Read Hindi, Fiji Maak 12 Bible Online

Maak 12 - Hindi, Fiji bible

Maak 12

¹Yeeshu ulog ke i kahaani sunaais, “Ek dafe ek kisaan añguur ke kheti karis. U uske chaaro bagal se gher dees, ras ke kuñḍ khodis, aur pahra de waala ke ghar bhi banaais. Tab u añguur ke khet renṭ pe de dees, aur u apne bides ghuume chala gais.

²Jab añguur tuuṛe ke ṭaaim aais, tab kisaan ek naukar ke renṭ pe rahe waala admi ke lage bhejis, ki u jaay ke uske hissa ke añguur laay.

³Lekin renṭ waala log naukar ke pakaṛ ke peeṭin aur khaali haath lauṭaay deen.

⁴Tab kisaan dusra naukar ke bhejis, uske bhi ulog muuṛ meñ maarin aur beijjati karin.

⁵Kisaan fir ek dusra naukar bhejis, lekin ulog uske maar ḍaarin. Tab kisaan aur dusra naukar log ke bhejis, ulog meñ se kuchh ke peeṭin aur kuchh ke pahile ke rakam beijjati kar ke maar ḍaarin.

⁶Ab bheje ke waaste khali kisaan ke pyaara laṛka baaki rahe gais. Haar maan ke kisaan sochis ki renṭ waala log uske laṛka ke ijjat kari, to u aapan laṛka ke ulog ke lage bhejis.

⁷Lekin ulog aapas meñ bichaar karin, “I to maalik ke laṛka hei aur uske waaris bani. Aao ham log iske maar dei, tab iske sab cheej ham log ke hoy jaai.”

⁸Aur ulog laṛka ke pakaṛ ke maar ḍaarin aur khet ke bahire feñk deen.

⁹Yeeshu puuchhis, “Ab añguur ke khet ke maalik kaa kari? U aay ke renṭ waala log ke jaan se maar ke aapan khet ke dusra ke renṭ pe de dei.

¹⁰Kaa tum log Baaibal meñ i baat nai paṛha? ‘Jon patthar ke kaapenṭa log bekaar samajh ke bagal kar dees raha, wahi kona ke waaste asli patthar banis.

¹¹I sab Prabhu ke taraf se bhais raha, aur hamaar dekhe meñ bahut chakit baat hei!”

¹²Tab Yahuudi agua log Yeeshu ke pakṛe maañgat rahin, kaahe ke ulog samajh gay rahin ki Yeeshu ulog ke agaiñsṭ meñ kahaani bataais raha. Lekin u bheeṛ log ke ḍar se uske akele chhoṛ ke chala gain.

¹³Tab ulog Yeeshu ke uske baat meñ fasaawe ke waaste kuchh Farisi aur Heraḍ ke admi log ke uske lage bhejis.

¹⁴Ulog jaay ke usse bolin, “E guru, ham janta hei ki tum sachche bolta hei, aur koi ke parwaah nai karta hei, kaahe ki tum admi log ke muh dekh ke baat nai karta, lekin Parmeshwar ke rasta sachchaai se bataata hei. Ham log ke bataao ki Raaja ke ṭeks dewe ke ṭheek hei? Kaa hamme uske ṭeks dewe ke chaahi ki nai?

¹⁵Yeeshu ulog ke chalaaki jaan gais aur jawaab dees, “Tum log kaahe hamme ṭesṭ karta hei? Ek chaañdi ke peisa hamaar lage laao, ki ham dekhe saki.”

¹⁶Ulog ek chaañdi ke peisa Yeeshu ke lage laain. U puuchhis, “Is meñ kiske chehra hei aur kiske naam hei?” “Raaja ke,” ulog bolin.

¹⁷Tab Yeeshu bolis, “Jon Raaja ke hei, u Raaja ke de deo, aur jon Parmeshwar ke hei, u Parmeshwar ke de deo.” Tab ulog uske i baat sunke bahut chakit bhain.

¹⁸Tab Saduuki log bhi, jon bole hei ki koi mar ke jinda nai hoy sake, usman se kuchh Yeeshu ke lage aay ke bolin,

¹⁹“E guru, Maozas ham log ke khaatir likhis hei, ‘Agar koi ke bhaiya mar jaay, aur uske aurat bina laṛkan ke rahe jaay, to uske bhaiya uske aurat se saadi kar le sake hei aur aapan bhaiya ke waaste laṛkan peida kare sake hei.’

²⁰Ek dafe ke baat hei, saat bhaiya rahin, sab se baṛa bhaiya bina laṛkan ke mar gais.

²¹Tab uske dusra bhaiya u aurat se saadi kar lees, lekin u bhi bina laṛkan ke mar gais. Tisra ke sañghe bhi eisehiyeñ bhais.

²²Aur baaki bhaiya log ke sañghe bhi yahi bhais. Saat bhaiya log u aurat se saadi karin, aur bina laṛkan ke mar gain. Aakhri meñ u aurat bhi mar gais.

²³To jab mara log jinda hoi to ulog meñ se kiske aurat u hoi? Kaahe ke u saato bhaiya ke aurat rahi.’ ”

²⁴Yeeshu bolis, “Tum galti karta hei! Tum nai janta hei Baaibal kon cheej sikhaay hei. Aur tum Parmeshwar ke taagat bhi nai janta hei.

²⁵Log jab mare ke baad jinda hoi, tab ulog ainjals ke rakam rahiyeñ, tab ulog meñ saadi waadi nai hoi.

²⁶Mare ke baad fir se jinda hoy waala baat Maozas ke buk meñ kaa tum jhaaṛi ke kahaani meñ nai paṛha, jahañ Parmeshwar ulog se bolis raha, ‘Ham Abraham ke Parmeshwar hei, Aayzak ke Parmeshwar, aur Jeims ke Parmeshwar hei?’

²⁷Parmeshwar mara log ke nai lekin jinda log ke Parmeshwar hei. Tum log baṛa bhuul karta hei!”

²⁸Ek shaastri jon ulog ke baat sunat raha, wahiñ pe raha. U dekhis ki Yeeshu achchha se jawaab dees, to u aay ke usse ek sawaal karis, “Sab se khaas hukum kon hei?”

²⁹Yeeshu bolis, “Sab hukum meñ yahi sab se khaas hukum hei, ‘E Israayel suno! Prabhu ham log ke Parmeshwar, ekke Prabhu hei.

³⁰Aur tum Prabhu Parmeshwar se aapan puura man se, aur puura praan se, aur puura buddhi se, aur aapan puura taagat se prem rakhna.’

³¹Aur dusra hukum i hei, ‘Tum aapan paṛosi se aapan rakam prem karna.’ Isse baṛa aur koi hukum nai hei.”

³²Shaastri, Yeeshu se bolis, “E guru, tum ṭheek bola hei, aur sachche bola hei ki u ekke hei aur uske chhoṛ ke koi dusra nai.

³³Aur usse puura man se, puura buddhi se, puura praan se aur puura taagat se prem karna aur aapan paṛosi se aapan rakam prem karna, i sab rakam ke bali aur balidaan se baṛh ke hei.”

³⁴Tab Yeeshu dekhis ki u samajhdaari se jawaab dees hei, to u bolis, “Tum Parmeshwar ke raaj se duur nai hei.” Aur fir koi ke Yeeshu se kuchh puuchhe ke himmat nai bhais.

³⁵Yeeshu Mandir meñ updes dewe ke ṭaaim sawaal puuchhis, “Shaastri kaahe bole hei ki Maseeh, Raaja Ḍeiviḍ ke laṛka hei?”

³⁶Ḍeiviḍ Pawitr Aatma se bhar ke bolis, ‘Prabhu hamaar Prabhu se bolis, hamaar raaiṭ saaiḍ beiṭho, jab tak tumhaar dusman log ke tumhaar goṛ ke nichche nai kar dei.’

³⁷Raaja Ḍeiviḍ to apne aap uske Prabhu bole hei, fir u uske laṛka keise bhais?” Aur bheeṛ ke sab log khusi se i sab sunat rahin.

³⁸Tab Yeeshu sikhaay ke ṭaaim ulog se bolis, “Shaastri log se bach ke rahna, jon lamba lamba kapṛa pahin ke ghuume hei, aur jon bajaar meñ namaste aur chech meñ khaas jagha beiṭhe hei, aur neota meñ maan-sammaan ke khoj meñ rahe hei.

⁴⁰Yahi log hei jon bidhwa log ke ghar dhoka se le le hei. aur dekhaawe ke khaatir baṛa deri tak preya karte rahe hei. I log ke to bahut bhaari saja mili.”

⁴¹Yeeshu Mandir meñ peisa baṭore waala jagha pe beiṭh ke dekhe laga ki log Mandir meñ keise daan dewe hei. Kaafi dhani log bahut peisa deen.

⁴²Etne meñ ek gareeb bidhwa aay ke dui taamba ke sikka, jon ek peisa ke baraabar hei, usman chhoṛis.

⁴³Yeeshu aapan chela log ke bolaay ke bolis, “Ham tumme sachche bataata hei ki Mandir meñ peisa dewe waalan meñ se i gareeb bidhwa sab se jaada daan dees.

⁴⁴Kaahe ke sab usman se deen jon ulog nai maañgat rahin, lekin i bidhwa to aapan sab kuchh de dees hei.”