Read Hindi, Fiji Maak 10 Bible Online

Maak 10 - Hindi, Fiji bible

Maak 10

¹Huañ se uṭh ke Yeeshu Joḍan nadi ke paar Juḍia ke gaaoñ meñ aais. Ek baṛa bheeṛ fir uske nagichche aay gain aur u aapan reeti riwaaj ke rakam ulog ke fir sikhaay laga.

²Tab kuchh Farisi Yeeshu ke lage aain aur uske ṭesṭ kare ke waaste sawaal puuchhin, “Kaa i ṭheek hei ki admi aapan aurat ke ḍivos de?”

³Jawaab meñ Yeeshu ulog se puuchhis, “Maozas ke kaanuun tumme kaa kare ke bataawe hei?”

⁴Ulog bolin, “Maozas ke kaanuun ke mutaabik, noṭis likhe ke baad ḍivos dewa jaay sake hei.”

⁵Yeeshu ulog se bolis, “Tumhaar kaṛa man ke kaaran Maozas i ruuls tumme dees hei.

⁶Lekin jab se dunia bana hei, Parmeshwar admi aur aurat ke banaais hei.

⁷Yahi kaaran admi aapan maañ-baap se alge hoy ke aapan aurat ke sañghe rahi, aur ulog ek hoy jahiyeñ.

⁸Ab ulog dui nai lekin ek deñhi hei.

⁹Yahi ke waaste jiske Parmeshwar joṛis hei, uske koi admi alag nai kare.”

¹⁰Ghar meñ chela log iske baare meñ Yeeshu se fir puuchhin.

¹¹Yeeshu ulog se bataais, “Jon aapan aurat ke chhoṛ ke dusra aurat se saadi kare hei, u aapan aurat ke sañghe aḍalṭri kare hei.

¹²Aur agar aurat aapan admi ke chhoṛ ke dusra admi se saadi kare hei, to u bhi aḍalṭri hei.

¹³Kuchh log chhoṭa laṛkan ke Yeeshu ke lage laain, ki Yeeshu ulog ke uppar haath rakkhe, lekin chela log ulog ke ḍaaṭis.

¹⁴Yeeshu jab i dekhis to gussaay ke ulog se bolis, “Laṛkan ke hamaar lage aawe deo aur ulog ke roko nai, kaahe ke Parmeshwar ke raaj eisane log ke hei.

¹⁵Ham tum se sachche bataata hei, agar koi admi Parmeshwar ke raaj ke chhoṭa bachcha ke rakam apnaay nai hei, to u raaj ke u nai paay saki.”

¹⁶Tab Yeeshu laṛkan ke godi meñ lees, ulog ke muuṛ pe haath rakkhis, aur aasheesh dees.

¹⁷Jab Yeeshu rasta pe jaawat raha, tab ek admi dauṛ ke aais aur ghuṭna ṭek ke usse puuchhis, “He achchha guru, anant jeewan paay ke waaste ham kaa kari?”

¹⁸“Tum hamme achchha guru kaahe ke bolta hei?” Yeeshu jawaab dees. “Parmeshwar ke chhoṛ ke aur koi achchha nai hei.

¹⁹Tum to sab ruuls janta hei. ‘Koi ke jaan nai lena, byabhichaar nai karna, chori nai karna, jhuuṭ ke gawaahi nai dena, chhal nai karna, aapan amma aur bappa ke aadar karna.” ’

²⁰“He guru,” u admi bolis, “I sab ruuls to ham chhoṭa se maante aaya hei.”

²¹Tab Yeeshu uske bagal dekhis, aur pyaar se bolis, “Tum meñ khali ekke kami hei. Jaao jon kuchh tumhaar lage hei, u sab ke bech ke gareeb log ke de deo, aur tumme swarag meñ dhan mili, tab aay ke hamaar pichchhe hoy leo.”

²²Jab u i baat sunis, tab uske chehra ekdam udaas hoy gais, aur u dukhi hoy ke chala gais, kaahe ke u ek bahut dhani admi raha.

²³Yeeshu sab taraf dekh ke aapan chela log se bolis, “Dhani log ke Parmeshwar ke raaj meñ jaay ke waaste ketna kaṛa hei!”

²⁴Chela log i baat ke sun ke hairaan hoy gain, ispe Yeeshu fir se bolis, “Hamaar bachcha log, jon peisa pe bharosa rakkhe hei, ulog ke khaatir Parmeshwar ke raaj meñ jaay ke waaste bahut kaṛa hei!

²⁵Sui ke naake meñ se ek uuñṭ ke nikar jaay ke sahaj hei, lekin ek dhani admi ke Parmeshwar ke raaj meñ jaay ke bahut kaṛa paṛi.”

²⁶Ispe chela log bahut hairaan bhain, aur aapas meñ baat cheet kare lagin, “To fir kon bache sake hei?”

²⁷Yeeshu ulog ke bagal dekh ke bolis, “Admi log se to i hoy nai sake hei, lekin Parmeshwar se sab kuchh hoy sake hei.”

²⁸Tab Peeṭa bolis, “Dekho, ham sab kuchh chhoṛ ke tumhaar pichchhe aay gaya hei.”

²⁹Yeeshu bolis. “Ham tum se sachche bataata hei, jon koi hamaar waaste aur susamaachaar ke waaste ghar, bhaiya, bahini, maañ, baap, laṛkan bachchan ya khet chhoṛis hei,

³⁰ulog ke i janam meñ bahut mili. Ulog ke i dunia meñ sao guna jaada ghar, bhaiya, bahini, maañ-baap, laṛkan bachchan aur khet mili, lekin dukh bhi mili. Ṭaaim aay pe ulog ke anant jeewan mili.

³¹Bahut log jon abhi aage hei, pichchhe hoy jahiyeñ aur jon pichchhe hei, aage hoy jahiyeñ.”

³²Yeeshu aur uske chela log Yarushalam jaawat rahin. Yeeshu ulog ke aage raha. U sab log hairaan rahin aur ḍarat bhi rahin. Ek dafe fir Yeeshu aapan chela log ke alge le jaay ke bataawe laga, ki kon cheej uske uppar hoy waala hei.

³³Yeeshu bataais, “Dekho, ham log Yarushalam jaata hei jahañ pe Manush ke laṛka baṛa paadri aur shaastri log ke haath pakaṛwaaya jaai. Ulog uske jaan se maare ke hukum dei aur dusra jaati ke haath meñ de dehiyeñ.

³⁴Ulog uske hasi uṛaai, us pe thuuki, chaabuk maari, aur maar ḍaari, lekin teen roj ke baad u jinda hoy jaai.”

³⁵Tab Zabdi ke laṛkan Jeims aur Yuhanna, Yeeshu ke lage aain. Ulog bolin, “He guru, ham tumse mañgta hei ki jon kuchh ham maañgi, tum hamaar waaste wahi karo.”

³⁶Yeeshu puuchhis, “Tum log kaa mañgta hei?”

³⁷Ulog bolin, “Ham mañgta hei ki tum jab aapan raaj ke mahima meñ aao, tab ham log meñ se ek tumhaar raaiṭ aur dusra tumhaar lefṭ saaiḍ beiṭhi.

³⁸Yeeshu ulog ke bataais, “Tum nai janta ki tum kaa mañgta hei. Kaa tum u dukh ke pyaala piye sakega jon ham piye jaata hei? Kaa tum u baptisma le sakta hei jon ham lewe jaata hei?”

³⁹“Haañ, ham le sakta hei,” ulog bolin. Yeeshu ulog se bolis, “Jaruur tum u pyaala piega jon ham piye jaata hei, aur jon baptisma ham lewe jaata hei, u bhi tum log lega.

⁴⁰Lekin hamme i hak nai hei ki ham chune saki ki kon hamaar raaiṭ ya lefṭ saaiḍ beiṭhe. Khali Parmeshwar u jagha uske dei jiske waaste u taiyaar kara gais hei.”

⁴¹Jab das aur chela log i baat sunin, to ulog Jeims aur Yuhanna pe gussaain.

⁴²Lekin Yeeshu, sab chela log ke ek sañghe bolaay ke bolis, “Tum janta hei ki aur jaati ke log meñ jon agua hoy hei, aur usman se jon baṛa hei, u dusra log pe hak jamaay hei.

⁴³Lekin tum log eise nai karna. Agar tum meñ se koi baṛa hoy maañge hei to u tumhaar naukar bani.

⁴⁴Aur agar tumme se koi agua bane maañgi, to u sab ke naukar bane.

⁴⁵Manush ke laṛka i waaste nai aais ki sab se aapan sewa karaawe, lekin i kaaran aais ki u dusra log ke sewa kare aur sab ke bachaawe ke waaste aapan jaan de dewe.”

⁴⁶Yeeshu aur uske chela log aur ek baṛa bheeṛ Jeriko aain. Ulog jab huañ se nikrin, tab Timaai ke laṛka Bartimaais, jon ek añdha bhikhaari raha, rasta ke kinaare beiṭha raha.

⁴⁷Jab u sunis ki Yeeshu Naasri aawe hei, to u jor se chillaay ke bole laga, “E Ḍeiviḍ ke laṛka, ham pe daya karo!”

⁴⁸Bahut log uske bolin ki chuppe raho. Lekin u aur jor se chillaay laga, “Ḍeiviḍ ke laṛka, ham pe daya karo!”

⁴⁹Yeeshu ruk gais aur bolis, “Uske hiañ bolaao.” Ulog añdha admi ke bolaain, “Ḍaro nai! Yeeshu tumme bolaay hei.”

⁵⁰U aapan koṭ feñk ke jaldi se uṭhis aur Yeeshu ke lage gais.

⁵¹“Tum kon cheej mañgta hei ki ham tumhaar waaste kari?” Yeeshu usse puuchhis. “E guru, ham dekhe mañgta hei,” u añdha admi bolis.

⁵²Tab Yeeshu bolis, “Jaao, tumhaar biswaas tumme achchha kar dees hei.” Aur u jurte dekhe laga aur rasta meñ Yeeshu ke pichchhe hoy lees.