Read Hindi, Fiji Methiu 9 Bible Online

Methiu 9 - Hindi, Fiji bible

Methiu 9

¹Yeeshu bauṭ meñ beiṭh ke u paar aapan gaaoñ meñ gais.

²Huañ pe kuchh log ek lakwa se bimaar admi ke khaṭia pe rakh ke Yeeshu ke lage laain. Yeeshu ulog ke biswaas dekh ke u bimaria se bolis, “Hamaar dost, wari nai karo! Tumhaar paap maafi hoy gay hei.”

³I sun ke Maozas ke kaanuun ke guru log apne meñ bolin, “I Parmeshwar ke buraai kare hei.”

⁴Yeeshu ulog ke man ke baat jaan ke bolis, “Tum log aapan man meñ etna kharaab kaahe ke sochta hei?”

⁵Sahaj kon cheej hei? I bole ke ki tumhaar paap maafi hoy gais ki i bole ke ki uṭho aur chalo firo.

⁶Lekin tum sab ke dekhaayga ki Manush ke laṛka ke hak mila hei ki u dunia meñ paap ke maaf kare.” Aur Yeeshu u admi se bolis, “Aapan khaṭia uṭhaao aur aapan ghare chala jaao.”

⁷U uṭh ke aapan ghare chala gais.

⁸I dekh ke sab log ḍar gain aur Parmeshwar ke gun gaay lagin jon admi ke eisan kaam kare ke hak dees hei.

⁹Jab Yeeshu huañ se chala gais, tab aage baṛh ke u Methiu naam ke ek admi ke ṭeks baṭorewaala kursi pe beiṭha dekhis. Yeeshu usse bolis, “Hamaar pichchhe aao.” Methiu uṭhis aur Yeeshu ke pichchhe hoy lees.

¹⁰Aur jab Yeeshu Methiu ke ghare khaana khaay laga tab aur dusra ṭeks baṭorewaala log aur kuchh paapi aur chela log bhi huañ uske sañghe khaana khaay lagin.

¹¹I sab dekh ke Farisi log uske chela log se bolin, “Tumhaar guru, ṭeks baṭorewaala aur paapi log ke sañghe kaahe khaay piye hei?”

¹²Yeeshu i sab sun ke ulog se bolis, “Bhala changa log ke ḍokṭa ke jaruurat nai howe hei lekin bimaria log ke jaruur howe hei.

¹³Yahi khaatir tum jaay ke seekho jab Baaibal bole hei, ‘Ham bali nai mañgta hei, lekin dusra ke uppar daya karo.’ Ham achchha log ke nai lekin paapi log ke bolaay aaya hei.”

¹⁴Tab ek roj Yuhanna Baptisma de waala ke chela log Yeeshu ke lage aay ke bole lagin, “Kaa kaaran hei ki ham aur Farisi etna upwaas rakhta hei, lekin tumhaar chela log to nai rakkhe hei?”

¹⁵Yeeshu ulog se bolis, “Jab tak dulha baraati ke sañghe rahe hei, kaa ulog dukh meñ rahe hei? Nai. Lekin ek roj aai jab dulha ulog se alag hoy jaai aur u ṭaaim ulog upwaas rakhiyeñ.

¹⁶Nawa kapṛa se puraana kapṛa pe chakti koi nai lagaawe hei, kaahe ke u chakti khichaay jaay hei aur kapṛa faṭ jaay hei.

¹⁷Aur nawa añguur ke ras bhi puraana chamṛa ke jholi meñ nai bhara jaay hei, kaahe ke eise kare se chamṛa ke jholi faṭ jaai. Lekin haañ, taaja añguur ke ras nawa jholi meñ bhara jaay hei, yahi kaaran duuno ṭheek rahe hei.

¹⁸Jab Yeeshu ulog se baat karat raha, tab ek ofisa aay ke uske saamne ghuṭna pe gir ke bolis, “Hamaar laṛki abhi abhi maris hei, lekin agar tum chal ke aur aapan haath uspe rakh deo to u jinda hoy jaai.”

¹⁹Yeeshu uṭh ke aapan chela log ke leke uske sañghe chal paṛis.

²⁰Ek aurat jiske baarah saal se khuun bahat raha, pichchhe se aay ke Yeeshu ke kapṛa chhui lees.

²¹U aapan man meñ bolat rahis, “Agar ham khali uske kapṛa chhui lei to achchha hoy jaayga.”

²²Yeeshu pichchhe ghuum ke uske dekhis aur bolis, “Beṭi, himmat rakkho, tumhaar biswaas tumme achchha kar dees hei.” U aurat wahi lage changi hoy gais.

²³Jab Yeeshu u ofisa ke ghare pahuñchis tab dekhis ki log gaay bajaay aur rowe hei.

²⁴U bolis, “Sab log bahire jaao! Laṛki mari nai hei. U khali sowe hei.” I baat pe sab log uske hasi uṛaay lagin.

²⁵Lekin jab bheeṛ ke bahire bhej dewa gay tab Yeeshu bhittar jaay ke laṛki ke haath pakṛis aur u jinda hoy gais.

²⁶I baat ke charcha sab des meñ feil gais.

²⁷Jab Yeeshu huañ se aage gais to dui añdha log uske pichchhe i chillaate aur bolaate aain, “E Ḍeiviḍ ke laṛka, ham pe daya karo.”

²⁸Jab u ghar meñ aais tab u dui añdha log uske lage aain. Yeeshu ulog se bolis, “Kaa tumme biswaas hei ki ham tum log ke ṭheek kare sakta hei?” Ulog bolin, “Haañ Prabhu.”

²⁹Tab Yeeshu ulog ke aañkhi chhui ke bolis, “Tumhaar biswaas ke kaaran tum achchha hoy jaayga.”

³⁰Aur ulog dekhe lagin. Yeeshu ulog ke samjhaais ki i baat koi se nai bataana.

³¹Lekin u duuno jurte huañ se nikar ke sab koi se bataay deen aur Yeeshu ke i kaam ke charcha sab des meñ feil gais.

³²Jab ulog bahire jaat rahin, to kuchh log Yeeshu ke lage ek guuñga ke laain, jisman saitaan raha.

³³Aur jab saitaan nikar gais, to guuñga bole laga. Aur sab bheeṛ chakit hoy ke bolin, “Israayel meñ to eise hote ham kabhi nai dekha.”

³⁴Lekin Farisi log bolin, “Saitaan ke sardaar iske madat kare hei aur i saitaan ke bahire nikaare hei.”

³⁵Yeeshu sab gaaoñ aur ṭaaun meñ ghuumat raha. Ulog ke meeṭing ke jagha meñ updes karte aur Parmeshwar ke raaj ke achchha khabar parchaar karte, aur ketna log ke bimaari aur rog ke duur karte raha.

³⁶Jab Yeeshu bheeṛ ke dekhis, to uske man daya se bhar gais, kaahe ke ulog dukhi aur heraan lagat rahin, ulog u bheṛa ke rakam rahin, jon ke charaay waala nai raha.

³⁷Tab u aapan chela log se bolis, “Khet paka khaṛa hei lekin kaam kare waala thoṛa hei.”

³⁸Yahi khaatir khet ke maalik se bolo ki kaaṭe ke waaste kaam kare waala bheje.