Read Hindi, Fiji Methiu 7 Bible Online

Methiu 7 - Hindi, Fiji bible

Methiu 7

¹Dusra pe dos nai lagaao, ki jisse Parmeshwar tum pe bhi dos nai lagaai.

²Jon rakam tum dusra pe dos lagaayga wahi rakam Parmeshwar bhi tum pe dos lagaai. Jeise tum dusra ke sañghe karega, weisaiyeñ tumhaar sañghe bhi hoi.

³Jab tumme aapan aañkhi ke dhabba ke pata nai, to tum aapan bhaiya ke aañkhi ke meila kaahe dekhta hei?

⁴Jab tumhaar aañkhi meñ dhabba hei tab tum aapan bhaiya se keise bolega, “Ham tumhaar aañkhi ke meila ke nikaar dei.”

⁵Are ḍhoñgi! pahile aapan aañkhi meñ se dhabba nikaaro tab aapan bhaai ke aañkhi ke meila ṭheek se nikaare sakega.

⁶Pawitr cheej kutta log ke nai deo. Ulog khali ghuum ke aṭek kari. Moti suar ke aage nai feko. Ulog uske aapan goṛ ke nichche kachar dei.

⁷Maañgo to tumme dewa jaai, khojo to tumme mili, nok karo to tumhaar khaatir khola jaai.

⁸Yahi khaatir jon koi maañge hei, uske mile hei, aur jon khoje hei u paawe hei, aur jon nok kare hei uske khaatir khola jaai.

⁹Agar tumhaar laṛka tum se roṭi maañgi to tum meñ se eisan kon hei jon uske patthar dei?

¹⁰Ya machhri maañgi, to uske saañp dei?

¹¹Kharaab hoy pe bhi agar tum log aapan laṛkan ke achchha achchha cheej deta hei, to tumhaar swarag ke Pita maañge waala ke achchha achchha cheej kaahe nai dei?

¹²Jeise tum mañgta hei ki dusra log tumhaar sañghe kare, weisaiyeñ tum bhi uske sañghe karo. Yahi Maozas ke niyam aur nabi log ke ṭeeching ke matlab hei.

¹³Patra rasta se halo. Chauṛa rasta u rasta hei jon bahut sahaj hei, aur wahi rasta museebat ke bagal le jaay hei, aur bahut log yahi rasta pe chale hei.

¹⁴Lekin patra rasta kaṛa rasta hei aur wahi rasta jeewan ke paas le jaai, aur i khali thoṛa log ke mile hei.

¹⁵Jhuṭṭa nabi log se husiaar rahna! Ulog bheṛa ke bhes meñ tumhaar lage aawe hei, lekin u bhittar se jañgli bheṛiya rahe hei.

¹⁶Ulog ke fal se tum ulog ke jaan lega. Kaa kabhi kaaṭa waala peṛ se añguur aur anjeer (fig) fare hei?

¹⁷Yahi rakam sab achchha peṛ achchha fal dewe hei aur kharaab peṛ kharaab fal dewe hei.

¹⁸Achchha peṛ kharaab fal nai de sake hei aur naa kharaab peṛ achchha fal.

¹⁹Jon peṛ achchha fal nai dewe, uske kaaṭ ke aagi meñ feñk dewa jaay hei.

²⁰Yahi waaste ulog ke fal se tum ulog ke jaan lega.

²¹Jon log hamme “He Prabhu! He Prabhu” bole hei, ulog meñ sab ke sab swarag raaj meñ nai jaay saki, lekin ulog jon hamaar swarag ke Pita ke ichchha pe chale hei wahi log swarag ke raaj meñ jaay saki.

²²Nyaay ke roj bahut log ham se boli, “He Prabhu! Kaa ham tumhaar naam se parchaar nai kara? Kaa ham tumhaar naam leke saitaan nai nikaara aur bahut jaada chamatkaar nai dekhaaya?”

²³Lekin ham ulog ke bataayga, “Ham tum log ke nai janta. Dushṭ log hamaar saamne se duur hoy jaao!”

²⁴Jon hamaar i baat sune hei aur uspe chale hei, u ek samajhdaar admi ke rakam hei jon aapan ghar chaṭṭaan pe banaais hei.

²⁵Paani barsis, nadi meñ baaṛh aais, aañdhi chalis aur u ghar se ṭakraais. Tab bhi u ghar nai gira, kaahe ke u ghar ke faaunḍeishan, chaṭṭaan pe gaaṛa gay raha.

²⁶Jon koi hamaar i baat sune hei, lekin uspe nai chale hei, u ek muurakh ke rakam hei, jon baalu pe aapan ghar banaais.

²⁷Paani barsis, nadi meñ baaṛh aais, aañdhi chalis aur u ghar se ṭakraais. U ghar gir gais aur barbaad hoy gais.

²⁸Jab Yeeshu i sab baat kar ke khalaas kar dees, to bheeṛ uske updes se chakit hoy gain.

²⁹Kaahe ke u Maozas ke kaanuun ke ṭeecha log ke rakam nai lekin adhikaar se sikhaat raha.