Read Hindi, Fiji Maak 11 Bible Online

Maak 11 - Hindi, Fiji bible

Maak 11

¹Jab ulog Yarushalam ke nagichche, Jaituun pahaaṛ pe Beitfage aur Bethni ke lage aain, tab Yeeshu aapan dui chela ke i baat bataay ke aage bhejis.

²“U aage waala gaaoñ meñ jaao. Jeise huañ tum log pahuñchega, huañ tumme ek gadha ke bachcha, jispe abhi tak koi nai beiṭhis hei, bañdha dekhaay dei, uske khol laao.

³Agar koi tum se puuchhi ki i kaa karta hei, to bataana ki Prabhu ke is ke jaruurat hei, aur u jaldi lauṭaay dei.”

⁴Ulog gain aur bachcha ke duaari pe bañdha paain, aur uske khole lagin.

⁵Huañ jon log khaṛa rahin, ulog se puuchhin, “Kaa karta hei? Gadha ke bachcha ke kaahe kholta hei?”

⁶Jeise Yeeshu bataais raha, weisaiyeñ ulog bol deen, aur ulog bachcha ke le jaay deen.

⁷Ulog bachcha ke Yeeshu ke lage laain, uspe aapan aapan kapṛa bichhaain aur Yeeshu uspe beiṭh gais.

⁸Bahut log rasta pe aapan aapan kapṛa bichhaain aur kuchh log khet se patti kaaṭ ke rasta pe bichhaain.

⁹Aur jon uske aage aage jaawat rahin, aur jon uske pichchhe pichchhe chalat rahin, ulog jor jor se chillaay ke bolat rahin, “Hosaana, dhann hei u jon Prabhu ke naam se aawe hei!

¹⁰Hamaar bappa Ḍeiviḍ ke raaj aawe hei, uspe Parmeshwar ke aasheesh hoi! Aur Prabhu ke baṛaai hoi!”

¹¹Yeeshu Yarushalam pahuñch ke chech meñ aais, aur chaaro taraf sab cheej ke dekhe laga. Lekin kaafi sanjha hoy gais raha, u aapan baarah chela log ke sañghe Bethani chala gais.

¹²Dusra roj sabere jab ulog Bethani se chalin, tab Yeeshu ke bhuuk laga.

¹³Duur pe u ek anjeer ke hariyar peṛ dekh ke uske nagichche aais, i soch ke ki huañ uske kuchh khaay ke mili. Lekin jab u nagichche aais, to patti ke chhoṛ ke u kuchh nai paais, kaahe ke anjeer ke fare ke ṭaaim nai raha.

¹⁴Yeeshu anjeer ke peṛ se bolis, “Ab se koi i peṛ ke fal nai khaai!” Aur uske chela log i sunat rahin.

¹⁵Jab ulog Yarushalam meñ aain, tab u Mandir meñ jaay ke huañ len den kare waalan ke nikaare laga. U peisa badle waala log ke ṭaibal aur kabuttar beche waalan ke peeṛha ulaṭ dees.

¹⁶Aur Yeeshu koi ke Mandir meñ se kuchh bhi laawe aur le jaay nai dees.

¹⁷Tab u samjhaay ke bataais, “Kaa i Baaibal meñ nai likha hei ki, ‘Hamaar Mandir sab des ke log ke waaste preya kare waala ghar rahi, lekin tum log iske chor ke aḍḍa banaay dia hei!’ ”

¹⁸I sunke baṛa paadri aur shaastri log uske jaan se maare ke mauka khoje lagin. Kaahe ke ulog usse ḍarat rahin. Sab log uske sikhaawe pe hairaan howat rahin.

¹⁹Sanjha jeise bhay, Yeeshu aur uske chela log ṭaaun se bahire chala gain.

²⁰Dusra roj sabere, jab ulog wahi rasta se jaawat rahin, to dekhin ki anjeer ke peṛ jaṛ tak sukhaay gay hei.

²¹Peeṭa ke yaad aais ki kal kaa bhais raha, aur u Yeeshu se bolis, “E guru, dekho, jon peṛ ke tum saraapa raha, u sukhaay gais hei.”

²²Tab Yeeshu chela log se bolis, “Parmeshwar pe biswaas karo!

²³Ham tum se sachche bolta hei, ki jon koi i pahaaṛ se boli ki uṭh ke jaao, aur samundar meñ lag jaao, aur aapan man meñ sandeh nai kari, lekin biswaas kari ki u jon cheej bole hei ki hoi, to u jaruur hoy jaai

²⁴Yahi kaaran ham tum se bolta hei, ki jon kuchh tum preya karke maañgo, aur biswaas karo to u tumme mil jaai.

²⁵Aur jab tum preya kare ke waaste khaṛa hota hei, tab agar tumhaar man meñ koi ke waaste jaran hei to uske maafi de deo. Tab tumhaar Pita jon swarag meñ hei, u bhi tumhaar paap maaf kari.”

²⁷Ulog fir Yarushalam aain, aur jab Yeeshu Mandir meñ ghuumat raha, tab baṛa paadri aur shaastri log aur Mandir ke elḍas, uske lage aay ke puuchhe lagin, “Kon hak se tum i sab karta hei? Aur kon tumme i hak dees hei ki tum i kaam karo?”

²⁹Yeeshu jawaab dees, “Ham bhi tum se ek sawaal puuchhega aur tum uske jawaab dena, tab ham tum se bataayga ki i kaam ham kiske bole pe karta hei.

³⁰I bataao, Yuhanna ke baptisma swarag ke taraf se ya admi ke taraf se raha?”

³¹Ulog aapas meñ bichaar karin aur ek dusra se bolin, “Ham kaa boli? Agar ham bolta hei ki, ‘Parmeshwar ke taraf se,’ to u boli, ‘Tab kaahe ke tum log Yuhanna pe biswaas nai kara?’

³²Agar ham boli, ‘Admi ke taraf se,” ’ (U log ḍarat rahin, kaahe ke sab log jaanat rahin ki Yuhanna sachche ek nabi raha.)

³³Ulog Yeeshu se bolin, “Ham nai jaanta hei.” Yeeshu jawaab dees, “Ham bhi tumme nai bataayga ki i kaam ham kiske bole pe karta hei.”