Read Hindi, Fiji Maak 5 Bible Online

Maak 5 - Hindi, Fiji bible

Maak 5

¹Yeeshu aur uske saathi Galeel laik ke paar Garasinio ke des meñ pahuñchin.

²Yeeshu jeise bauṭ meñ se utris, weisaiyeñ ek admi jiske bhuut pakṛis raha, kabrastaan se nikar ke uske saamne aais.

³U kabrastaan meñ rahat raha aur koi uske chain se bhi baañdh ke nai rakkhe sakat raha.

⁴Ketna dafe uske hatkaṛi lagaay ke aur uske goṛ ke chain se baañdh ke rakkhat rahin, lekin u chain aur hatkaṛi duuno ṭukṛa ṭukṛa kar det raha aur koi ke lage etna himmat nai raha ki uske samhaare.

⁵Raat din u kabrastaan ya pahaaṛ pe chillaat raha aur patthar se apne aap ke choṭ pahuñchaat raha.

⁶U Yeeshu ke duur se dekhis aur dauṛ ke uske namaste karis.

⁷Aur jor se chillaay ke bolis, “E Yeeshu, Parmeshwar ke laṛka. Tumme ham se kon kaam hei? Parmeshwar ke naam se ham chirauri karta hei ki hamme nai sataao.”

⁸Yeeshu bhuut se bolis ki i admi meñ se nikar jaao.

⁹Yeeshu usse puuchhis, “Tumhaar naam kon cheej hei?” Tab u bolis, “Hamaar naam ‘Sena’ hei kaahe ke ham ḍher jan hei.”

¹⁰Aur u bahut chirauri karis ki uske bahire nai bheje.

¹¹Huañ pahaaṛ ke uppar suar ke ek baṛa jhunḍ charat raha.

¹²Bhuut log usse chirauri karin ki ulog ke suar meñ bhej de, ki ulog uske bhittar chala jaay.

¹³Yeeshu ulog ke hukum dees aur bhuut log nikar ke suar meñ chala gain, aur dui hajaar (2000) suar ke jhunḍ laik ke bagal jhapṭin aur usman ḍuub marin.

¹⁴Jon log suar ke charaawat rahin, bhaag ke ṭaaun aur gaaoñ meñ i baat bataain, aur log dekhe ke waaste aain ki kaa baat hei.

¹⁵Ulog Yeeshu ke paas aain aur dekhin ki u admi jisman bhuut raha, kapṛa pahin ke saanti se beiṭha hei. U log ḍar gain.

¹⁶Sab log jon dekhin ki kaa bhay raha, ulog bataain ki keise ek admi jiske bhuut pakṛis raha, achchha hoy gay aur suar keise ḍuub gain.

¹⁷Tab huañ ke log Yeeshu se chirauri kare lagin ki u, ulog u jagha se chala jaay.

¹⁸Jab Yeeshu bauṭ meñ beiṭhe laga, tab u admi jiske bhuut pakṛis raha, chirauri kare laga ki uske aapan sañghe rakkhe.

¹⁹Lekin Yeeshu uske baat nai maanis. U usse bolis, “Tum aapan ghare jaao, aur aapan log se bataao ki Prabhu tumhaar khaatir ketna baṛa kaam karis aur tumpe ketna daya dekhaais.”

²⁰U huañ se chala gais aur das ṭaaun meñ jiske Dikpulis ke naam se jaane hei, sab ke bataawe laga ki Yeeshu uske khaatir ketna baṛa kaam karis raha. Aur jon log i baat sunin, chakit rahe gain.

²¹Jab Yeeshu bauṭ se laik ke i paar aais tab ek baṛa bheeṛ uske lage baṭur gais. U laik ke kinaare raha.

²²Tab Jaayras naam ke ek admi aais, jon chech ke ek sardaar raha. Yeeshu ke jeise u dekhis, u uske goṛ pe gir paṛis.

²³U Yeeshu se bahut chirauri kar ke bolis, “Hamaar beṭi mare waali hei, tum aay ke uske uppar aapan haath rakh deo taaki u achchha hoy jaay, aur jinda rahe.”

²⁴Tab Yeeshu Jaayras ke sañghe gais aur pichchhe pichchhe ek baṛa bheeṛ bhi gais, hiañ tak ki bheeṛ Yeeshu ke uppar girat rahin.

²⁵Ek aurat baarah saal se khuun ke bahe ke bimaari se dukhi rahi.

²⁶U bahut ḍokṭa log ke lage gais. Bahut peisa kharcha karis, fir bhi kuchh faayda nai bhais, aur uske aur bhi haalat kharaab hote gais.

²⁷Yeeshu ke baare meñ u sunis raha aur u bheeṛ meñ pichchhe se aay ke uske kapṛa chhui lees.

²⁸U bolat rahi, “Agar ham uske kapṛa chhui lega, to ham achchha hoy jaayga.”

²⁹Jurte uske khuun bahe ke band hoy gais. Uske aapan deñhi meñ pata laga ki u bimaari se achchha hoy gais hei.

³⁰Wahi ṭaaim Yeeshu ke bhi pata chala ki uske deñhi se sakti nikris hei. Yeeshu pichchhe ghuum ke puuchhis, “Kon hamaar kapṛa chhuis?”

³¹Uske chela log usse bolin, “Tum dekhta hei ki bheeṛ tumhaar chaaro taraf laga hei! Kaahe tum puchhta hei ki kon hamme chhuis hei?”

³²Yeeshu jaane ke waaste ki kon uske chhuis hei, chaaro taraf dekhis.

³³Jab u aurat jaan gais ki u achchhi hoy gais hei, to ḍarte aur kaapte saamne aais aur Yeeshu ke goṛ pe gir paṛis, aur sab kuchh sachche sachche bataay dees.

³⁴Yeeshu usse bolis, “Beṭi, tumhaar biswaas tumme achchha kar dees hei. Saanti se jaao aur i bimaari se bache rahna.”

³⁵Jab Yeeshu i sab baat bolat raha, tab Jaayras ke ghar se kuchh log aain aur bolin, “Tumhaar beṭi mar gais hei, ab Guru ke tang nai karo.”

³⁶Yeeshu uske baat pe kuchh dhyaan nai dees aur chech ke sardaar se bolis, “Ḍaro nai, khali biswaas karo.”

³⁷Aur u Peeṭa aur Jeims ke bhaiya Yuhanna ke chhoṛ ke, aur koi ke aapan sañghe aawe nai dees

³⁸Jab ulog Jaayras ke ghare pahuñchin, tab ulog dekhin ki sab log meñ halchal macha hei, aur log rowe aur chillaawe hei.

³⁹Yeeshu bhittar jaay ke bolis, “Tum log kaahe ke rota aur halla machaata hei? Laṛki maris nai hei, khali sute hei.”

⁴⁰Log uske hasi kare lagin. Tab Yeeshu sab ke bahire nikaaris. Khali laṛki ke amma bappa aur aapan teen chela ke leke ruum meñ gais jahañ baarah saal ke laṛki rahis.

⁴¹U laṛki ke haath pakaṛ ke bolis, “Talitha kumi,” jiske matlab hei, “E chhoṭi laṛki, uṭho.”

⁴²Laṛki jurte uṭhis aur chale fire lagis. Sab log dekh ke hairaan rahe gain.

⁴³Yeeshu ulog ke hukum dees, “Koi i baat nai jaane paawe. Iske kuchh khaay ke deo.”