Read Hindi, Fiji Maak 13 Bible Online

Maak 13 - Hindi, Fiji bible

Maak 13

¹Jab Yeeshu Mandir se nikrat raha, to uske ek chela bolis, “He guru, dekho, keisan keisan patthar aur keisan keisan ghar hei?”

²Yeeshu bolis, “I baṛa baṛa ghar dekhta hei? Hiañ pe ek bhi patthar nai bachi, ek ek kar ke feñk dewa jaai.”

³Jab Yeeshu Jaituun pahaaṛ pe Mandir ke saamne beiṭha raha, to Peeṭa, Jeims, Yuhanna aur Enḍru alge jaay ke usse puuchhin.

⁴“Ham log ke bataao ki i sab cheej kab hoi, aur jab hoi tab u ṭaaim ke saain kaa rahi?”

⁵Yeeshu ulog ke jawaab dees, “Bach ke raho ki koi tum log ke dhoka nai de sake.

⁶Bahut log hamaar naam se aay ke kahiyeñ, ‘Ham wahi hei,’ aur bahut ke dhoka bhi dehiyeñ.

⁷Aur jab tum laṛaai ke baare meñ suno, to ghabraana nai, kaahe ke i sab ke hoy ke jaruuri hei, lekin u ṭaaim ant nai hoi.

⁸Ek jaati dusra jaati pe aur ek des dusra des pe chaṛhaai kari, aur erthquaik aai, akaal paṛi. I sab baat museebat ke suruaat hei.”

⁹“Lekin tum aapan waaste bhi bach ke rahna, kaahe ke log tumme pakaṛ ke koṭ meñ le jahiyeñ. Tumme Mandir meñ maari, aur hamaar kaaran gavna aur raaja log ke aage khaṛa hoy ke paṛi, taaki tum ulog ke waaste gawaahi bano.

¹⁰Aur susamaachaar sab se pahile sab jaati meñ parchaar kara jaai.

¹¹Aur jab ulog tumme pakṛi, to pahile se soch nai karna, ki tum kaa bolega, ṭaaim aawe pe wahi bolna jon tumme bataawa jaai. Kaahe ke jon tum bolega u tumhaar baat nai rahi, lekin Pawitr Aatma se aai.

¹²Bhaiya aapan bhaiya ke maare ke waaste de dei, baap bhi aapan laṛkan ke khaatir yahi kari. Laṛkan bhi aapan maañ-baap ke dusman ban jaai aur marwaay dei.

¹³Hamaar naam ke kaaran sab log tumhaar dusman ban jaai. Lekin jon log aakhri tak dheeraj rakhiyeñ, wahi log bach jaai.”

¹⁴“Jab tum ‘Ek bhayaanak cheej’ huañ khaṛa dekhega, jahañ uske nai hoy ke chaahi, (jon koi i paṛhe hei uske i samajh lewe ke hei.) “Tab jon Juḍia meñ hei, ulog ke pahaaṛ pe bhaag jaay deo.

¹⁵Jon ruuf pe hei, ulog huañ se nai utre, aur aapan ghar meñ kuchh lewe ke waaste bhittar nai jaay.

¹⁶Aur jon admi khet meñ hei, u aapan kapṛa lewe ke waaste pichchhe nai lauṭe.

¹⁷Jon aurat maañ bane waali hei, aur jon bachcha ke duudh piaawe hei, ulog ke waaste i din bahut ḍar waala hoi!

¹⁸Parmeshwar se preya karo ki i sab ṭhanḍa ke mausam meñ nai hoy!

¹⁹Kaahe ke i din eisan dukh ke din hoi ki jab se Parmeshwar dunia banaais hei, eisan dukh abhi tak dekhe ke nai mila hei, aur naa kabhi hoi.

²⁰Agar Prabhu din chhoṭa nai karta, to koi nai bachta. Lekin jon ke u chunis hei aur aapan khaas log ke khaatir, u din chhoṭa karis hei.”

²¹“U ṭaaim koi tum se aay ke agar bole, ‘Dekho, Maseeh hiañ hei!’ ya ‘Dekho, huañ hei!’ to biswaas nai karna.

²²Banauṭi Maseeh aur banauṭi nabi nikar paṛi. Rakam rakam ke saain aur sundar kaam dekhaay ke hiañ tak ki Parmeshwar ke chuna log ke bhi bharmaay dehiyeñ.

²³Tum husiaar rahna. Dekho tum se sab baat ham pahile se bataay dia hei.”

²⁴“U ṭaaim dukh ke baad suuraj añdher hoy jaai, aur chaañd aapan ujera nai dekhaai.

²⁵Asmaan se taara gire lagi, aur huañ ke taagat aapan jagha se hile lagi.

²⁶Tab Manush ke laṛka saamne aai. U baṛa mahima aur taagat ke sañghe baadar meñ se aate dekhaai.

²⁷Tab u aapan ainjals ke bhej ke, dharti ke i kona se asmaan ke u kona tak sab bagal se aapan chuna gay log ke baṭori.”

²⁸Anjeer ke peṛ se i cheej seekho. Jab uske ḍaari naram hoy hei aur nawa patti nikre lage hei, tab tum jaan leta hei ki garmi ke mausam aay waala hei.

²⁹Wahi rakam jab tum i sab cheej hote dekho, to jaan jaao ki ṭaaim nagichche hei, ya duaari pe hei.

³⁰Yaad rakkho, ki jab tak i sab baat puura nai hoy jaai, tab tak ilog mari nai.

³¹Asmaan aur dharti miṭ jaai, lekin hamaar baat kabhi nai miṭi.”

³²“U din aur u ṭaaim ke baare meñ koi nai jaane, etna tak ki naa swarag ke ainjals aur naa Laṛka, khali Pita jaane hei.

³³Husiaar raho! Jagte raho aur preya meñ laga raho, kaahe ke tum nai janta ki u ṭaaim kab aai.

³⁴I u rakam ke baat hei jeise ek admi aapan ghar chhoṛ ke dusra des jaay hei. Aapan sab naukar log ke kaam bataay ke aur wachmen ke jagte rahe ke hukum de hei.

³⁵Yahi rakam se jagte raho. Kaahe ke tum nai janta ki ghar ke maalik kab lauṭi, sanjha ke ya aadha raat ke, ya murga bole ke ṭaaim ya sabere.

³⁶Kahiñ eise nai hoy ki u achaanak aay jaay aur tumme sowat paay.

³⁷Aur jon cheej ham tum se bolta hei, u ham sab se bataata hei, ‘Jagte raho!” ’