Read Hindi, Fiji Methiu 5 Bible Online

Methiu 5 - Hindi, Fiji bible

Methiu 5

¹Yeeshu bheeṛ dekhis tab uppar pahaaṛ pe jaay ke beiṭh gais, aur chela log uske lage aain.

²Tab Yeeshu ulog ke sikhaay laga.

³Dhann hei ulog jon saadhaaran hei aur Parmeshwar ke sahaare jiye hei kaahe ke swarag ke raaj eisane log ke hei.

⁴Dhann hei ulog jon dukhi hei ulog ke saanti mili.

⁵Dhann hei ulog jon naram dil ke hei kaahe ke ulog dharti ke hakdaar hoiyeñ

⁶Dhann hei ulog jon dharam ke waaste bhuuka aur pyaasa hei kaahe ke ulog ke sab cheej mil jaai.

⁷Dhann hei ulog jon dayaalu hei kaahe ke ulog pe bhi daya kara jaai!

⁸Dhann hei ulog jon ke dil safa hei kaahe ke ulog Parmeshwar ke dekhi.

⁹Dhann hei ulog jon sab ke milaay waala rahe hei, kaahe ke u Parmeshwar ke laṛka kahaai!

¹⁰Dhann hei ulog jon achchha kaam ke waaste sataawa jaay hei kaahe ke swarag ke raaj weisane log ke khaatir hei.

¹¹Dhann hei tum log, jab admi log hamaar khaatir tumme sataai aur tumhaar waaste jhuuṭ aur kharaab kharaab baat boli, kaahe ke tum hamaar khaatir kaam karta hei.

¹²Khusi raho, tumme swarag meñ baṛa fal mili. Bahut roj pahile nabi log ke, admi log yahi rakam se sataain raha

¹³Tum dharti pe sab ke waaste neemak ke rakam hei. Jab neemak ke sawaad nai rahe jaay hei tab u khaana ke keise sawaad kari? Uske to khali feka aur kachra jaai.

¹⁴Tum puura dunia meñ ek batti ke rakam hei. Agar pahaaṛ pe basti hei, to u luke nai sake hei.

¹⁵Batti baar ke koi hañḍi ke nichche nai rakkhe hei, lekin uske uchcha jagha pe rakkha jaay hei ki u ghar meñ sab log ke añjora de saki.

¹⁶Aapan batti admi log ke saamne chamkan deo, ki jisse sab koi tumhaar achchha kaam dekh le aur tum aapan Pita jon swarag meñ hei uske naam ke baṛaai karo.

¹⁷I nai samajhna ki ham nabi log ke likhaan ruuls aur Maozas ke kaanuun ke khatam kare aaya hei. Ham uske khatam kare nai lekin puura kare aaya hei.

¹⁸Swarag aur dharti miṭ jaay sake hei. Lekin ham promis karta hei ki ek koma ya fulsṭop kaanuun se gaayab nai hoi. Jon sab likhaan hei, uske puura hoy ke hei.

¹⁹Agar tum koi ek chhoṭa aur khaas hukum ke nikaar dega aur dusra ke yahi sikhaayga to tum swarag meñ sab se chhoṭa kahaayga. Lekin agar tum ruuls ke maanega aur uske ijjat karke sab ke sikhaayga, tab tum swarag meñ mahaan maana jaayga.

²⁰Agar tum Farisi aur agua log se baṛh ke ruuls nai paalan karega to swarag ke raaj meñ kabhi nai jaay sakega.

²¹Tum janta hei ki ham log ke purania log ke bataawa gay raha ki hatya nai karna, aur jon koi khuun kari uske koṭ meñ saja mili.

²²Lekin ham i promis karta hei ki agar tum koi pe gussa kara tab uske mukadma meñ aay ke paṛi. Aur agar tum koi ke beokuuf bolega tab bhi tumme koṭ le jaawa jaai. Aur agar tum koi ke bekaar bolega, tab tumme narak ke aagi meñ saja mili.

²³Tab agar tum aapan daan, bedi pe chaṛhaaywaala hei aur tumme yaad aais ki koi tum se gussa hei, tab aapan daan wahi bedi pe chhoṛ deo.

²⁴Aur jaay ke pahile usse milo, fir aay ke aapan daan Parmeshwar ke chaṛhaao.

²⁵Koṭ meñ le jaay se pahile, tum dos lagaay waala admi se dosti kar leo. Agar tum i nai karega, tab tumme jaj ke haath meñ de dewa jaai aur u tumme eisan ofisa ke haath meñ de dei ki u tumme jel meñ bhej dei

²⁶Ham tumme bataata hei ki jab tak tum aapan karja ke ek ek senṭ bhar nai dega, tab tak tum huañ se nikre nai paayga.

²⁷I to tum suna hei ki jon bola gais hei, “Tum aḍalṭri nai karna.”

²⁸Lekin ham tumme bataata hei, agar tum dusra aurat ke kharaab najar se dekhega, to tum aapan bichaar meñ gir gaya hei.

²⁹Yahi khaatir agar tumhaar raaiṭ aañkhi tum se paap karaay hei to uske nikaar ke feñk deo, kaahe ke tumhaar khaatir yahi ṭheek hei ki tumhaar deñhi ke ek hissa gawaay deo naa ki puura deñhi ke narak meñ jhok dewa jaay.

³⁰Agar tumhaar raaiṭ haath se paap hoy jaay to uske kaaṭ ke feñk deo, kaahe ke tumhaar waaste yahi achchha hei ki tumhaar ek hissa naas hoy jaay aur tumhaar puura deñhi narak meñ nai chhoṛa jaay.

³¹Tumme i bhi bataawa gay hei ki agar ek admi aapan aurat chhoṛe hei to uske ḍivos ke noṭis likh ke de ke paṛi.

³²Lekin ham tumme i bataata hei ke aapan aurat ke nai chhoṛo jab tak ki u koi bhayaanak sekshual paap nai kari. Agar tum uske chhoṛ dega to tum uske aage faitful nai rahega, aur jon koi bhi uske sañghe saadi kari, u bhi faitful nai rahi.

³³Tum suna hei ki tumhaar baap daada se i bataawa gay raha, “Kabhi Prabhu ke naam leke jhuuṭa kasam nai khaana, jabtak uske puura nai kare paayga.”

³⁴Lekin ham tumme i bataata hei ki kabhi swarag ke kasam nai khaana! Kaahe ke swarag, Parmeshwar ke siñghaasan hei.

³⁵Naa to dharti ke, kaahe ke dharti Parmeshwar ke goṛ ke peeṛha hei, naa to Yarushalam ke, kaahe ke u bhi baṛa raaja log ke siṭi hei.

³⁶Aapan muuṛ ke bhi kasam nai khaana kaahe ke tum aapan ek baar ke bhi kariya ya ujjar nai kare sakta hei.

³⁷Jab tum promis karo to, “Haañ ya naa” meñ hoy ke chaahi. Isse jaada sab saitaan ke bagal se aay hei.

³⁸Jeise ki tumme bataawa gay hei ki, “Aañkhi ke badle aañkhi aur daañt ke badle daañt.”

³⁹Lekin ham tum se bataata hei ki agar tumme koi kuchh kare to tum badla nai lena, agar koi tumhaar raaiṭ gaal pe thappaṛ maare to tum aapan lefṭ gaal de dena.

⁴⁰Agar koi mukadma karke tumhaar sheṭ le maañge to tum uske aapan koṭ bhi de dena.

⁴¹Agar koi jabarjasti tumme ek maael bojha ḍhowaay to tum dui maael uske bojha ḍhoy lena.

⁴²Agar tum se koi cheej koi maañge to uske de deo. Agar koi udhaar maañge to karja de deo.

⁴³Tum log i suna hei ki bola gay hei, “Aapan paṛosi se prem karo aur aapan dusman se dusmani karo.”

⁴⁴Lekin ab ham tum se bolta hei ki aapan dusman se prem rakkho aur jon tumme sataay hei uske waaste preya karo.

⁴⁵Isse tum aapan swarag ke Pita ke laṛkan ban jaayga. Kaahe ke u achchha aur kharaab duuno pe suuraj chamkaay hei, aur achchha aur kharaab duuno pe paani barsaay hei.

⁴⁶Agar tum khali wahi se prem karega jon tum se prem kare hei, to tumhaar waaste kaa faayda? Yahi rakam to ṭeks baṭorewaala bhi kare hei.

⁴⁷Aur agar tum aapan yaar dost se khali baat karega, to kon baṛa kaam kara? Eisehiyeñ to aur sab abiswaasi bhi kare hei.

⁴⁸Yahi khaatir tum wahi rakam kaam karo, jeise tumhaar swarag ke Pita kaam kare hei