Read Hindi, Fiji Maak 4 Bible Online

Maak 4 - Hindi, Fiji bible

Maak 4

¹Yeeshu fir laik ke kinaare sab log ke sikhaay laga aur tamaam log sune ke waaste aain. Bheeṛ ke kaaran uske bauṭ meñ beiṭhe ke paṛa. Aur log laik ke kinaare khaṛa hoy ke sunat rahin.

²Yeeshu kahaani bataay ke log ke sikhaat raha, aur log ke shikhaay waala ṭaaim eise bolis,

³“Suno, ek kisaan bia bowe nikra.

⁴Bowe ke ṭaaim kuchh bia rasta ke kinaare gira, aur chiṛia log aay ke uske khaay leen.

⁵Kuchh bia patthar waala jameen meñ gira, jahañ bahut maṭṭi nai raha, aur i kaaran se jaldi se jam gais.

⁶Lekin jab ghaam nikra tab sab sukhaay gais kaahe ke uske jaṛ khali uppar raha.

⁷Kuchh bia kaaṭa waala jañgal meñ gira, u jañgal jab baṛa bhais, tab sab peṛ dab gais aur kuchh fal nai laay sakis.

⁸Kuchh bia achchha jameen meñ gira. U jamis, baṛa bhais aur koi tees (30) guna, koi saaṭh (60) guna aur koi sao guna fal laais.

⁹Yeeshu bolis, “Jiske ke lage kaan hei, ulog sun lo.”

¹⁰Jab Yeeshu akele raha, tab kuchh log baarah chela ke sañghe aay ke perabal ke matlab puuchhe lagin.

¹¹Tab Yeeshu ulog se bolis, “Parmeshwar ke raaj ke gahira baat ke samajh tumme dewa gay hei, lekin jon bahire ke hei ulog ke perabal meñ bataawe ke jaruuri hei.

¹²Kaahe ke ulog dekhi lekin dekhe nai paai, aur suni lekin samajh nai paai, ki kahiñ eise nai hoy ki ulog ke dil badal jaay aur Parmeshwar ulog ke maafi de dei.”

¹³Yeeshu ulog se bolis, “Agar tum log i kahaani ke nai samajh paaya to aur kahaani keise samjhega?”

¹⁴Bowewaala, Parmeshwar ke vachan bowe hei.

¹⁵Rasta ke kinaare girewaala bia u vachan hei jiske log sune hei lekin saitaan aay ke uske uṭhaay le jaay hei.

¹⁶Patthar waala maṭṭi meñ bowaan bia eisan log hei jon Parmeshwar ke vachan sune hei aur jaldi se uske maan le hei.

¹⁷Lekin uske jaṛ uppar hoy ke kaaran bahut roj tak jinda nai rahe. Jeise laaif meñ koi dukh aay aur Parmeshwar ke vachan ke kaaran koi takleef paṛa to ulog haar maan lewe hei.

¹⁸Jañgal meñ jon bia gira ulog ke rakam hei jon Parmeshwar ke vachan sun le hei.

¹⁹Lekin dunia ke wari, peisa ke laalach, aur rakam rakam ke kharaab bichaar aay se vachan ke dabaay de hei aur fal nai lage dewe hei.

²⁰Aur jon bia achchha maṭṭi meñ gira u bia u admi log ke rakam hei jon Parmeshwar ke vachan sun ke maan lewe hei aur tamaam fal laawe hei, koi tees guna, koi saaṭh guna aur koi sao guna.

²¹Yeeshu ulog se bolis, “Kaa tum log batti baar ke koi bartan ke nichche lukwaata hei ya khaṭia ke nichche rakhta hei? Kaa tum batti baar ke uppar nai rakhta hei?

²²Koi eisan cheej chhipaan nai hei jon saamne nai aawe, aur jon kuchh chhipaan hei, u saamne aai.

²³Agar tumhaar lage kaan hei to achchha se sun leo.

²⁴Yeeshu ulog se bolis, “Jon kuchh tum sunta hei, uske khuub dhyaan se suno. Jeise tum dusra ke sañghe karta hei, weise tumhaar sañghe bhi hoi, aur usse bhi kharaab hoy sake hei.

²⁵Jiske paas kuchh hei, uske aur dewa jaai, aur jon ke paas nai hei, usse to jon uske paas hei, u bhi le lewa jaai.”

²⁶Yeeshu fir bolis, “Parmeshwar ke raaj eisan hei jeise koi kisaan khet meñ bia chheeṭe hei.

²⁷U raat ke soy jaay hei aur din meñ jaga rahe hei. Udhar bia jam ke baṛa hote jaay hei, lekin u nai samajh paawe hei ki i keise hois hei.

²⁸Maṭṭi ke kaaran se bia jame hei, fuul patti lage hei aur fir daana lage hei.

²⁹Aur jeise daana pak jaay hei, kaaṭe ke ṭaaim aay jaay hei, tab u jurte hasua se kaaṭ lewe hei.

³⁰Yeeshu fir bolis, “Parmeshwar ke raaj kon cheej ke rakam hei, kon aur kahaani se ham iske baare meñ samjhaai?

³¹Parmeshwar ke raaj sarso ke daana ke rakam hei. Sarso ke daana bahut chhoṭa howe hei jab uske maṭṭi meñ bowa jaay hei.

³²Lekin jab u jam jaay hei to sab se baṛa peṛ hoy jaay hei. Peṛ ke ḍaali etna baṛa hoy jaay hei ki uske chhaaiñ meñ chiṛia log rahe ke waaste aapan ghar banaay lewe hei.”

³³Yahi rakam Yeeshu bahut kahaani bataay ke log ke samajh ke mutaabik vachan sunaawat raha.

³⁴U kahaani ke bina kuchh nai bataawat raha. Lekin pichchhe se akele meñ aapan chela log ke sab kahaani ke matlab samjhaay dewat raha.

³⁵Wahi roj jab sanjha bhais, tab Yeeshu aapan chela log se bolis, “Aao, ham log laik ke u paar chali.”

³⁶Aur ulog bheeṛ ke chhoṛ ke uske weisaiyeñ jeise u raha, bauṭ meñ beiṭh ke chal deen. Ulog ke sañghe aur bauṭ bhi gais.

³⁷Tab hawa jor se chale laga. Waivs uṭhe lagis, aur bauṭ meñ dhakka maare lagis, aur bauṭ ḍuube waala raha.

³⁸Yeeshu bauṭ ke pichchhe takiya leke sowat raha. Chela log uske jagaay ke bolin, “E Guru, kaa tumme ham log ke koi parwaah nai hei? Ham log to ḍuube waala hei.”

³⁹Yeeshu uṭh ke hawa ke ḍaaṭis aur paani se bolis, “Saanti hoy jaao!” Hawa ruk gais aur sab kuchh saanti hoy gais.

⁴⁰Tab Yeeshu chela log se bolis, “Tum log kaahe ḍarta hei? Kaa tum log ke lage biswaas nai hei?”

⁴¹Ulog bahut ḍar gain aur apne meñ bole lagin, “I kon hei? Hawa aur paani bhi iske hukum maane hei!”