Read Hindi, Fiji Maak 15 Bible Online

Maak 15 - Hindi, Fiji bible

Maak 15

¹Sabere hote baṛa paadri, shaastri aur elḍas log puura maha sabha se sallaah kar ke Yeeshu ke chain se bandhwaay ke Paaylaṭ ke haath meñ de dees.

²Paaylaṭ Yeeshu se puuchhis, “Kaa tum Yahuudi log ke raaja hei?” Yeeshu jawaab dees, “I to tumahi bolta hei.”

³Aur baṛa paadri log us pe bahut rakam ke dos lagaain.

⁴Paaylaṭ usse fir puuchhis, “Kaa tum kuchh nai bolega? Dekho, i sab log tum pe bahut dos lagaawe hei.”

⁵Yeeshu fir bhi kuchh nai bolis, aur Paaylaṭ hairaan rahe gais.

⁶Jab jab fasah ke teohaar aate raha, tab tab Paaylaṭ koi ek keidi ke, jiske u maañge hei, uske chhoṛ dewat raha.

⁷Wahi ṭaaim Barabba naam ke ek admi raaj ke agaiñsṭ kaam kare waala log ke sañghe jel meñ raha, u dañga fasaad (riot) meñ hatya bhi karis raha.

⁸Aur bheeṛ ke log Paaylaṭ se binti kare lagin ki jeise u hardam karat raha, weise abhi bhi kare.

⁹Paaylaṭ puuchhis, “Kaa tum log mañgta hei ki ham tumhaar waaste Yahuudi ke raaja ke chhoṛ dei?”

¹⁰U jaanat raha ki baṛa paadri log Yeeshu se jaran kare hei aur yahi khaatir uske lage laain hei.

¹¹Baṛa paadri log sab ke sikhaain ki ulog Paaylaṭ se bole ki u Barabba ke chhoṛ de.

¹²Paaylaṭ ulog se puuchhis, “Jiske tum log Yahuudi ke raaja bolta hei, uske ham kaa kari?”

¹³Ulog fir chillaain, “Uske kros pe chaṛhaay deo!”

¹⁴Paaylaṭ ulog se puuchhis, “I kon kharaab kaam karis hei?” Sab log aur jor se chillaay ke bolin, “Uske kros pe chaṛhaay deo!”

¹⁵Paaylaṭ sab ke khusi kare maañgat raha aur u Barabba ke chhoṛ dees aur Yeeshu ke chaabuk lagwaay ke kros pe chaṛhwaay ke khaatir de dees.

¹⁶Saulja log Yeeshu ke raajpaal ke bhawan ke bhittar ke añgna meñ le gais aur Romi saulja log ke ek jagha bolaawa gay.

¹⁷Aur ulog uske pepal (beijani) kapṛa pahinaay ke uske muuṛ pe kaaṭa ke taaj rakh deen.

¹⁸Tab ulog Yeeshu ke salaam kare lagin aur bolin, “E Yahuudi ke raaja, tumhaar lamba umar hoi!”

¹⁹Aur ulog uske muuṛ pe ḍanḍa maare lagin, aur uspe thuuke lagin aur ghuṭna ṭek ke uske namaste kare lagin.

²⁰Jab ulog Yeeshu ke khilli uṛaay leen, tab pepal kapṛa utaar ke wahi ke kapṛa pahinaain, aur uske kros pe chaṛhaay ke waaste bahire le gain.

²¹Rasta meñ ulog ke Saayman naam ke admi mila, jon gaaoñ se ṭaaun aat raha. Saayman ek Kureni raha jon Elekszenḍa aur Rufus ke bappa raha. Saulja log usse jabran Yeeshu ke kros ḍhowaain.

²²Ulog Yeeshu ke Gulgutha naam ke ek jagha (jiske matlab khopṛi hei) huañ pe le gain.

²³Ulog uske huañ añguur ke ras meñ dawaai milaay ke dewe maañgat rahin, lekin Yeeshu nai pees.

²⁴Tab ulog uske kros pe chaṛhaay deen aur uske kapṛa apne meñ baaṭ leen, aur baaji lagaay ke dekhin ki kon kapra kiske mili.

²⁵Sabere nao baje ke ṭaaim ulog Yeeshu ke kros pe chaṛhaain.

²⁶Aur ek noṭis likh ke uske uppar lagaay deen. Usman likhaan raha, “Yahuudi log ke Raaja.”

²⁷Yeeshu ke sañghe dui aur chor ke kros pe chaṛhaawa gais raha. Ek ke raaiṭ meñ aur dusra ke lefṭ meñ.

²⁸Tab Baaibal meñ likha baat puura bhais, jahañ likhaan raha, “Uske apraadhi log meñ gina jaai.”

²⁹Rasta pe jaay waala log muuṛ hilaay hilaay ke uske buraai karat rahin, “E Mandir ke giraay ke teen roj meñ banaay waala! Kros pe se utro aur apne aap ke bachaao!”

³⁰

³¹Yahi rakam baṛa paadri aur shaastri log bhi khilli uṛaawat rahin aur ek dusra se bolat rahin, “I aur log ke bachaawat raha lekin apne aap ke nai bachaay sake hei.”

³²Aao ham log Maseeh ke dekhi jon kros pe se utar aai ki ham uske dekh ke uspe biswaas kari.” U duuno chor bhi jon ke Yeeshu ke sañghe kros pe chaṛhaawa gay raha, uske khilli uṛaat rahin.

³³Baarah baje din se teen baje tak puura des meñ añdhera chhaay gais raha.

³⁴Teen baje Yeeshu chillaay ke bolis, “Eloyi, Eloyi, Lama shabaktani!” Jiske matlab raha, “E hamaar Parmeshwar, E hamaar Parmeshwar, kaahe tum hamme chhoṛ dia hei?”

³⁵Jon log huañ nagichche meñ khaṛa rahin, ulog sunke bolin, “Dekho, i Ilaayja ke bolaawe hei.”

³⁶Aur ek saulja dauṛ ke spanj ke sirka meñ bhijaay ke, ek lakṛi pe rakh ke Yeeshu ke piye ke waaste dees aur bolis, “Ruko, ham dekhi Ilaayja iske utaare ke khaatir aay hei ki nai.”

³⁷Tab Yeeshu baṛa jor se chillaay ke aapan praan chhoṛ dees.

³⁸Aur Mandir ke parda uppar se nichche tak faṭ ke dui ṭukṛa hoy gais.

³⁹Jon Romi ofisa uske saamne khaṛa raha, jab u Yeeshu ke chillaay ke praan chhoṛte dekhis to u bolis, “Sachche ke i admi Parmeshwar ke laṛka raha!”

⁴⁰Bahut aurat log bhi duur se dekhat rahin. Ulog meñ Meri Magdalini, aur chhoṭa Jeims aur Josaf ke amma Meri, aur Shalomi bhi rahi.

⁴¹I sab log Yeeshu ke pichchhe Galeel se aay rahin, aur uske sewa karat rahin. Ulog ke sañghe aur bahut aurat log bhi rahin jon Yarushalam se sañghe aay rahin.

⁴²Sabat se pahile sanjha ke ṭaaim raha aur log uske taiyaari meñ lage rahin, jab Armathia ke rahewaala Josaf huañ aais. I admi sabha ke ek memba raha aur log uske ijjat karat rahin. U Parmeshwar ke raaj ke agorat raha. U baṛa himmat kar ke Paaylaṭ ke lage jaay ke Yeeshu ke boḍi maañgis.

⁴³

⁴⁴Paaylaṭ hairaan bhais ki Yeeshu etna jaldi keise mar gais, aur aami ofisa ke bolaay ke puuchhis, ki Yeeshu ke mare ketna deri bhais?

⁴⁵Ofisa se pata lagaawe ke baad ki u mar gais hei, Paaylaṭ Yeeshu ke boḍi Josaf ke de dees.

⁴⁶Tab Josaf ek chaddar khareedis, aur boḍi ke utaar ke chaddar meñ lapeṭis, aur ek kabar meñ jon chaṭṭaan meñ khoda gay raha, usman rakh dees.

⁴⁷Meri Magdalini aur Josaf ke amma Meri dekhat rahin ki boḍi kahañ rakha jaay hei.