Read Hindi, Fiji Methiu 27 Bible Online

Methiu 27 - Hindi, Fiji bible

Methiu 27

¹Sabere sab baṛa paadri aur agua log Yeeshu ke agaiñsṭ feisla karin, ki uske jaan se maare ke chaahi.

²Tab ulog uske baañdh ke, aur le jaay ke Romi gavna, Paaylaṭ ke haath meñ de deen.

³Jab Juḍas, jon Yeeshu ke pakaṛwaais raha dekhis ki uske maut ke saja hoi, tab u bahut pastaais, aur chaañdi ke tees sikka, mukhia aur agua log ke lauṭaay ke bolis,

⁴“Ham paap kara hei. Ham ek nirdos admi ke dhoka se maut ke hawaale kara hei.” Lekin ulog jawaab deen, “Isse ham log ke kaa? I tumhaar maamla hei.”

⁵Juḍas u chaañdi ke sikka ke Mandir meñ feñk dees aur jaay ke faañsi lagaay lees.

⁶Tab baṛa paadri u chaañdi ke peisa leke bolis, “Iske Mandir ke khajaana meñ nai rakkhe ke chaahi kaahe ke isman khuun laga hei.”

⁷Ulog aapas meñ sallaah karke, u peisa se ek jameen khareed leen, jahañ pe pardesi log ke maṭṭi dewa jaay sake.

⁸Yahi kaaran u jagha ke “Khuun ke khet” naam dewa gais.

⁹Aur tab u vachan jon Jeremaayah nabi bataais raha, puura bhais. “Ulog chaañdi ke tees sikka leen, jeise ki Israayel ke log, uske daam lagaain raha.

¹⁰Ulog wahi peisa se kumhaar ke khet khareed leen, jeise Prabhu hamme hukum dees raha.”

¹¹Tab Yeeshu ke, gavna Paaylaṭ ke aage laawa gais, aur u puuchhis, “Kaa tum Yahuudi log ke raaja hei?” Yeeshu uske jawaab dees, “Tumahi to bolta hei.”

¹²Jab aur baṛa paadri aur agua log uspe iljaam lagaay lagin, tab u koi jawaab nai dees.

¹³Tab Paaylaṭ usse bolis, “Kaa tum i sab nai sunta hei, ki ilog tumhaar agaiñsṭ gawaahi de hei?”

¹⁴Lekin Yeeshu kuchh nai bolis, aur gavna hairaan hoy gais.

¹⁵Gavna ke reeti raha ki i teohaar ke ṭaaim koi ek jehli ke, jon ke log maañge, uske chhoṛ det raha.

¹⁶Aur u ṭaaim uske jel meñ ek keidi raha jon ke naam Barabba raha.

¹⁷Jab bheeṛ baṭurin, tab gavna ulog se bolis, “Tum log kon ke mañgta hei ki ham tumhaar khaatir chhoṛi? Barabba ke, ki Yeeshu ke jon Maseeh kahaay hei?”

¹⁸Kaahe ke u jaanat raha ki sab log Yeeshu se jaran kare hei, aur wahi khaatir uske pakaṛwaain hei.

¹⁹Aur jab u nyaay ke kursi pe beiṭha tab uske aurat uske khabar bhejwaais, “I nirdos admi ke maamla meñ kuchh nai karna. Ham sapna meñ uske kaaran bahut dukh uṭhaaya.”

²⁰Lekin baṛa paadri aur agua log, bheeṛ ke bhaṛkaay deen ki ulog Yeeshu ke maut ke saja aur Barabba ke chhoṛe ke waaste maañg kare.

²¹Tab gavna puuchhis, “I duuno meñ se tum kon ke mañgta hei ki ham tumhaar waaste chhoṛi?” Ulog bolin, “Barabba ke.”

²²Paaylaṭ ulog se puuchhis, “Tab ham Yeeshu ke, jon Maseeh kahaay hei, uske kaa kari?” U sab chillaain, “Uske kros pe chaṛhaay deo.”

²³U bolis, “Kaahe ke? U kon kharaab kaam karis hei?” Aur tab ulog aur jor se chillaay ke bole lagin, “Uske kros pe chaṛhaao.”

²⁴Jab Paaylaṭ dekhis ki kaam bigṛe hei aur u kuchh nai kare saki, aur saait laṛaai jhagṛa hoy jaai, tab u paani leke bheeṛ ke aage aapan haath dhoy lees aur bolis, “Ham i admi ke khuun ke jimmewaar nai hei. Tum log jaano.”

²⁵Sab koi jawaab deen, “Iske maut ke jimmewaari ham log pe aur hamaar laṛkan pe chhoṛ deo!”

²⁶Gavna, Barabba ke chhoṛ dees aur aapan saulja log ke hukum dees ki Yeeshu ke chaabuk maar ke kros pe chaṛhaay de.

²⁷Tab gavna ke saulja log, Yeeshu ke gavna ke peles meñ le gain, aur huañ, aur baaki dal ke wahiñ baṭorin.

²⁸Fir uske kapṛa utaar ke ulog uske laal rang ke raub pahinaain.

²⁹Tab ulog ek kaaṭa ke taaj banaain aur uske muuṛ pe rakh deen aur uske raaiṭ haath meñ ek laaṭhi de deen. Fir uske aage jhuk ke uske hasi uṛaay lagin, aur chillaay lagin, “E Yahuudi log ke raaja, tumhaar jay hoy!”

³⁰Ulog uspe thuukin, aur laaṭhi leke uske muuṛ pe maarin.

³¹Hasi uṛaay ke baad ulog uske raub utaar ke fir uske aapan kapṛa pahinaay deen, aur kros pe chaṛhaay ke waaste chal deen.

³²Jeise ulog bahire nikarat rahin, weise Saayman naam ke ek Kureni admi ulog ke mila. Saulja uske jabarjasti se Yeeshu ke kros uṭhaay ke chale ke bolis.

³³Jab ulog u jagha pe aain jahañ ke naam Gulgutha raha, jon ‘Khopṛi ke jagha hei’,

³⁴tab añguur ke ras meñ kuchh kaṛua cheej milaay ke Yeeshu ke deen, lekin cheekhe ke baad Yeeshu uske nai piye maañgis.

³⁵Aur jab ulog Yeeshu ke kros pe chaṛhaay deen, tab uske kapṛa ke daaoñ pe lagaay ke apne meñ baaṭ leen.

³⁶Aur u sab huañ beiṭh ke, uske gaaḍ kare lagin.

³⁷Ulog uske muuṛ ke uppar ek noṭis lagaain jis pe likhaan raha, “I Yahuudi log ke raaja Yeeshu hei.”

³⁸Ulog uske sañghe dui aur ḍaaku ke bhi kros pe chaṛhaain, ek ke uske raaiṭ meñ aur dusra ke uske lefṭ meñ.

³⁹Huañ se aay jaay waala log uske kharaab kharaab baat bolin aur muuṛ hilaay hilaay ke bolat rahin,

⁴⁰“To tum hei jon bole raha ki Mandir ke tuuṛ ke tum teen roj meñ fir se banaay dega, apne aap ke bachaao! Agar tum Parmeshwar ke laṛka hei, to kros se nichche utro.”

⁴¹Yahi rakam, baṛa paadri aur agua log sab uske hasi uṛaat rahin aur bolat rahin,

⁴²“I dusra log ke bachaais, lekin apne aap ke nai bachaay sake. I Israayel ke raaja hei, agar kros pe se utar aai tab ham iske biswaas karega.

⁴³I Parmeshwar pe bharosa rakkhe hei, kaahe ke i bolis raha, ‘Ham Parmeshwar ke laṛka hei.’ Ham dekhe mañgta hei ki Parmeshwar keise iske bachaay hei!”

⁴⁴Jon dui ḍaaku uske sañghe kros pe chaṛhaawa gain raha, duuno bhi wahi rakam uske buraai karat rahin.

⁴⁵Baarah baje se le ke teen ghanṭa tak añdhiyaar hoy gais.

⁴⁶Teen baje ke lagbhag Yeeshu chillaay ke bolis, “Eli, Eli, lama shabaktani!” iske matlab hei, “E hamaar Parmeshwar, E hamaar Parmeshwar, tum hamme kaahe chhoṛ dia.”

⁴⁷Huañ pe jon log khaṛa rahin ulog meñ se kuchh i sun ke bolin, “I Ilaayja ke bolaay hei.”

⁴⁸Usman se ek jurte dauṛ ke spanj ke sirka meñ bhijaay ke, ek lakṛi pe rakh ke uske piye ke dees.

⁴⁹Lekin aur log bolin, “Dekhi Ilaayja iske bachaay aay hei ki nai.”

⁵⁰Ek dafe Yeeshu fir se jor se chillaay ke aapan praan tyaag dees.

⁵¹Ṭheek wahi lage Mandir ke parda uppar se nichche tak faṭ ke dui ṭukṛa hoy gais. Jameen hil gais, aur chaṭṭaan bhi faṭ gais.

⁵²Kabar khul gain, aur mara meñ se bahut achchha admi log ke laash jinda hoy gais.

⁵³Aur Yeeshu ke jinda hoy pe, ulog huañ se nikar ke pawitr ṭaaun meñ gain aur bahut log ke dekhaay deen.

⁵⁴Tab aami ofisa aur saulja log jon Yeeshu ke gaaḍ karat rahin, jab erthquaik ke dhakka aur baaki sab cheej dekhin to ḍar gain aur bolin, “Sachche ke i Parmeshwar ke laṛka raha!”

⁵⁵Huañ pe ketna aurat rahin jon Yeeshu ke sewa karte, Galeel se uske pichchhe aay rahin, duur se i sab dekhat rahin.

⁵⁶Ulog meñ Meri Magdalini, Jeims ke amma Meri, aur Jabdi ke laṛkan ke amma rahin.

⁵⁷Sanjha hoy pe Armathia ke Josaf naam ke ek dhani admi aais. U bhi Yeeshu ke chela raha.

⁵⁸U Paaylaṭ ke lage gais aur Yeeshu ke laash maañgis. Paaylaṭ hukum dees ki laash uske de dewa jaay.

⁵⁹Tab Josaf laash ke leke ek ujjar linan ke kapṛa meñ lapeṭis.

⁶⁰Aur uske aapan nawa kabar meñ rakkhis, jon chaṭṭaan meñ khodaan raha. Fir ek baṛa patthar kabar ke duaari pe ḍhakel ke chala gais.

⁶¹Meri Magdalini aur dusri Meri kabar ke aage beiṭha rahin.

⁶²Dusra din, sabat ke roj, baṛa paadri aur Farisi log Paaylaṭ ke lage jaay ke bolin,

⁶³“Sir, Hamme yaad hei ki u dhokebaaj aapan jeete jee bolis raha, ‘Teen roj ke baad ham fir jinda hoy jaayga.’

⁶⁴Yahi khaatir hukum karo ki teen roj tak kabar ke gaaḍ kara jaay, kahiñ eise nai hoy ki uske chela log aay ke uske laash choraay le jaai aur sab log se boliheñ, ‘U mara meñ se jinda hoy gais hei.’ Tab pichhla dhoka, pahile se bhi kharaab hoi.”

⁶⁵Paaylaṭ ulog se bolis, “Gaaḍ log ke le jaao, jeise uske rakkhe sako weise rakkho.”

⁶⁶Tab ulog jaay ke kabar ke gaaḍ kare lagin aur sañghe kabar ke muh seel kar deen.