Read Hindi, Fiji Maak 8 Bible Online

Maak 8 - Hindi, Fiji bible

Maak 8

¹U ṭaaim ke baat hei, jab fir baṛa bheeṛ jama hoy gais, aur ulog ke paas kuchh khaawe ke nai raha, to Yeeshu aapan chela log ke aapan paas bolaay ke bolis,

²“Hamme i bheeṛ pe daya aawe hei, kaahe ke ilog teen din se baraabar hamaar sañghe hei, aur ulog ke lage khaawe ke kuchh bhi nai hei.

³Agar ham ilog ke ghare bhuuka bhej dei, to ilog rasta meñ behosh hoy jahiyeñ, kaahe ke ilog meñ se kuchh log to duur se aain hei.”

⁴Chela log jawaab deen, “I suunsaan jagha meñ etna log ke waaste etna khaana kahañ se aai?”

⁵Yeeshu puuchhis, “Tumhaar lage ketna roṭi hei? U log bolin, “Saat.”

⁶Yeeshu sab log ke jameen pe beiṭh jaay ke bolis. U saat roṭi leke, dhanbaad dees aur uske tuuṛ ke baaṭe ke waaste chela log ke dees.

⁷Ulog ke paas kuchh chhoṭa machhri bhi raha. Yeeshu aasheesh maañg ke uske bhi baaṭe ke waaste dees.

⁸Sab peṭ bhar ke khaana khaain. Chela log bacha kucha tukṛa se saat baaskeṭ bharin.

⁹Khaana khaay waala log kul milaay ke chaar hajaar rahin. Yeeshu sab log ke bhej dees.

¹⁰Aur Yeeshu jurte aapan chela log ke sañghe bauṭ meñ beiṭh ke Daalmanuuta chala gais.

¹¹Farisi log aain aur Yeeshu se baad-bibaad kare lagin aur uske ṭesṭ kare ke waaste usse swarag ke koi saain maañgin.

¹²Yeeshu gahira saas leke bolis, “I ṭaaim ke log kaahe saain khoje hei? Ham tum se sachche bolta hei, ki koi saain nai dewa jaai.”

¹³Yeeshu sab log ke chhoṛ ke bauṭ meñ beiṭh ke u paar chala gais.

¹⁴Chela log khaana laawe ke bhuul gain aur bauṭ meñ ulog ke lage khali ek roṭi raha.

¹⁵Yeeshu ulog ke chetaaoni dees, “Dekho, Farisi log ke yeesṭ aur Heraḍ ke yeesṭ se bach ke rahna.”

¹⁶U log apne meñ baat karat rahin ki ulog ke lage roṭi nai hei, aur yahi kaaran Yeeshu eise bole hei.

¹⁷Yeeshu jaan gais aur puuchhis, “Tum i baat meñ kaahe paṛa hei ki tumhaar lage khaay ke kuchh nai hei? Kaa tum log abhi bhi nai jaana? Kaa abhi bhi tumhaar samajh meñ nai aais?

¹⁸Aañkhi rakh ke, tum dekhta nai, aur kaan rakh ke bhi, tum sunta nai. Kaa tumme kuchh yaad nai hei?

¹⁹Jab ham paañch hajaar log ke beech paañch roṭi tuuṛa raha, to tum log tukṛa se bhara ketna baaskeṭ uṭhaay raha?” U log jawaab deen, “Baarah.”

²⁰Yeeshu fir puuchhis, “Aur jab ham chaar hajaar log ke beech saat roṭi tuuṛa raha, to tukṛa se bhara ketna baaskeṭ uṭhaay raha?” U log bolin, “Saat.”

²¹Yeeshu bolis, “Kaa tumme abhi bhi samajh meñ nai aais?”

²²Yeeshu Beitseida meñ aais. Kuchh log Yeeshu ke lage ek añdha admi ke laain aur Yeeshu se binti karin, ki u admi ke chhue.

²³Yeeshu añdha admi ke haath pakṛis aur uske gaaoñ se bahire le gais, aur uske aañkhi meñ thuuk ke aapan haath rakkhis aur usse puuchhis, “Kaa tumme kuchh dekhaay hei?”

²⁴U uppar dekh ke bolis, “Ham admi log ke dekhe sakta hei, lekin eise janaay hei ki ulog chalat firat peṛ hei.”

²⁵Tab Yeeshu fir aapan haath uske aañkhi pe rakkhis. Añdha dhyaan se dekhis. Uske aañkhi ṭheek hoy gais raha, aur u sab kuchh safa safa dekhe laga.

²⁶Yeeshu usse bolis, “I gaaoñ meñ goṛ nai rakhna,” aur uske ghare bhej dees.

²⁷Yeeshu aur uske chela log Kaisaria Filippi ke gaaoñ meñ chala gain. Rasta meñ Yeeshu aapan chela log se puuchhis, “Log hamme kaa bole hei?”

²⁸Ulog jawaab deen, “Koi koi bole ki tum Yuhanna baptisma de waala hei, aur koi koi bole hei ki tum Ilaayja hei, lekin koi koi bole hei ki tum koi naa koi nabi hei.”

²⁹Tab Yeeshu puuchhis, “Lekin tum kaa bolta ki ham kon hei?” Peeṭa jawaab dees, “Tum Maseeha hei.”

³⁰Is pe Yeeshu chela log ke chetaaoni dees ki uske baare meñ koi se kuchh nai bataana.

³¹Yeeshu chela log se bataais ki i bahut jaruuri hei ki Manush ke laṛka dukh uṭhaawe. U elḍa log, baṛa paadri aur Shaastri log ke najar meñ kharaab samjha jaai, maar dewa jaai, aur teen din baad jinda hoy jaai.

³²Yeeshu i sab baat ulog se safa safa bataay dees. Is pe Peeṭa Yeeshu ke alge le jaay ke bolis ki u chuppe rahe.

³³Yeeshu ghuum ke aapan chela log ke dekhis aur Peeṭa ke ḍaaṭ ke bolis, “Saitaan, hamaar lage se chala jaao! Tum bhi dusra log ke rakam sochta hei, Parmeshwar ke rakam nai.”

³⁴Yeeshu aapan chela log ke sañghe aur sab log ke bolaais aur bolis, “Jon koi hamaar pichchhe aawe maañge hei, to apne aap ke bhulaay ke, aapan kros uṭhaay ke, hamaar pichchhe aay jaao.

³⁵Jon koi aapan jaan bachaawe maañgi, to uske khoy dei, lekin jon koi aapan jaan hamaar waaste aur Parmeshwar ke vachan ke waaste dewe maañgi, uske jaan bach jaai.

³⁶Agar koi admi dunia meñ sab cheej paay lewe hei, lekin aapan jaan khoy de hei to uske kaa faayda?

³⁷Admi aapan jaan ke badle meñ kon cheej de saki?

³⁸Agar koi bhi admi i beimaan aur paapi log ke beech meñ hamaar aur hamaar vachan se sarmaai to Manush ke laṛka bhi ulog se sarmaai, jab u aapan Pita ke mahima meñ pawitr ainjals ke sañghe aai.”