Read Hindi, Fiji Maak 1 Bible Online

Maak 1 - Hindi, Fiji bible

Maak 1

¹Parmeshwar ke laṛka, Yeeshu Maseeh ke baare meñ achchha achchha baat, jiske suru meñ weisaiyeñ bhais jeise,

²Aayzaaya nabi ke buk meñ likhaan raha, ki Parmeshwar eise bolis, “Tum se pahile ham aapan ek duut bhejta hei, u tumhaar waaste rasta taiyaar kari.”

³Ḍezaṭ meñ koi jor se chillaay ke bole hei ‘Prabhu ke waaste rasta taiyaar karo. Uske waaste rasta seedha karo!” ’

⁴Yuhanna, jon sab ke baptisma det raha, ḍezaṭ meñ aay ke sab ke bataais, “Kharaab kaam chhoṛ deo aur baptisma le leo. Tab tumhaar sab paap maaf hoy jaai.”

⁵Juḍia pardes aur Yarushalam siṭi ke bahut log Yuhanna ke lage gain. U log aapan aapan paap maan leen aur Yuhanna sab ke Joḍan nadi meñ baptisma dees.

⁶Yuhanna uuñṭ ke baar ke kapṛa pahinat raha aur kamar meñ chamṛa ke peṭi baañdhat raha. Tiḍḍi aur madh uske khaana raha.

⁷Yuhanna sab log se bolis, “Hamaar baad meñ koi bahut baṛa aawe hei. Ham to uske juuta ke bandhan bhi khole laayk nai hei.

⁸Ham to tumme paani se baptisma deta hei lekin u to tumme Pawitr Aatma se baptisma dei.”

⁹Thoṛa roj ke baad Yeeshu Galeel pardes ke Naasrat ṭaaun meñ aais aur Yuhanna se Joḍan nadi meñ baptisma lees.

¹⁰Jeise Yeeshu paani meñ se nikris, u dekhis ki asmaan khula aur Pawitr Aatma kabuttar ke rakam uske uppar aais.

¹¹Aur asmaan se i awaaj aais, “Tum hamaar pyaara beṭa hei, ham tum se bahut khusi hei.”

¹²Parmeshwar ke Aatma, Yeeshu ke jurte ḍezaṭ meñ bhej dees.

¹³U huañ chaalis (40) roj tak rahis, jahañ saitaan uske laalach dekhaay ke fasaay ke kosis karis. Yeeshu jañgli jaanwar ke beech meñ raha, lekin ainjals uske bachaay ke rakkhis raha.

¹⁴Yuhanna jab jel meñ raha, tab Yeeshu Galeel meñ jaay ke Parmeshwar ke baare meñ achchha achchha baat sunaawat raha.

¹⁵U bolis, “Ab ṭaaim aay gais hei, Parmeshwar ke raaj ekdam nagichche hei. Parmeshwar ke dil se maan leo aur uske baat pe biswaas karo.”

¹⁶Yeeshu Galeel ke laik ke kinaare ghuumat raha jab u dekhis ki Saayman aur uske bhaiya Enḍru laik meñ jaal feke hei. Ulog machhua rahin.

¹⁷Yeeshu ulog se bolis, “Aao hamaar pichchhe chalo. Ham tumme sikhaayga ki keise machhri ke jagha admi pakṛa jaai.”

¹⁸Duuno bhaiya jurte jaal feñk ke Yeeshu ke pichchhe chal paṛin.

¹⁹Yeeshu aage aage chalte gais, aur thoṛa deri meñ dekhis ki Jabdi ke laṛkan, Jeims aur Yuhanna bauṭ meñ beiṭh ke aapan jaal banaawe hei.

²⁰Yeeshu duuno ke bolaais aur ulog aapan bappa Jabdi ke naukar log ke sañghe bauṭ meñ chhoṛ ke Yeeshu ke sañghe hoy leen.

²¹Yeeshu aur uske chela log Kafarnahuum ṭaaun gain. Aawe waala sabat ke roj Yeeshu Yahuudi log ke Mandir meñ jaay ke parchaar kare laga.

²²Sab log uske parchaar sunke ghabraay gain aur bolin ki i to shaastri log ke rakam nai lekin adhikaar se bole hei.

²³Thoṛa deri meñ ek admi aais jiske bhuut pakṛis raha. U jor se chillaais,

²⁴“Naasrat ke rahe waala Yeeshu, ham se tumhaar kaa kaam hei? Kaa tum mañgta hei ki ham log barbaad hoy jaai? Ham janta hei tum kon hei! Tum Parmeshwar ke bagal se koi Pawitr jan hei.”

²⁵Yeeshu ḍaaṭ ke bolis, “Chuppe raho aur i admi meñ se nikar jaao.”

²⁶Dushṭ Aatma u admi ke baṛa jor se hilaais aur chillaay ke usman se nikar ke bhaag gais.

²⁷I sab dekh ke sab log ghabraay gain. U log apne meñ batiaay lagin, “I kon cheej hei? I to baṛa jor tor se nawa rakam ke parchaar suru kar dees hei. Dushṭ aatma bhi iske baat sune hei.”

²⁸Galeel meñ chaaro taraf Yeeshu ke naam feile lagis.

²⁹Yeeshu aapan chela log, Jeims aur Yuhanna ke sañghe leke Mandir se nikris, aur seedha Saayman aur Enḍru ke ghare gais.

³⁰Saayman ke saas ke bukhaar lagat raha. Yeeshu jeise huañ pañhuchis, log uske i baat bataais.

³¹Yeeshu nagichche gais, aur haath pakaṛ ke uske uṭhaais, uske bukhaar utar gais aur u sab ke sewa kare lagis.

³²Suuraj ḍuub gais raha, aur sanjha hoy gais raha, to admi log bimaria log ke aur jis ke bhuut pakṛis raha, Yeeshu ke lage laain.

³³Ṭaaun bhar ke log ghar ke duaari pe jama hoy gain.

³⁴Ulog ke paas rakam rakam ke bimaari raha aur Yeeshu sab ke achchha kar dees. Ketna log ke to bhuut pakṛis raha, aur Yeeshu u bhuut log ke khader ke bahire nikaaris aur bhuut log kuchh bole nai paain kaahe ke ulog Yeeshu ke jaanat rahin.

³⁵Ekdam sabere Yeeshu uṭh ke ṭaaun se duur akele jagha meñ preya kare ke waaste ghar se chala gais.

³⁶Saayman aur uske saathi log Yeeshu ke khoje nikrin.

³⁷Jab ulog Yeeshu se milin, tab bolin, “Sab log tumme khoje hei.”

³⁸Yeeshu ulog se bolis, “Aao ham nagichche ke aur gaaoñ meñ parchaar kari kaahe ke ham yahi ke waaste aaya hei.”

³⁹Yeeshu Galeel meñ ghuum ghuum ke Yahuudi ke Mandir meñ parchaar karis aur bhuut ke bhagaais.

⁴⁰Ek admi jiske paas koṛhi ke bimaari raha, Yeeshu ke lage aais, aur ghuṭna ṭek ke chirauri karis, “Agar tum maañgo, to hamme achchha kare sakta hei.”

⁴¹Yeeshu ke uspe daya aay gais aur aapan haath uṭhaay ke uske uppar rakkhis aur bolis, “Ham mañgta hei ki tum achchha hoy jaao.”

⁴²Jurte bimaari bhaag gais aur u admi achchha hoy gais.

⁴³Tab Yeeshu uske ek kaṛa chetaaoni deke bhejis, “Dekho, i baat koi se nai bataana.

⁴⁴Aapan paadri ke lage jaao aur dekhaao, aur fir jeise Maozas bataais hei weise Mandir meñ bheñṭ chaṛhaao jisse sab koi jaane sake ki tum achchha hoy gaya hei.”

⁴⁵U bahire jaay ke chuppe nai rahe paais aur sab log se i baat bataay dees. Yahi kaaran se Yeeshu bahut ghuume nai paais aur ṭaaun se duur chala gais, fir bhi log chaaro taraf se uske lage aate rahin.