Read Hindi, Fiji Maak 3 Bible Online

Maak 3 - Hindi, Fiji bible

Maak 3

¹Yeeshu fir chech meñ gais. Huañ ek admi raha jiske haath luñj hoy gais raha.

²Kuchh log agorat rahin ki Yeeshu uske sabat ke roj achchha kare aur ulog uspe dos lagaay sake.

³Yeeshu u luñj haath waala admi se bolis, “Aao, aur hiañ beech meñ khaṛa ho.”

⁴Tab Yeeshu sab log se puuchhis, “Hamaar kaanuun kaa bataawe hei, sabat ke roj bhalaai karo achchha hei ki buraai karo, koi ke jaan bachaao achchha hei ki naas karo achchha hei?” Sab log chuppe rahin.

⁵Yeeshu gussa meñ chaaro taraf dekhis, lekin sab ke kaṛa dil dekh ke uske bahut dukh bhais. Yeeshu u admi se bolis, “Aapan haath aage baṛhaao.” U haath baṛhaais aur uske haath achchha hoy gais.

⁶Tab Farisi log chech se bahire nikris aur Heraḍ ke saathi log se milin aur Yeeshu ke maare ke plen banaawe lagin.

⁷Yeeshu aapan chela log ke sañghe laik ke bagal chala gais aur uske pichchhe ek baṛa bheeṛ lag gais. Ulog Galeel aur Juḍia ke rahin.

⁸Yarushalam ṭaaun, Idumea des, Joḍan nadi ke u paar Taaya (Tyre) aur Sidon ke agal bagal ke jagha ke log Yeeshu se mile aain, kaahe ke ulog Yeeshu ke achchha achchha kaam ke baare meñ sun leen raha.

⁹Yeeshu aapan chela log ke bataais, “Ek bauṭ hamaar khaatir taiyaar karo ki ham bheeṛ meñ dab nai jaai.”

¹⁰Yeeshu kaafi bimaar log ke ṭheek kar dees raha aur yahi kaaran se log ek dusra ke dhakka maarte aur ḍhakelte Yeeshu ke chhue maañgat rahin.

¹¹Jon log ke bhuut pakṛis raha ulog jeise Yeeshu ke dekhin, uske saamne gir paṛin aur chillaay ke bolin, “Tum Parmeshwar ke laṛka hei.”

¹²Aur Yeeshu bhuut log ke ḍaaṭis aur hukum dees, “Koi se kuchh nai bataana.”

¹³Yeeshu pahaaṛ pe chala gais aur jiske u bolaay maañgat raha, u sab ke bolaay lees, aur ulog uske lage aais.

¹⁴Yeeshu baarah chela ke chunis aur bataais ulog uske sañghe rahe, aur ulog ke parchaar kare ke bhejis

¹⁵aur bhuut nikaare ke khaatir hak dees aur bimaar log ke achchha kare ke bhejis.

¹⁶Baarah chela ke naam eise hei, Saayman jiske naam Yeeshu Peeṭa rakkhis raha.

¹⁷Jabdi ke laṛkan, ek Jeims aur dusra Yuhanna. U duuno bhaiya log ke naam Buanargis rakkhis jiske matlab ‘Garjan’ hoy hei.

¹⁸Enḍru, Filip, Bartimaais, Methiu, Thomas, Halfai ke laṛka Jeims, Taḍḍi, Saayman Kanaani,

¹⁹aur Juḍas Iskariyoti jon Yeeshu ke pakaṛwaais raha.

²⁰Yeeshu ghare gais lekin huañ bhi log aay ke uske gher leen, aur u khaana bhi nai khaay paais.

²¹Jab Yeeshu ke palwaar i baat sunin tab uske dekh bhaal kare lagin kaahe ke log bolat rahin ki u pagla hoy gais hei.

²²Yarushalam se jon paṛha likha log aain raha, ulog bhi bolin, “Usman Baalazbul hei, jon saitaan ke sardaar hei, aur wahi ke madat se bhuut nikaare hei.”

²³Yeeshu ulog ke nagichche bolaais aur riḍals sunaay ke samjhaawe ke kosis karis. “Keise ek saitaan dusra saitaan ke nikaare sake hei?”

²⁴Agar ek des meñ laṛaai hoy jaay aur apne meñ laṛe lage hei to u des bahut roj nai bachi.

²⁵Wahi rakam agar ek palwaar laṛe hei to u palwaar bahut roj nai rahi.

²⁶Ṭheek wahi rakam agar saitaan ke raaj meñ fuuṭ hoy jaay aur ek dusra ke birudh kaam kare lage to u raaj ke chale ke mushkil hei, aur uske ant jaruur hoy jaai.

²⁷Koi bhi ek tagṛa admi ke ghar ke bhittar jaay ke uske cheej nai chori kare sake jab tak pahile u tagṛa admi ke baañdh nai de. Uske baad meñ u admi sab cheej chori kare sake hei.

²⁸Ham tum se sachche bataata hei ki ek admi ke sab paap hiañ tak ki muñh se nikra sab buraai ke bhi maafi mili.

²⁹Lekin Pawitr Aatma ke buraai karewaala log ke maafi nai mili. U eisan paap hei jiske kabhi maaf nai kara jaay sake, aur u hardam paap ke apraadhi rahi.

³⁰Yeeshu i baat i khaatir bataais kaahe ke kuchh log bolat rahin ki Yeeshu meñ saitaan hei.

³¹Tab Yeeshu ke amma aur uske bhaiya aain. Ulog ghar ke bahire se uske bolaain.

³²Yeeshu ke chaaro bagal jon beiṭha rahin, usse bolin, “Dekho, tumhaar amma aur bhaiya tum se mile aain hei.”

³³Yeeshu bolis, “Kon hei hamaar amma, aur kon hei hamaar bhaiya?”

³⁴Agal bagal jon log beiṭhin raha uske dekh ke bolis, “Dekho, i hei hamaar amma, aur i hei hamaar bhaiya.

³⁵Jon admi Parmeshwar ke ichchha ke mutaabik kaam kare hei, wahi hamaar bhaiya, bahini aur hamaar amma hei.”