Read Hindi, Fiji Maak 14 Bible Online

Maak 14 - Hindi, Fiji bible

Maak 14

¹Dui din ke baad fasah aur bina yeesṭ ke roṭi ke teohaar aay waala raha. Baṛa paadri aur shaastri log i baat ke khoj meñ rahin ki Yeeshu ke kon rakam se pakaṛ ke maare sake.

²Lekin ulog sochin ki teohaar ke roj nai kaahe ke sab log meñ upadrao hoy sake hei.

³Jab Yeeshu Bethani meñ Saayman (jis ke koṛhi ke bimaari raha), ke ghare khaana khaay beiṭha raha, tab ek aurat ek botal meñ sundar mahke waala mahañga pefeum laais. U botal ke khol ke pefeum Yeeshu ke goṛ pe giraais.

⁴Lekin kuchh log jon huañ rahin, gussaay gain aur bolin, “Kaahe ke i pefeum ke barbaad kara jaay hei.

⁵Iske to teen sao ḍola se jaada meñ bech ke gareeb log ke madat kara jaay sakat raha.” Aur ulog aurat ke ḍaaṭe lagin.

⁶Lekin Yeeshu bolis, “Uske chhoṛ deo. Uske tum log kaahe ke tang karta hei? U to hamaar sañghe bhalaai karis hei.

⁷Gareeb log tumhaar sañghe hardam rahiyeñ, aur jab maañgo tab ulog ke madat kare sako hei, lekin ham to tumhaar sañghe hardam nai rahega.

⁸Jon kuchh u kare sakat rahi, karis, u hamme maṭṭi dewe ke taiyaari meñ pahile se pefeum lagaay dees hei.

⁹Ham tum se sachche bolta hei ki dunia bhar meñ jahañ kahiñ susamaachaar ke parchaar kara jaai, huañ iske i kaam ke baare meñ yaad kara jaai.”

¹⁰Tab Juḍas Iskariyoti jon baarah chela meñ se ek raha, u baṛa paadri ke lage gais, ki u Yeeshu ke ulog ke haath pakaṛwaay dei.

¹¹Ulog i sun ke khusi bhain aur peisa dewe ke promis karin. Juḍas Iskariyoti ab eisan mauka khojat raha ki koi rakam u Yeeshu ke pakaṛwaay de.

¹²Bina yeesṭ ke roṭi waala teohaar ke pahila roj, fasah ke khaana ke khaatir bheṛa ke bachcha maara jaat raha. Yeeshu ke chela log usse puuchhin, “Tum kahañ mañgta hei ki ham log jaay ke tumhaar waaste fasah ke khaana ke taiyaari kari?”

¹³Tab Yeeshu aapan dui chela log ke bataay ke bhejis, “Ṭaaun meñ jaao, huañ ek admi paani ke ghaṛa uṭhaay dekhaai. Wahi ke pichchhe hoy lena.

¹⁴Aur u jon ghar meñ jaai, wahi ghar ke maalik se bolna, “Guru puuchhe hei ki u ruum kahañ hei jisman ham aur hamaar chela log fasah ke khaana khaai?”

¹⁵Tab u tumme ek saja sajaawal aur taiyaar karal baṛa waala uppar ke ruum dekhaai. Wahiñ pe khaana ke taiyaari karna.”

¹⁶Tab chela log nikar ke ṭaaun meñ aain aur weisaiyeñ dekhin jeise Yeeshu bataais raha. Wahiñ ulog fasah ke khaana taiyaar karin.

¹⁷Jab sanjha bhais, tab Yeeshu aapan baarah chela log ke sañghe huañ aais.

¹⁸Jab ulog beiṭh ke khaana khaat rahin, tab Yeeshu ulog se bolis, “Ham tum se sachche bolta hei ki tum meñ se ek jon hamaar sañghe khaana khaay hei, wahi hamme pakaṛwaai.”

¹⁹Chela log meñ udaasi chhaay gais, aur ulog ek ek karke usse puuchhe lagin, “Kaa u ham hei?”

²⁰Yeeshu bolis, “U tum baarah meñ se ek hei jon hamaar sañghe thariya meñ haath ḍaaris hei.

²¹Manush ke laṛka to weisaiyeñ mari, jeise uske baare meñ Baaibal meñ likhaan hei, lekin uspe haay lagi jon Manush ke laṛka ke pakaṛwaai. Achchha hota ki u janam nai leta!”

²²Khaana khaay ke ṭaaim Yeeshu roṭi lees aur aasheesh maañg ke uske tuuṛis, aur ulog ke de ke bolis, “Leo, i hamaar deñhi hei” ’

²³Fir u pyaala lees, Prabhu ke dhanbaad deke ulog ke dees, aur u sab usman se peen.

²⁴Tab Yeeshu bolis, “I hamaar khuun hei jon bahut log ke khaatir bahaawa gais hei, aur yahi khuun Prabhu ke promis hei.

²⁵Ham tum se sachche bolta hei, ki ab se ham waain nai piega jab tak ham Parmeshwar ke raaj ke nawa waain nai pee lei.”

²⁶Tab ulog ek bhajan gaain aur Jaituun pahaaṛ pe chala gain.

²⁷Yeeshu ulog se bolis, “Tum sab hamme chhoṛ ke bhaag jahio, jeise ki Baaibal meñ likha hei, ‘Ham charwaaha ke maarega, aur bheṛa idhar udhar bhaag jahiyeñ.’

²⁸Lekin ham jinda hoy ke baad tum se pahile Galeel chala jaayga.”

²⁹Peeṭa bolis, “Chaahe tumme sab chhoṛ dehiyeñ, lekin ham tumme kabhi nai chhoṛega!”

³⁰Yeeshu Peeṭa se bolis, “Ham tum se sachche bolta hei ki aaj hee ke raat, murga ke dui dafe bole se pahile, tum teen dafe bolega ki tum hamme nai janta hei.”

³¹Peeṭa jor deke bolis, “Agar hamme tumhaar sañghe mare ke bhi paṛa to bhi tumme ham kabhi naa nai karega!” Yahi rakam aur sab chela log bhi bolin.

³²Fir ulog Getsamni naam ke ek jagha pe aain, aur Yeeshu aapan chela log se bolis, “Jab tak ham preya karta hei, tum sab yahiñ beiṭho.”

³³U Peeṭa, Jeims aur Yuhanna ke aapan sañghe le gais. U bahut udaas aur dukhi hoy lagis.

³⁴Aur u bolis, “Hamaar man bahut udaas hei, aur jaan paṛe hei ki ham mare waala hei. Tum hiañ ruko aur jagte raho.”

³⁵U thoṛa aage gais aur jameen pe gir ke preya kare laga ki agar hoy sake to i dukh ke ghaṛi usse le lewa jaay.

³⁶Fir Yeeshu bolis, “Abba, E Pita, tum sab kuchh kare sakta hei. I dukh ke pyaala ham se le leo, hamaar ichchha nai, lekin tumhaar ichchha puura hoy.

³⁷Jab u lauṭ ke aais tab teeno chela log ke sote paais aur Saayman Peeṭa se bolis, “Kaa tum soy gaya hei? Kaa tum ek ghañṭa bhi jaga nai rahe sakta raha?”

³⁸“Jagte raho, aur preya karo ki tumhaar ṭesṭ nai hoy, kaahe ke aatma taiyaar hei lekin deñhi kamjor hei.”

³⁹Yeeshu fir chala gais, aur wahi baat bol ke preya kare lagis.

⁴⁰Jab u lauṭis tab chela log ke fir sote paais. Kaahe ki neeñd ke kaaran ulog aañkhi nai khole paawat rahin, aur nai jaanat rahin ki Yeeshu ke kaa jawaab dewa jaay.

⁴¹Tab u tisra dafe lauṭ ke aais aur bolis, “Kaa tum abhi bhi sota hei aur sustaata hei? Bas! Ṭaaim aay gais hei ki Manush ke laṛka paapi log ke haath meñ de dewa jaai.

⁴²Uṭho, aao ab ham sab chali. Dekho, hamme dhoka de waala nagichche pahuñch aais hei.”

⁴³Yeeshu baat karte raha ki Juḍas jon baarah chela meñ se ek raha, aapan sañghe baṛa paadri, shaastri aur elḍas log ke bagal se ek baṛa bheeṛ jiske lage talwaar aur laaṭhi raha, leke huañ pahuñchis.

⁴⁴Juḍas aage se bheeṛ ke bataay dees raha, “Jiske ham chumma lega, wahi ke pakaṛ ke le jaana.”

⁴⁵Jeise Juḍas huañ pahuñchis, u seedha Yeeshu ke lage gais aur bolis, “E Rabbi!” aur uske chumma le lees.

⁴⁶Ulog Yeeshu ke kas ke pakaṛ leen.

⁴⁷Huañ jon log khaṛa rahin, us meñ se ek admi talwaar nikaar ke baṛa paadri ke naukar ke kaan kaaṭ dees.

⁴⁸Yeeshu ulog se bolis, “Kaa tum ḍaaku samajh ke hamme pakṛe ke khaatir laaṭhi aur talwaar leke aaya hei?

⁴⁹Ham to hardam Mandir meñ tumhaar sañghe updes deta raha, tab tum hamme nai pakṛa. I sab i khaatir hoy hei ki Baaibal meñ likha baat puura hoy.”

⁵⁰Is pe sab chela log uske chhoṛ ke bhaag gain.

⁵¹Lekin ek naojawaan jon aapan nañga deñhi pe khali ek chaddar lapeṭe raha, Yeeshu ke pichchhe hoy lees. Ulog uske pakṛe maañgat rahin, lekin u aapan chaddar chhoṛ ke nañge bhaag gais.

⁵²

⁵³Tab ulog Yeeshu ke baṛa paadri ke lage laain, huañ sab baṛa paadri aur shaastri baṭur gain.

⁵⁴Peeṭa duur se uske pichchhe pichchhe baṛa paadri ke añgna tak gais, aur gaaḍ ke sañghe beiṭh ke aagi taape laga.

⁵⁵Baṛa paadri aur puura maha sabha Yeeshu ke maut ke saja dewe ke waaste sabuut khojat rahin, lekin kuchh nai mila.

⁵⁶Ketna log Yeeshu ke agaiñsṭ meñ jhuuṭa gawaahi dewat rahin lekin ulog ke gawaahi ekke rakam nai raha.

⁵⁷Fir se kuchh log khaṛa hoy ke jhuuṭṭe ke gawaahi deen.

⁵⁸“Ham log iske bolte suna hei, ‘Ham admi ke banaawal Mandir ke tuuṛ dega aur teen roj meñ dusra banaay dega, jon admi ke haath se nai banaawa gais hei.” ’

⁵⁹Ispe bhi ulog ke gawaahi ekke rakam nai raha.

⁶⁰Tab baṛa paadri beech meñ khaṛa hoy ke Yeeshu se puuchhis, “Kaa tumhaar lage i baat ke koi jawaab nai hei, jon ilog tumhaar uppar lagaawe hei?”

⁶¹Is pe bhi Yeeshu chuppe raha aur kuchh bhi nai bolis. Baṛa paadri usse fir puuchhis, “Kaa tum mahaan Parmeshwar ke laṛka Maseeh hei?”

⁶²Yeeshu bolis, “Haañ, ham hei, aur tum Manush ke laṛka ke sab se Shaktimaan Parmeshwar ke raaiṭ saaiḍ beiṭhe aur swarag ke baadar ke sañghe aate dekhega!”

⁶³Tab baṛa paadri aapan raub faaṛ ke bolis, “Ab ham log ke koi gawaahi ke jaruurat nai hei!

⁶⁴Tum sab log Parmeshwar ke ninda sun lia hei, aur ab tumhaar kaa bichaar hei? Sab log uske maut ke saja dewe ke bolin.

⁶⁵Kuchh log Yeeshu pe thuuke lagin, aur aañkhi pe paṭṭi baañdh ke ghuusa maar ke puuchhe lagin, “Bataao tumme kon maaris?” Gaaḍ log bhi uske thappaṛ maarin.

⁶⁶Peeṭa abhi añgna meñ raha, aur baṛa paadri ke ek naukraani huañ aais.

⁶⁷U dekhis ki Peeṭa aagi taape hei, to u ghuur ke uske bagal dekhis aur bolis, “Tum bhi to u Naasri Yeeshu ke sañghe raha.”

⁶⁸Lekin Peeṭa nai kar dees aur bolis, “Ham to uske nai janta hei aur nai samajhta ki tum kaa bola hei,” aur u bahire baranḍa meñ chala gais aur tabhi murga bolis.

⁶⁹U naukraani Peeṭa ke dekh ke, huañ agal bagal khaṛa log se bole lagis, “I bhi ulog meñ se ek hei.”

⁷⁰Lekin Peeṭa fir se nai kar dees. Thoṛa deri baad huañ ke log jon khaṛa rahin Peeṭa se bolin, “Ekdam sachcha baat hei ki tum ulog meñ se ek hei, kaahe ke tum bhi Galeeli hei.”

⁷¹Tab Peeṭa bolis, “Ham kasam khaata hei, aur sachche bolta hei. Prabhu hamme saja dei agar ham jhuuṭ bolega! Ham u admi ke jiske baare meñ tum bolta hei, nai janta hei!”

⁷²Wahi lage murga dusra dafe bolis aur Peeṭa ke u baat jon Yeeshu bataais raha, yaad aay gais, “Murga ke dui dafe bole se pahile tum teen dafe hamme inkaar karega.” Aur u i baat soch soch ke rowe laga.