Read Hindi, Fiji Maak 6 Bible Online

Maak 6 - Hindi, Fiji bible

Maak 6

¹Huañ se nikar ke Yeeshu aapan ṭaaun meñ aais, aur chela log uske sañghe hoy leen.

²Sabat ke din u chech meñ sikhaay laga. Bahut log sunke hairaan hoy gain aur bole lagin, “Iske i sab baat kahañ se mila hei? Kahañ se iske i buddhi aur taagat mila ki i sab chamatkaari kaam kare sake hei?

³Kaa i wahi kaapenṭa nai hei, jon Meri ke laṛka hei? Kaa i Josaf, Jeims aur Saayman ke bhaiya nai hei? Aur kaa uske bahini log, ham log ke beech meñ nai rahe hei? Yahi kaaran sab log uske kaam se khusi nai hei.

⁴Yeeshu ulog se bolis, “Aapan des, aapan palwaar, aur aapan ghar ke chhoṛ ke aur kahiñ nabi ke apmaan nai howe hei.”

⁵Huañ pe u koi chamatkaari kaam nai dekhaay sakis, khali kuchh bimaar log pe haath rakh ke achchha kar dees.

⁶Yeeshu ulog ke abiswaas dekh ke hairaan bhais. U vachan sikhaay ke khaatir bagal ke gaaoñ meñ chala gais.

⁷Yeeshu baarah chela log ke bolaais aur dushṭ aatma ke uppar adhikaar deke dui dui karke bhej dees.

⁸Aur Yeeshu ulog ke hukum dees, “Rasta ke waaste laaṭhi chhoṛ ke aur kuchh nai lena, nai roṭi, nai jholi, aur pes meñ peisa bhi nai.

⁹Juuta pahin lena, lekin ek se jaada kapṛa nai le jaana.”

¹⁰Aage aur bhi samjhaais, “Koi jagha jaao, koi ghar pe, to ṭaaun chhoṛe tak wahi ghar pe rahna.

¹¹Agar koi jagha ke log tumme welkam nai kare aur tumhaar baat nai sune, to jaay ke ṭaaim aapan goṛ ke garda wahiñ jhaaṛ dena, kaahe ke eise ulog ke chetaaoni mili.”

¹²Chela log jaay ke sab log meñ man firaay ke baare meñ updes deen.

¹³Aur ulog bahut dushṭ aatma ke nikaarin aur bimaar log ke tel lagaay ke achchha karin.

¹⁴Raaja Heraḍ i sab baat sunis kaahe ke Yeeshu ke naam feil gais raha. Kuchh log bolat rahin, “Yuhanna baptisma de waala mar ke fir jinda hoy gay hei, aur wahi ke sakti se i kaam kare hei.”

¹⁵Kuchh log bolat rahin, “I Ilaayja hei,” lekin aur log bolat rahin, “I puraana nabi meñ se ek hei.”

¹⁶Jab Heraḍ sunis tab bolis, “I Yuhanna hei, jiske muuṛ ham kaṭwaay raha. Wahi jinda hoy gais hei.”

¹⁷Raaja Heraḍ saulja bhej ke Yuhanna ke pakaṛwaay ke jel meñ band kar dees raha, aur Heraḍiaas ke sañghe saadi kar lees raha.

¹⁸Yuhanna, Heraḍ se bataais raha, “Tumme aapan bhaiya ke aurat ke nai rakkhe ke chaahi, kaahe ke i kaanuun ke agaiñsṭ hei.”

¹⁹Yahi kaaran se Heraḍiaas, Yuhanna se jaran karat rahi, aur maañgat rahi ki uske marwaay de, lekin u kuchh kare nai sakat rahi.

²⁰Heraḍ, Yuhanna ke ek achchha aur pawitr admi jaan ke usse ḍarat raha, aur uske praan ke rakchha karat raha. U Yuhanna ke baat ke bahut prem se sunat raha, lekin baat sun ke ghabraay jaat raha.

²¹Ek achchha ṭaaim pe Heraḍ aapan janam din pe darbaari, senapati aur Galeel ke baṛa log ke bhoj meñ neota dees.

²²Heraḍiaas ke laṛki bhittar aais aur naach ke Heraḍ aur uske mehmaan log ke khusi kar dees. Raaja laṛki se bolis, “Jon cheej tum maañgta hei, ham tumme dega.”

²³U kasam khaay ke bolis, “Jon bhi kuchh tum maañgegi, ham tumme dega, chaahe u hamaar aadha raaj kaahe nai hoy.”

²⁴Laṛki bahire jaay ke aapan amma se puuchhis, “Ham kon cheej maañgi?” Uske amma bolis, “Yuhanna ke muuṛ.”

²⁵U dauṛ ke bhittar gais aur bolis, “Ham mañgta hei ki tum hamme ek thariya meñ Yuhanna ke muuṛ abhi deo.”

²⁶Raaja bahut pastaais, lekin mehmaan ke saamne jon vachan dees raha, u uske tuuṛe nai sakis.

²⁷Tab raaja jurte ek saulja ke bhejis aur hukum dees ki Yuhanna ke muuṛ kaaṭ ke huañ laawe.

²⁸U jel meñ jaay ke Yuhanna ke muuṛ kaaṭis, aur ek thariya meñ rakh ke laais aur laṛki ke dees, aur laṛki aapan amma ke dees.

²⁹Jab Yuhanna ke chela log i sunin, tab ulog aay ke uske boḍi le gain aur kabar meñ gaaṛ deen.

³⁰Chela log Yeeshu ke paas aay ke, jon kuchh ulog kare rahin ya sikhaay rahin, sab bataain.

³¹Tab Yeeshu ulog se bolis, “Aao, hamaar sañghe alge jagha chalo aur kuchh araam karo.” Kaahe ki bahut log aate jaate rahin aur ulog ke khaana khaay ke bhi mauka nai milat raha.

³²Yeeshu aur uske chela log bauṭ meñ beiṭh ke ek suunsaan jagha meñ chala gain.

³³Lekin sab log ulog ke jaate dekhin aur cheenh gain. Ulog ṭaaun ke rasta se dauṛ ke Yeeshu se pahile huañ pahuñch gain.

³⁴Yeeshu bauṭ se utar ke u bhaari bheeṛ ke dekhis aur uske daya aay gais, kaahe ke ulog bheṛa ke rakam rahin, jiske koi shepaḍ nai hei. Yeeshu ulog ke bahut rakam ke baat sikhaay lagis.

³⁵Bahut deri hoy gais raha. Chela log Yeeshu ke paas aay ke bolin, “I ek suunsaan jagha hei aur ṭaaim bahut hoy gais hei.

³⁶Sab log ke jaay deo, taaki ulog gaaoñ aur basti meñ jaay ke aapan waaste kuchh khaana khareede saki.

³⁷Lekin Yeeshu ulog ke jawaab dees, “Tumahi log ilog ke kuchh khaay ke deo.” Ulog bolin, “Kaa ham jaada peisa kharcha karke khaana laai, aur ilog ke khaawe ke dei?”

³⁸Yeeshu ulog se puuchhis, “Tum log ke lage ketna roṭi hei? Jaay ke pata lagaao.” Ulog jaay ke pata lagaain aur Yeeshu ke bataain ki huañ paañch roṭi aur dui machhri hei.

³⁹Tab Yeeshu bolis ki sab log ke graas pe ek ek jhunḍ meñ beiṭhaay deo.

⁴⁰Log pachaas pachaas (50) aur sao sao ke jhunḍ meñ beiṭh gain.

⁴¹Tab Yeeshu paañch roṭi aur dui machhri leke uupar asmaan ke bagal dekh ke aasheesh maañgis. Yeeshu roṭi tuuṛ ke chela log ke dees ki sab log ke baaṭ de. Yahi rakam Yeeshu dui machhri ke bhi sab log meñ baaṭ dees.

⁴²Sab log jetna maañgin otna khaain.

⁴³Chela log bacha kucha roṭi aur machhri ke tukṛa baarah baaskeṭ bhar ke baṭorin.

⁴⁴Khaana khaay waala paañch hajaar log rahin.

⁴⁵Wahi lage Yeeshu chela log ke bauṭ meñ beiṭhe ke bataais, taaki chela log Yeeshu se pahile laik ke u paar Beithseida pahuñch jaay aur Yeeshu apne bheeṛ ke bheje ke waaste ruk gais.

⁴⁶Jab sab log ke bhej dees tab preya kare ke waaste pahaaṛ pe chala gais.

⁴⁷Aur jab sanjha bhais, tab bauṭ laik ke beech meñ raha aur Yeeshu akele kinaare pe raha.

⁴⁸Jab u dekhis ki chela log hawa ke agaiñsṭ bauṭ khewe meñ takleef uṭhaay hei, tab Yeeshu ulog ke taraf laik pe chal ke aais. Sabere teen se chhe baje ke beech ke ṭaaim raha. Yeeshu ulog se aage nikar jaay maañgat raha.

⁴⁹Lekin ulog Yeeshu ke paani pe chalte dekh ke samjhin ki bhuut hei, aur chillaay lagin.

⁵⁰Kaahe ke sab log uske dekh ke ghabraay gain. Lekin Yeeshu jurte ulog se bolis, “Himmat rakkho! Ham hei, ḍaro nai.”

⁵¹Aur Yeeshu ulog ke sañghe bauṭ meñ beiṭh gais aur hawa ruk gais. Ulog hairaan hoy gain.

⁵²U log abhi bhi u roṭi ke baare meñ nai samajh paain kaahe ke ulog ke dil kaṛa hoy gais raha.

⁵³Yeeshu aur uske chela log, laik paar karke Ganesarat pahuñchin aur bauṭ kinaare lagaain.

⁵⁴Aur jab ulog bauṭ se utrin, to huañ ke log Yeeshu ke cheenh gain.

⁵⁵Agal bagal ke gaaoñ aur basti ke log dauṛ paṛin aur jahañ jahañ log sunin ki Yeeshu aawe hei, wahiñ pe bimaar log ke laawe lagin.

⁵⁶Aur jahañ kahiñ Yeeshu gaaoñ, ṭaaun ya basti meñ jaawat raha, log bimaar log ke bajaar meñ le jaay ke binti karat rahin ki Yeeshu ulog ke aapan kapṛa ke koi bhaag chhue ke mauka de. Jon koi uske chhuwat rahin, u sab achchha hoy jaawat rahin.