Read Hindi, Fiji Methiu 4 Bible Online

Methiu 4 - Hindi, Fiji bible

Methiu 4

¹Tab Aatma Yeeshu ke suunsaan jagha le gais, jisse saitaan uske ṭesṭ le sake.

²Yeeshu chaalis (40) roj aur chaalis raat bina kuchh khaay raha, iske baad uske bahut bhuuk lagis.

³Aur saitaan uske lage aais aur bolis, “Agar tum Parmeshwar ke laṛka hei, to bolo ki i patthar roṭi ban jaay.”

⁴Yeeshu jawaab dees, “Baaibal meñ likhaan hei, ‘Admi khali roṭi se nai lekin Parmeshwar ke muh se nikra vachan se jinda rahe hei.” ’

⁵Tab saitaan uske pawitr jagha le jaay ke aur Mandir ke ek uchcha jagha pe khaṛa kar dees.

⁶Aur bolis, “Agar tum Parmeshwar ke laṛka hei, to nichche kuud jaao, kaahe ke Baaibal meñ likhaan hei, ‘ki Parmeshwar tumhaar khaatir ainjals ke hukum dei aur aapan haath pe uṭhaay lei, ki kahiñ eise nai hoy ki tumhaar goṛ ke patthar se choṭ lage.” ’

⁷Yeeshu usse bolis, “I bhi likhaan hei ki tum Prabhu aapan Parmeshwar ke ṭesṭ nai leo.”

⁸Fir saitaan uske ek baṛa uchcha pahaaṛ pe le gais aur dunia ke sab raaj aur uske sakti dekhaay ke bolis,

⁹“Agar tum hamaar aage jhuk ke hamme weship karega to ham tumme i sab de dega.”

¹⁰Tab Yeeshu usse bolis, “Duur haṭ jaao saitaan! Kaahe ke likhaan hei, ‘Tum aapan Prabhu, Parmeshwar ke hee weship karo aur khali wahi ke sewa karo.” ’

¹¹Ispe saitaan Yeeshu ke chhoṛ ke chala gais aur ainjals aay ke uske sewa kare lagin.

¹²Yeeshu jab i sunis ki Yuhanna jel meñ hei, tab u Galeel chala gais.

¹³Yeeshu Naasrat ke chhoṛ ke Kafarnahuum ṭaaun meñ jaay ke rahe laga. I ṭaaun Galeel ke laik ke kinaare Jabluun aur Naptaali ke des meñ hei.

¹⁴Ki jisse Parmeshwar ke baare meñ vachan, jon Aayzaaya nabi bolis raha, puura hoi,

¹⁵“E Jabluun aur Naptaali, ke des aur dharti jon samundar ke kinaare hei aur Joḍan ke eesṭ meñ hei, sab Galeel aur Saamri ke jameen suno.”

¹⁶“Jon log añdhiyaar meñ rahin ulog baṛa roshni dekhi. Aur jon maut ke chhaaiñ meñ beiṭhin raha ulog pe laaiṭ chamki.”

¹⁷U ṭaaim se Yeeshu parchaar kare laga aur i bole laga, “Aapan dil se pastaao, kaahe ke swarag ke raaj nagichche aay gais hei.”

¹⁸Galeel ke laik ke kinaare chalte Yeeshu dui bhaiya log ke dekhis, Saayman jon ke Peeṭa bolaawa jaat raha aur uske bhaiya Enḍru, u duuno laik meñ jaal ḍaalat rahin, kaahe ke duuno machhua rahin.

¹⁹Yeeshu ulog se bolis, “Hamaar pichchhe chale aao, ham tumme admi pakṛewaala banaayga.”

²⁰Ulog jaldi se aapan aapan jaal chhoṛ ke uske pichchhe hoy leen.

²¹Yeeshu aage gais aur Jeims aur Yuhanna jon Zabdi ke laṛka log rahin, ulog ke dekhis. Ulog aapan bappa ke sañghe bauṭ meñ beiṭh ke jaal banaawat rahin. Yeeshu ulog ke bolaais aur bolis ki uske pichchhe aay jaay.

²²Ulog jaldi se bauṭ aur aapan bappa ke chhoṛ ke uske pichchhe hoy leen.

²³Yeeshu Galeel bhar meñ chech meñ ghuum ghuum ke sikhaat raha aur Parmeshwar ke raaj ke parchaar karat raha. Aur ulog ke sab rakam ke bimaari ṭheek karat raha aur dukh duur karat raha.

²⁴Uske naam puura Siria meñ feil gais. Tab sab log mirgi, lakwa aur ḍher rakam ke bimaari aur museebat meñ fase admi log aur pagla log ke Yeeshu ke lage laain aur u ulog ke achchha karat raha.

²⁵Galeel, Juḍia, Yarushalam ke das ṭaaun se jon ke Dekapulis bolaawa jaat raha, aur Joḍan ke u paar se bahut log aain, aur ek baṛa bheeṛ uske pichchhe chale lagin.