Read Hindi, Fiji Methiu 8 Bible Online

Methiu 8 - Hindi, Fiji bible

Methiu 8

¹Jab Yeeshu pahaaṛ se nichche aais, tab uske pichchhe ek baṛa bheeṛ hoy lees.

²Wahi lage ek admi jiske koṛhi ke bimaari raha, Yeeshu ke saamne aay ke aur jhuk ke Yeeshu se bolis, “He Prabhu agar tum maañgo to hamme achchha kare sakta hei.”

³Yeeshu aapan haath uspe rakh ke bolis, “Ham mañgta hei ki tum achchha hoy jaao.” aur wahi lage u achchha hoy gay.

⁴Tab Yeeshu usse bolis, “Dekho, tum koi se iske baare meñ nai bataana, aur jaay ke aapan paadri ke dekhaao. Aur jaao, Maozas ke ruuls ke mutaabik aapan daan chaṛhaao, ki jisse tum sab ke khaatir gawaah ban jaao.”

⁵Jab Yeeshu Kafarnahuum ke ṭaaun meñ aais raha, tab ek aami ke ofisa uske lage aay ke binti kare laga,

⁶“He Prabhu, hamaar naukar ghar meñ bahut kaṛa peeṛa ke maare hile bhi nai sake hei.”

⁷Yeeshu usse bolis, “Ham aay ke uske ṭheek kar dega.”

⁸Lekin ofisa bolis, “He Prabhu ham to i laaik bhi nai hei ki tum hamaar ghare aao. Tum muh se khali bol deo to hamaar naukar achchha hoy jaai.

⁹Ham bhi to koi baṛa ofisa ke nichche hei aur hamaar nichche bhi saulja log hei. Jab ham ek se bolta hei, ‘Jaao!’ to u jaay hei aur dusra se bolta hei, ‘Aao!’ to u aawe hei. Aapan naukar se bolta hei ki, ‘I karo’ to u kar de hei.”

¹⁰Jab Yeeshu i baat sunis to chakit hoy gais aur jon sab uske pichchhe aat rahin, ulog se bolis, “Ham sachche bolta hei ki Israayel meñ ham aur koi admi meñ etna biswaas nai dekha!

¹¹Bahut log aiheñ aur Abraham, Aayzak aur Jeims ke sañghe swarag ke raaj meñ beiṭhi.

¹²Lekin ulog jon ke huañ hoy ke chaahi, ulog ke añdhera meñ feñk dewa jaai, huañ pe ulog roi aur daañt peesi.”

¹³Tab Yeeshu ofisa se bolis, “Jaao, jeisan tumhaar biswaas hei, weisaiyeñ tumhaar waaste hoi.” Uske naukar wahi ṭaaim achchha hoy gais.

¹⁴Yeeshu Peeṭa ke ghare gais, to huañ u dekhis ki Peeṭa ke saas bahut bukhaar se bimaar hoy ke leṭi hei.

¹⁵Yeeshu uske haath aapan haath meñ lees aur uske bukhaar utar gais. Aur u uṭh ke Yeeshu ke sewa kare lagis.

¹⁶Sanjha ke ṭaaim Yeeshu ke lage bahut log laawa gain jon meñ saitaan rahin. Aur Yeeshu saitaan ke aapan vachan se nikaar dees aur sab bimaar log ke achchha kar dees.

¹⁷Ki jisse Aayzaaya nabi jon cheej bolis raha, u sab puura hoy, “U hamlog ke bimaari ṭheek karis aur hamlog ke achchha banaais.”

¹⁸Jab Yeeshu aapan chaaro bagal baṛa bheeṛ dekhis, tab chela log ke laik ke u paar jaay ke bolis.

¹⁹Tab ek kaanuun ke guru uske lage aay ke bolis, “He guru, tum jahañ bhi jaayga, ham tumhaar pichchhe chalega.”

²⁰Yeeshu jawaab dees, “Lomṛi ke ghar aur chiṛia ke ghosla hoy hei, lekin Manush ke laṛka ke khaatir muuṛ rakkhe ke bhi jagha nai hei.”

²¹Ek aur chela usse bolis, “He Prabhu, hamme mauka deo ki ham aapan bappa ke pahile jaay ke maṭṭi de dei.”

²²Yeeshu bolis, “Tum hamaar pichchhe aao, murda log ke aapan murda gaaṛan deo.”

²³Yeeshu bauṭ pe chaṛh gais aur uske chela log bhi sañghe hoy leen.

²⁴Wahi lage laik meñ eisan baṛa tufaan aais ki bauṭ ḍuube lagis. Lekin Yeeshu to sowat raha.

²⁵Chela log uske lage aay ke uske jagaain, aur bole lagin, “He Prabhu, ham log ke bachaay leo, ham log ḍubta hei!”

²⁶Yeeshu ulog se bolis, “Tum log kaahe ke ḍarta hei? Tumhaar biswaas kahañ hei?” Tab u uṭh ke paani aur hawa ke ḍaaṭis aur sab saanti hoy gais.

²⁷Aur sab log chakit hoy gain aur bole lagin, “I keisan admi hei ki iske hukum aañdhi aur tufaan bhi maane hei?”

²⁸Jab Yeeshu laik ke u paar Gadara ke des meñ gais, to dui admi jisman saitaan rahin, kabar se nikar ke usse milin. I saitaan etna kharaab raha ki u rasta se koi bhi jaay nai sakat raha.

²⁹Ulog chillaay ke bolin, “He Parmeshwar ke laṛka, tumme ham se kaa kaam hei? Kaa tum ṭaaim se pahile hamme saja dewe aaya hei?”

³⁰Thoṛa duur pe ek suar ke jhunḍ charat rahin.

³¹Saitaan log Yeeshu se binti karin, “Agar tum hamme bahire nikaarega, to i suar ke jhunḍ meñ bhej deo.”

³²Yeeshu bolis, “Jaao!” Aur u sab nikar ke suar meñ ghus gain. Wahi lage suar ke jhunḍ uchcha karaar pe se jhapaṭ ke paani meñ ḍuub gain.

³³Aur suar ke charaay waala huañ se bhaag ke ṭaaun meñ jaay ke sab kuchh bataain, aur duuno admi ke baare meñ bhi bataain jon ke saitaan pakṛis raha.

³⁴Ṭaaun ke sab log Yeeshu se mile aain. Aur uske dekhte usse binti karin ki u huañ se bahire nikar jaay.