Read Hindi, Fiji Methiu 28 Bible Online

Methiu 28 - Hindi, Fiji bible

Methiu 28

¹Sabat ke baad, hapta ke pahila roj, sabere jeise bhais, tab Meri Magdalini aur dusri Meri kabar dekhe aain.

²Achaanak ek bahut baṛa erthquaik aais aur Prabhu ke ainjal swarag se utar ke aais aur patthar ke bagal haṭaay ke us pe beiṭh gais.

³U ainjal bijli ke rakam chamkat raha aur uske kapṛa snao ke rakam ujjar raha.

⁴Huañ pe jon gaaḍ log rahin, ulog ḍar ke maare kaape lagin aur adhmara hoy gain.

⁵U ainjal aurat log se bolis, “Ḍaro nai! Ham janta hei ki tum Yeeshu ke, jiske kros pe chaṛhaawa gay raha, uske khojta hei.

⁶U hiañ nai hei! Parmeshwar uske mara meñ se jinda kar dees, jeise Yeeshu bolis raha ki hoi. Aao, u jagha ke dekho jahañ u rakkha gais raha.

⁷Jaldi jaay ke uske chela log ke bataao ki u mara meñ se jinda hoy gais hei, aur dekho, u tum se pahile Galeel pahuñch jaai, aur huañ tum log uske dekhega. Jon ham tumme bataaya hei uske yaad rakhna.”

⁸Is pe ulog ḍar ke maare lekin khusi hoy ke jaldi se kabar se lauṭin aur chela log ke sab baat bataay ke waaste dauṛ paṛin.

⁹Achaanak Yeeshu ulog se milis aur bolis, “Tumme saanti hoy!” Ulog uske nagichche gain aur goṛ pakaṛ ke uske weship karin.

¹⁰Tab Yeeshu ulog se bolis, “Ḍaro nai! Jaao aur hamaar pichchhe chale waala log se bolo ki ulog Galeel chala jaay, aur ulog wahiñ hamme dekhi.”

¹¹U aurat log rasta meñ rahin jab gaaḍ log meñ se kuchh ṭaaun aain aur baṛa paadri se jaay ke sab baat bataain.

¹²Tab ulog sab agua log ke sañghe mil ke ek meeṭing karin, aur saulja log ke bahut peisa deke bolin,

¹³“Sab log ke bataana, ‘Raat ke jab ham sab sowat raha, tab Yeeshu ke chela log aay ke uske choraay le gain.’

¹⁴Aur agar gavna ke kaan tak i baat pahuñchis to ham uske samjhaay dega aur tum log bach jaayga.”

¹⁵Gaaḍ log peisa leke, jeise bataawa gay raha, weisaiyeñ karin. I baat Yahuudi log meñ aur duur duur gaaoñ meñ feil gais aur sab log iske maane lagin.

¹⁶Gyaara chela log Galeel meñ wahi pahaaṛ pe gain jahañ ulog ke Yeeshu jaay ke waaste bataais raha.

¹⁷Jab ulog huañ Yeeshu ke dekhin to namaste karin, lekin kuchh to abhi bhi biswaas nai karin.

¹⁸Tab Yeeshu ulog ke lage aay ke bolis, “Swarag aur jameen ke sab adhikaar hamme dewa gais hei.

¹⁹Yahi kaaran jaao aur sab jaati ke log ke chela banaao ki jisse ulog ke Pita, Putr aur Pawitr Aatma ke naam se baptisma de sako.

²⁰Aur ulog ke jon sab ham bataaya raha, u sab ke paalan kare ke sikhaao. Aur dekho, ham i janam ke ant tak hardam tumhaar sañghe rahega.