Read Hindi, Fiji Maak 7 Bible Online

Maak 7 - Hindi, Fiji bible

Maak 7

¹Farisi aur Yarushalam se jon aain raha, usman se kuchh Shaastri, Yeeshu ke lage baṭurin.

²U log dekhin ki Yeeshu ke kuchh chela log bina haath dhoy khaana khaay hei.

³Kaahe ke Farisi aur Yahuudi puraana riwaaj ke rakam haath dhoy bina khaana nai khaay hei.

⁴U log bajaar se aay ke jab tak u sab cheej ke dhoy nai lewe, tab tak uske nai khaay. Aur bhi bahut reeti riwaaj ke maanat rahin, jeise ki pyaala, loṭa aur taamba ke bartan ke dhoy maajo.

⁵Farisi aur Shaastri log Yeeshu se puuchhin, “Kaa kaaran hei, ki tumhaar chela log aapan baap daada ke reeti riwaaj ke nai maane hei aur meila haath se khaana khaay lewe hei?”

⁶Yeeshu jawaab dees, “Aayzaaya nabi tumhaar rakam paakhanḍi ke baare meñ ṭheek profasi karis raha, jeise Baaibal meñ likhaan hei, “I log muñh se hamaar baṛaai kare hei. Lekin ilog ke dil ham se duur hei.

⁷I log bekaar hamaar puuja kare hei, kaahe ke i admi ke banaawal ruuls eise sikhaay hei ki jeise janaay hei ki i Parmeshwar ke dewal ruuls hei.”

⁸“Tum Parmeshwar ke ruuls ke chhoṛ ke admi ke reeti riwaaj ke pakṛe rahta hei.”

⁹Yeeshu ulog se i bhi bolis, “Tum aapan reeti riwaaj paalan kare ke waaste, chalaaki se Parmeshwar ke hukum ke tuuṛ deta hei.

¹⁰Maozas bataawe hei, ‘Aapan amma bappa ke aadar karo, aur jon aapan amma bappa ke buraai kari uske maut ke saja mili.’

¹¹Lekin tum log bolta hei ki agar koi admi aapan bappa ke ya to aapan amma se bole, ‘Jon kuchh ham se tumme mile ke raha u sab Parmeshwar ke de deta hei.’

¹²To u roj se fir uske aapan amma ya to bappa ke waaste kuchh nai kare deta.

¹³Yahi rakam tum aapan reeti riwaaj sikhaay ke Parmeshwar ke vachan ke haṭaay deta hei. Aur tum eisane kaam karte rahta hei.”

¹⁴Yeeshu bheeṛ ke fir aapan lage bolaais aur bolis, “Tum sab hamme suno aur samjho.

¹⁵Eisan koi cheej nai hei jon bahire se admi ke bhittar jaay ke uske meila kar dewe hei. Lekin jon cheej admi ke bhittar se bahire nikre hei, wahi uske meila kare hei.”

¹⁶Koi ke paas agar sune ke khaatir kaan hei to suno.

¹⁷Jab Yeeshu bheeṛ ke chhoṛ ke ghar ke bhittar aais, tab uske chela log usse u kahaawat ke matlab puuchhin jon sab u bolis raha.

¹⁸Yeeshu ulog se bolis, “Kaa tum log bhi nai samajhta hei? Kaa tumhaar samajh meñ nai aais ki koi cheej jon bahire se admi ke bhittar jaay hei, uske meila nai kare sake?

¹⁹Kaahe ke u uske man meñ nai lekin peṭ meñ jaay hei aur bahire nikar jaay hei.” Eise bol ke Yeeshu sab khaay piye ke cheej ke safa bataais hei.

²⁰Aur u aage bolis, “Jon admi ke bhittar se nikre hei, wahi uske meila kare hei.

²¹Kaahe ke admi ke bhittar se, yaane man se kharaab kharaab bichaar nikre hei jeise ki luchpan, chori, hatya.

²²Aḍalṭri, laalach, jaran, chhal kapaṭ, ninda, dushṭta, ghamanḍ aur paglaapan.

²³I sab buraai man se nikre hei aur admi ke meila kar dewe hei.”

²⁴Fir u huañ se uṭh ke Taaya (Tyre) siṭi ke lage aais aur ek ghar meñ gais. U maañgat raha ki koi nai jaane ki u huañ hei, lekin u luke nai sakis.

²⁵Aur wahi lage ek aurat jiske chhoṭi beṭi meñ saitaan raha, uske charcha sunke aais, aur uske goṛ pe gir paṛis.

²⁶I aurat Greek aur Suurufiniki jaat ke rahi. U Yeeshu se binti karis ki u uske beṭi meñ se bhuut nikaar de.

²⁷Yeeshu bolis, “Pahile laṛkan ke khaawan deo, kaahe ki i ṭheek nai hei ki laṛkan ke roṭi leke kutta log ke aage feka jaay.”

²⁸Aurat jawaab dees, “Sachche hei Prabhu ji, lekin kuttan ke bhi bacha kucha tukṛa ṭaibal ke nichche khaay ke mil jaay hei.”

²⁹Yeeshu bolis, “Aapan jawaab ke kaaran tum jaay sakta hei. Tumhaar beṭi se bhuut nikar gais hei.”

³⁰Jab u ghare aais tab u dekhis ki laṛki khaṭia pe leṭis hei aur usman se bhuut nikar gais hei.

³¹Fir Yeeshu Taaya (Tyre) aur Seida ke des se nikar ke Dikpulis des se hoy ke Galeel ke laik pe pahuñchis.

³²Huañ log uske lage ek admi ke laain jon bahira raha aur tutlaat raha. U Yeeshu se binti karis ki u aapan haath uspe rakh de.

³³Tab u uske bheeṛ se alge le gais, aur aapan uñgri uske kaan meñ ḍaaris, aur thuuk ke uske jeebh chhuis.

³⁴Fir u asmaan ke bagal dekh ke lamba saas lees aur u admi se bolis, “Efatha” jis ke matlab hei “Khul jaao.”

³⁵U wahi lage sune laga, aur safa safa baat kare laga.

³⁶Yeeshu sab log ke hukum dees ki i sab baat ulog koi se nai bataay, lekin jetna Yeeshu rokis raha, otna sab log uske parchaar kare lagin.

³⁷U log bahut chakit rahin, aur bolat rahin, “I jon kaam kare hei, achchha hee kare hei. U bahira log ke sune ke aur guuñga log ke bole ke taagat dewe hei.