Read Hindi, Fiji Methiu 6 Bible Online

Methiu 6 - Hindi, Fiji bible

Methiu 6

¹Saaodhaan raho! Sab log ke dekhaay ke khaatir aapan dharam ke kaam nai karo, kaahe ke tum aapan swarag ke Pita se fal nai paayga.

²Jab tum koi gareeb ke daan deo, to dekhaawe ke khaatir nai deo, jeise ki ḍhoñgi, sabhaghar aur rasta meñ kare hei, ki jisse sab log ulog ke baṛaai kari. Ham tumme bataata hei ki ulog aapan fal paay leen hei.

³Lekin jab tum koi gareeb ke madat karta hei ya daan deta hei tab koi ke janaao nai ki tum kaa deta hei.

⁴I rakam tumhaar daan seekraṭ rahi aur tumhaar Pita jon sab jaane hei, tumme fal dei.

⁵Jab tum preya karo to ḍhoñgi log ke rakam nai karo, kaahe ke sab log dekhaay ke waaste chech meñ aur rasta pe khaṛa hoy ke preya kare ke laaik kare hei, lekin ham tum se sachche bolta hei ki ulog aapan fal paay leen hei.

⁶Jab tum preya karo to aapan ruum meñ jaay ke palla band kar leo aur akele meñ aapan Pita se preya karo. Tumhaar Pita, jon akele meñ bhi dekhe hei, tumme fal dei.

⁷Jab tum preya karo to ulog ke rakam nai dohraao jon Parmeshwar ke nai jaane hei. U log samjhe hei ki lamba lamba preya kare se Parmeshwar ulog ke suni.

⁸Ulog ke rakam nai bano. Tumhaar Pita tumhaar maañge se pahile jaane hei ki tumme kaa jaruuri hei.

⁹Tum i rakam se preya karo, E hamaar Pita tum jon swarag meñ hei tumhaar naam pawitr maana jaay

¹⁰Tumhaar raaj aawe aur tumhaar ichchha jeise swarag meñ puura hoy hei weisaiyeñ dharti pe bhi hoy.

¹¹Aaj ke waaste hamme roṭi deo

¹²Hamaar galti maaf kar deo, jeise ham bhi aapan apraadhi log ke maaf kara hei.

¹³Ṭesṭ se hamme duur rakkho aur hamme buraai se bachaao.

¹⁴Agar tum dusra ke paap maaf karega, to tumhaar swarag ke Pita bhi tumme maaf kari.

¹⁵Lekin agar tum dusra ke paap nai maaf karega, to tumhaar Pita bhi tumhaar paap nai maaf kari.

¹⁶Ḍhoñgi log ke rakam muh banaay ke upwaas nai karo. Ulog aapan muh banaay le hei jisse sab log i jaane ki ulog upwaas kare hei. Ham tum log se sachche bataata hei ki ulog aapan fal paay leen.

¹⁷Jab tum upwaas karo, to aapan muuṛ meñ tel lagaao aur haath muh dhoy leo.

¹⁸Jisse sab log nai lekin khali tumhaar Pita jon dekhaawe nai hei, dekhi ki tum upwaas rakkha hei. Tumhaar Pita jon akele meñ sab cheej dekhe hei, tumme fal dei.

¹⁹Dharti pe aapan waaste dhan nai jama karo, jahañ murcha pakaṛ le hei, kirwa khaay hei aur chor choraay le hei.

²⁰Swarag meñ aapan waaste dhan jama karo, jahañ pe naa to murcha lage hei, naa kirwa paṛe hei aur naa to chor lage hei.

²¹Kaahe ke jahañ tumhaar dhan hei wahiñ tumhaar dil bhi laga rahi.

²²Tumhaar aañkhi tumhaar deñhi ke khaatir ek batti ke rakam hei. Jab u achchha hei, tab tumhaar puura deñhi meñ ujera rahi.

²³Lekin agar tumhaar aañkhi kharaab hei to tumhaar puura deñhi meñ añdhera rahi, yahi kaaran jon batti tum meñ hei, agar usman ujera nai hei to tum ketna baṛa añdhera meñ hei.

²⁴Koi bhi admi dui maalik ke sewa nai kare sake hei. U ya to ek se dusmani rakkhi aur dusra se prem kari, ya to ek ke maani aur dusra ke nai maani. Tum Parmeshwar aur sikka (peisa), duuno ke ek sañghe sewa nai kare sakta.

²⁵Ham tum log se bolta hei ki tum aapan jindagi ke khaatir wari nai karo, ki ham kon cheej khaayga aur kon cheej piyega aur kaa pahinega. Kaa tumhaar jaan, khaana aur kapṛa se baṛa nai hei?

²⁶Asmaan meñ chiṛia ke dekho, ulog naa to kuchh bowe hei aur naa kaaṭe hei, aur naa to khet meñ baṭore hei, to bhi tumhaar swarag ke Pita ulog ke khawaay hei. Kaa tum u sab se baṛh ke nai hei?

²⁷Kaa wari karke koi aapan umar baṛhaay sake hei?

²⁸Aur kaahe ke kapṛa ke waaste wari karta hei? Dekho jañgli fuul keise baṛhe hei. U naa to mehnat kare hei, aur naa to kapṛa siye hei?

²⁹Fir bhi ham tumme bataata hei ki Soloman aapan puura dhan daulat se bhi ekko ke baraabri nai kare sakis.

³⁰Parmeshwar jab khet ke graas jon aaj hei aur kal chuulha meñ jhok dewa jaai, uske eisan kapṛa pahinaay hei, to, E muurakh log, kaa u tumme nai pahinaai?

³¹Yahi ke maare ham tum se bolta hei ki wari nai karo ki, “Ham kaa khaai, kaa pee aur kaa pahini?”

³²Kaahe ke i sab cheej ke chinta jon Parmeshwar pe biswaas nai kare hei, ulog kare hei. Tumhaar swarag ke Pita jaane hei ki tumme kon sab cheej ke jaruurat hei.

³³Tum sab se pahile Parmeshwar ke raaj aur uske dharam ke khoj meñ laga raho, aur i sab bhi tumme mil jaai.

³⁴To kal ke waaste wari nai karo. Kaahe ke kal ke chinta apne aap suljhaay jaai. Tumhaar waaste aaj ke chinta kaafi hei.