akhmeeri roṭi (bina yeesṭ ke roṭi) ke teohaar ke pahila roj, Yeeshu ke chela log uske lage aay ke puuchhin, “Tum kahañ mañgta hei ki ham log tumhaar khaatir fasah ke khaana taiyaar kari?”

¹⁸Yeeshu bolis, “Ṭaaun meñ ek khaas admi ke lage jaay ke bolo, ‘Guru bole hei, ‘Hamaar ṭaaim nagichche hei. Hame aapan chela log ke sañghe tumhaar ghare fasah ke teohaar manaay ke hei.” ’

¹⁹Tab Yeeshu ke bole ke mutaabik, chela log fasah ke taiyaari karin.

²⁰Sanjha ke ṭaaim, Yeeshu aapan baarah chela log ke sañghe khaana khaay beiṭhis.

²¹Jab ulog khaana khaat rahin, tab Yeeshu bolis, “Ham tum log ke bataata hei, ki tum meñ se ek hamme pakaṛwaai.”

²²Is pe chela log bahut udaas bhain aur ek ek karke Yeeshu se puuchhe lagin, “Prabhu, kaa u ham hei?”

²³Yeeshu bolis, “Jon hamaar sañghe thariya meñ roṭi ḍubaais hei, wahi hamme pakaṛwaai.

²⁴Manush ke laṛka to weisaiyeñ mari, jeise uske baare meñ likhaan hei, lekin uspe kaa beeti jon uske pakaṛwaai! U admi ke to peida nai hoy ke chaahat raha!”

²⁵Tab Juḍas, jon uske pakaṛwaay waala raha bolis, “Rabbi, kaa u ham hei?” Yeeshu bolis, “I to tumahi bolta hei.”

²⁶Jab ulog khaana khaat rahin, tab Yeeshu roṭi leke aur aasheesh maañg ke uske tuuṛis, aur chela log ke deke bolis, “Leo, khaao, i hamaar deñhi hei.”

²⁷Fir u pyaala lees, dhanbaad deke ulog ke dees aur bolis, “Tum sab isman se pio.

²⁸I hamaar khuun hei, aur yahi se Parmeshwar tumhaar sañghe promis karis hei. I dewa jaai ki jisse bahut log ke paap ke maafi hoi.

²⁹Aaj se ham waain nai piyega, u roj tak jab tak Pita ke raaj meñ tum log ke sañghe nawa waain nai pee.”

³⁰Tab ulog bhajan gaain aur Jaituun pahaaṛ pe chala gain.

³¹Tab Yeeshu ulog se bolis, “Aaj raat ke tum sab hamme chhoṛ ke bhaag jaayga, kaahe ke likhaan hei, ‘Parmeshwar, shepaḍ log ke maari aur jon jhunḍ meñ bheṛa rahi u sab idhar udhar chhitraay jaai.’

³²Lekin mare se jinda hoy ke baad ham tum se pahile Galeel chala jaayga.”

³³Ispe Peeṭa Yeeshu se bolis, “Chaahe sab koi tumme chhoṛ ke chala jaay, lekin ham to tumme kabhi nai chhoṛega!”

³⁴Yeeshu bolis, “Ham tumme sachche bataata hei ki aaj ke raat, murga bole se pahile, tum teen dafe bolega ki tum hamme nai janta hei.”

³⁵Peeṭa Yeeshu se bolis, “Agar hamme tumhaar sañghe mare ke paṛe, tab bhi ham nai bolega ki ham tumme nai janta!” Sab chela log bhi yahi bolin.

³⁶Tab Yeeshu aapan chela log ke sañghe Getsamni naam ke ek jagha pe gais, aur ulog se bolis, “Jab tak ham huañ jaay ke preya karta hei, tum log yahiñ beiṭhna.”

³⁷U aapan sañghe Peeṭa aur Jabdi ke dui laṛkan ke le gais. U udaas aur soch meñ paṛ gais,

³⁸aur u ulog se bolis, “Hamaar man bahut udaas hei, hiañ tak ki ham i bojha ke nichche daba hei aur hamaar maut aay waala hei. Hiañ ruko aur hamaar sañghe jagte rahna.”

³⁹Fir Yeeshu ulog se thoṛa aage jaay ke aur muh ke bagal gir ke preya kare lagis, “E hamaar Pita, agar hoy sake to i pyaala ham se le leo. Fir bhi hamaar nai, lekin tumhaar ichchha puura hoi.”

⁴⁰Tab Yeeshu chela log ke lage aais, aur ulog ke sote dekh ke Peeṭa se bolis, “Kaa tum log hamaar sañghe ek ghañṭa bhi nai jaage sakta hei?

⁴¹Jagte rahna aur preya karte raho ki tum ṭesṭ meñ nai paṛo. Aatma to taiyaar hei, lekin deñhi kamjor hei”

⁴²Fir Yeeshu jaay ke dusra dafe preya karis, “E hamaar Pita, agar i kaam hamaar bina nai hoi paai to tumhaar ichchha puura hoy.”

⁴³Jab Yeeshu lauṭ ke aais to fir chela log ke sote paais, kaahe ke ulog aapan aañkhi khula nai rakkhe sakat rahin.

⁴⁴Yeeshu ulog ke fir se chhoṛ ke chala gais aur wahi rakam se fir se preya kare lagis.

⁴⁵Yeeshu lauṭ ke aay ke chela log se bolis, “Kaa tum log abhi tak araam karta hei? Dekho ṭaaim aay gais hei, aur Manush ke laṛka, paapi log ke haath pakaṛwaaya jaai.

⁴⁶Uṭho, chalo! Dekho, hamaar pakaṛwaay waala nagichche aay gais hei.”

⁴⁷Yeeshu abhi i sab bolat raha ki Juḍas jon baarah meñ se ek raha, aay gais. Uske sañghe ek baṛa bheeṛ bhi raha aur ulog ke haath meñ talwaar aur laaṭhi raha. I log ke baṛa paadri aur agua log bhejin raha.

⁴⁸Juḍas i saain dees raha, “Jiske ham jaay ke chumma lega, wahi hei. Uske pakaṛ lena.”

⁴⁹Juḍas seedha Yeeshu ke lage gais aur bolis, “Tumhaar sañghe saanti rahe!” Aur uske chuum lees.

⁵⁰Yeeshu usse bolis, “Dost, jon cheej kare ke hei jaldi karo.” Admi log aay ke Yeeshu ke kas ke pakaṛ leen aur aresṭ kar leen.

⁵¹Tab Yeeshu ke ek saathi, aapan talwaar nikaar ke baṛa paadri ke naukar ke kaan kaaṭ dees.

⁵²Yeeshu usse bolis, “Aapan talwaar bhittar rakkho, kaahe ke jon koi talwaar uṭhaay hei u sab talwaar se naas kar dewa jaai.

⁵³Kaa tum i nai janta ki ham aapan Pita se binti kare sakta hei? U yahi lage baarah aami se jaada ainjals hamme de dei.

⁵⁴Lekin tab jon cheej Baaibal meñ likhaan hei u keise puura hoi, jon bole hei ki eise hoy ke chaahi.”

⁵⁵Tab Yeeshu bheeṛ se bolis, “Kaa tum talwaar aur laaṭhi leke hamme pakṛe aaya hei jeise ki ham koi chor hei? Ham to chech meñ roj roj beiṭh ke updes deta raha aur tab tum log hamme nai pakṛa.

⁵⁶Lekin i sab i khaatir bhais ki jon cheej nabi log likhin raha u puura hoy.” Tab Yeeshu ke sab chela log uske chhoṛ ke bhaag gain.

⁵⁷Jon log Yeeshu ke pakaṛwaain raha, ulog uske baṛa paadri Kaaifa ke lage le gain, jahañ pe agua log waiṭ karat rahin.

⁵⁸Peeṭa bhi thoṛa duur se ulog ke peechha karat raha, aur baṛa paadri ke añgna meñ aay ke dekhe maañgat raha ki aage kon cheej hoi, aur gaaḍ log ke sañghe beiṭh gais.

⁵⁹Baṛa paadri aur sab kaaunsal Yeeshu ke agaiñsṭ meñ jhuuṭa gawaahi khoje ke kosis karat rahin, ki jisse ulog uske maare sake.

⁶⁰Lekin bahut jhuuṭa gawaahi se bhi kuchh nai bhais. Aakhri meñ dui admi aage aay ke bolin,

⁶¹“I admi bolis raha, ‘Ham Parmeshwar ke Mandir giraay ke teen roj meñ fir banaay de sakta hei.” ’

⁶²Tab baṛa paadri khaṛa hoy ke Yeeshu se bolis, “Tum aapan bachaao meñ kaahe nai kuchh bolta hei? I sab log to tumhaar agaiñsṭ meñ gawaahi de hei.”

⁶³Lekin Yeeshu chuppe raha. Is pe baṛa paadri usse bolis, “Ham jinda Parmeshwar ke kasam khaay ke bolta hei, ki agar tum Parmeshwar ke laṛka Maseeh hei, to ham se bataay deo.”

⁶⁴Yeeshu usse bolis, “Tum to apne bolta hei, ‘Bahut jaldi tum dekhega ki Manush ke laṛka sab se Shaktimaan ke raaiṭ saaiḍ beiṭha hei aur swarag ke baadar pe aay hei!” ’

⁶⁵Ispe baṛa paadri aapan kapṛa faaṛ ke bole lagis, “I to Parmeshwar ke ninda karis hei. Ab hamme aur gawaahi ke jaruurat nai hei! Tum sab suna hei ki i kaa bolis hei!

⁶⁶Ab tum log ke bichaar kaa hei?” Ulog bolin, “Iske to mare ke saja hoy ke chaahi.”

⁶⁷Tab ulog uske muh pe thuukin, aur ghuusa se maarin, aur kuchh log thappaṛ maarin aur bolin, “Tum sochta hei ki tum Maseeh hei! Bataao ki tumme kon maaris hei!”

⁶⁸

⁶⁹Peeṭa bahire añgna meñ beiṭhis raha, ki ek naukraani uske lage aay ke bolis, “Tum bhi to Galeel ke Yeeshu ke sañghe raha!”

⁷⁰Lekin Peeṭa safa jhuuṭ bol dees, “Ham nai janta ki tum kaa bolti hei.”

⁷¹U bahire chala gais aur huañ bhi ek naukraani uske dekh ke huañ jon log rahin ulog se bolis, “I Naasrat ke Yeeshu ke sañghe raha.”

⁷²Ek dafe fir Peeṭa bolis, “Ham kasam khaata hei ki ham i admi ke nai janta hei.”

⁷³Thoṛa deri meñ huañ pe khaṛa ek admi aay ke Peeṭa se bolis, “Ham log janta hei ki tum ulog meñ se ek hei. Ham bataay sakta hei kaahe ke tum Galeel log ke rakam baat karta hei.”

⁷⁴Tab Peeṭa kasam khaay laga, “Ham sachche bolta hei ki ham uske nai janta hei. Parmeshwar hamme saja dei agar ham jhuṭṭe bolta hei.” Aur wahi lage murga bolis.

⁷⁵Tab Peeṭa ke u baat yaad aais, jon Yeeshu usse bolis raha, “Murga ke bole se pahile tum teen dafe bolega ki tum hamme nai janta hei.” Aur u bahire jaay ke fuuṭ fuuṭ ke roy laga.