Read Hindi, Fiji Maak 2 Bible Online

Maak 2 - Hindi, Fiji bible

Maak 2

¹Kuchh roj ke baad jab Yeeshu Kafarnahuum lauṭis tab ṭaaun meñ sab log ke pata lag gais ki u aapan ghare hei.

²Huañ etna log aay gain ki duaari pe khaṛa hoy ke jagha nai raha. Yeeshu Parmeshwar ke vachan parchaar karat raha,

³jab chaar admi ek rogi jiske lakwa maar dees raha, uske uṭhaay ke Yeeshu ke lage laain.

⁴Lekin bheeṛ ke kaaran Yeeshu ke lage nai pahuñch paain, aur tab ulog ruuf khol ke u lakwa ke rogi ke nichche utaarin.

⁵Yeeshu ulog ke biswaas dekh ke, lakwa ke rogi se bolis, “Beṭa, tumhaar sab paap maaf hoy gais.”

⁶Huañ kuchh shaastri log beiṭha rahin. Ulog soche lagin,

⁷“Kaahe Yeeshu eise bolis? I to Parmeshwar ke buraai kare hei. Khali Parmeshwar paap ke maaf kare sake hei.”

⁸Yeeshu jaan gais ki ulog aapan man meñ kaa soche hei aur bolis, “Tum log kaahe ke eise socho hei?

⁹Lakwa ke rogi se kon cheej bole meñ sahaj hei? ‘Tumhaar sab paap maaf bhais, ya uṭho aur aapan chaṭaai uṭhaay ke chalo firo?’

¹⁰Lekin tum log i baat achchha se jaan leo ki Parmeshwar ke laṛka ke dharti pe paap maaf kare ke adhikaar hei,” Tab Yeeshu lakwa ke rogi se bolis,

¹¹“Uṭho, aapan chaṭaai baṭoro aur ghare jaao!”

¹²U uṭhis aur jurte aapan chaṭaai baṭoris aur sab ke saamne se nikar ke bahire chala gais. I sab dekh ke sab log ghabraay gain aur Parmeshwar ke baṛaai kare lagin, aur bolin, “Eisan cheej to ham kabhi nai dekha raha.”

¹³Yeeshu bahire nikar ke fir laik ke kinaare chala gais. Ek baṛa bheeṛ uske lage aawe lagin aur u ulog ke updes de laga.

¹⁴Yeeshu jab huañ se jaawat raha tab Halfai ke laṛka, Levi ṭeks baṭorewaala ke dekhis, jon aapan ofis meñ beiṭha raha aur Yeeshu usse bolis, “Hamaar pichchhe hoy leo.” Levi uṭhis aur Yeeshu ke pichchhe hoy lees.

¹⁵Ek roj Levi ke ghare Yeeshu khaana khaay ke waaste beiṭha. Yeeshu ke chela log, aur bahut se ṭeks baṭorewaala log aur dusra paapi log bhi Yeeshu ke sañghe khaana khaay beiṭh gain.

¹⁶Farisi log ke wakeel log jab dekhin ki Yeeshu ṭeks baṭorewaala aur paapi log ke sañghe khaana khaawe hei, tab ulog chela log se puuchhin, “U kaahe eisan log ke sañghe khaay piye hei?”

¹⁷Yeeshu ulog ke i baat sunke bolis, “Jon achchha hei, bimaar nai hei, ulog ke ḍokṭa ke jaruurat nai hei, lekin jon bimaar hei, uske jaruurat hei. Ham dharmi log ke khaatir nai, lekin paapi log ke bachaay aaya hei.”

¹⁸Ek ṭaaim Yuhanna Baptisma de waala ke chela log aur Farisi log upwaas karat rahin. Kuchh log Yeeshu ke lage jaay ke puuchhin, “Yuhanna ke chela log aur Farisi ke chela log upwaas kare hei, fir tumhaar chela log eise kaahe nai kare hei?”

¹⁹Yeeshu ulog ke jawaab dees, “Jab tak dulha sañghe hei, kaa koi baraati log upwaas kare sake hei? Jab tak dulha ulog ke sañghe hei, tab tak upwaas nai kara jaay hei.

²⁰Lekin ṭaaim aawe hei jab dulha ulog se le lewa jaai, tab u ṭaaim ulog upwaas kari.

²¹Koi bhi nawa kapṛa se puraana koṭ meñ chakti nai lagaai kaahe ke jab nawa kapṛa sukṛi, tab puraana koṭ pahile se jaada faṭ jaai.

²²Yahi rakam nawa añguur ke ras ke puraana chamṛa ke jholi meñ nai bhara jaay hei, kaahe ke añguur ke ras chamṛa ke faaṛ dei aur añguur ke ras ke sañghe jholi bhi barbaad hoy jaai. Yahi kaaran hei ki nawa añguur ke ras ke nawa jholi meñ rakkhe ke chaahi.”

²³Sabat ke roj, Yeeshu khet meñ se jaawat raha. Uske chela log anaaj ke baali tuuṛe lagin.

²⁴Farisi log Yeeshu se bolin, “Dekho, ilog eisan kaam kaahe kare hei jon kaam sabat ke roj nai kare ke chaahi.”

²⁵Yeeshu ulog se bolis, “Kaa tum nai paṛha ki jab Ḍeiviḍ aur uske saathi log ke bhuuk laga aur khaawe ke jaruurat paṛa, to Ḍeiviḍ kaa karis raha?

²⁶Paadri Abiyatar ke ṭaaim ulog Parmeshwar ke ghar ke bhittar gain aur bheñṭ ke roṭi khaain aur aapan saathi log ke bhi khawaain, jon roṭi khali paadri khaay sakat raha.”

²⁷Yeeshu bolis, “Sabat admi log ke waaste banaawa gais hei, naa ki admi sabat ke khaatir.

²⁸Yahi kaaran Manush ke laṛka, sabat ke roj ke bhi maalik hei.”