Read Hindi, Fiji Luuk 10 Bible Online

Luuk 10 - Hindi, Fiji bible

Luuk 10

¹Baad meñ Prabhu bahattar (72) aur admi log ke chunis aur dui dui karke u sab ṭaaun meñ usse aage bhejis jahañ uske jaay ke raha.

²Yeeshu ulog se bolis, “Khet meñ bahut jaada fasal hei, lekin bahut kamti majuur log hei. Yahi kaaran khet ke maalik se bolo, ki u kaaṭe ke waaste majuur bheje.

³Ab jaao, lekin yaad rakhna, ham tumme bheṛiya log ke beech meñ bheṛa ke bachcha ke rakam bhejta hei.

⁴Aapan sañghe naa to aapan pes, naa to juuta, aur naa beg leke jaana, aur rasta bhar koi ke namaste bhi nai karna.

⁵Jab bhi koi ghar meñ jaana, to pahile bolna, “I ghar meñ saanti rahe.”

⁶Agar huañ koi saanti se rahat hoi, to tumhaar saanti uspe rahi nai to u tumhaar lage lauṭ aai.

⁷Wahi palwaar meñ rahna, wahiñ khaana aur peena jon ulog tumme dei, kaahe ke naukar ke talab to mile ke chaahi. Ek ghar se dusra ghar nai ghuumna.

⁸Jab tum koi ṭaaun meñ jaayga, aur ulog tumhaar welkam kari, aur kuchh khaay ke dei to khaay lena.

⁹Huañ ke bimaar log ke achchha karna aur bolna, “Parmeshwar ke raaj tumhaar nagichche aay gais.”

¹⁰Lekin agar u ṭaaun ke log tumhaar welkam nai kari, to rasta pe jaay ke bolna,

¹¹“Ham sab tumhaar ṭaaun ke garda jon hamaar goṛ meñ lag gais hei, hiañ pe jhaaṛta hei. Lekin yaad rakkho Parmeshwar ke raaj tumhaar nagichche aay gais hei.”

¹²Ham tumme bataata hei jon roj nyaay kara jaai, u roj Prabhu u ṭaaun ke dasa Sodom ke dasa se bhi kharaab kar dei.

¹³E Khuraazin! Aur Bethseida ke log! Tum pe haay! Jon chamatkaari kaam tumhaar sañghe bhais hei, agar u sab Taaya (Tyre) aur Seida meñ kara jaata, to huañ ke log bahut pahile Parmeshwar se maafi maañg leta. Ulog basta ke kapṛa pahin ke aur raakhi pe beiṭh ke, i dekhaatin ki ulog paap se dukhi hei.

¹⁴Lekin nyaay ke roj Parmeshwar, Taaya (Tyre) aur Seida ke log pe tum se jaada daya dehkaai.

¹⁵E Kafarnahuum ke log, kaa tum sochta hei ki swarag meñ tumme aadar mili! Kabhi nai, tum to narak jaruur jaayga.

¹⁶Jon koi bhi tumhaar sune hei, u hamaar bhi sune hei. Jon koi tumme ‘Nai’ apnaay hei, u hamme bhi “Nai’ apnaay. Aur jon bhi hamme ‘Nai’ apnaai, u jon hamme bhejis hei, uske bhi ‘Nai’ apnaai.

¹⁷Jab u bahattar (72) log lauṭin, to ulog bahut khusi rahin. Ulog bolin, “E Prabhu, tumhaar naam se to dushṭ aatma bhi hamaar baat maanat rahin!”

¹⁸Yeeshu ulog se bolis, “Ham saitaan ke, bijli ke rakam swarag se girte dekha hei.

¹⁹Ham tum log ke saañp aur bichchhu ke kachre ke aur tumhaar dusman, saitaan ke taagat ke uppar hak dia hei. Tumme kuchh haani nai hoy sake hei.

²⁰Lekin isse khusi nai hona, ki dushṭ aatma tumhaar bas meñ hei. Lekin i kaaran khusi hona ki tumhaar naam swarag meñ likha gais hei!”

²¹Wahi ṭaaim, Yeeshu u khusi jon Pawitr Aatma ke bagal se aais raha, usse bhar gais, aur bolis, “E Pita, swarag aur dharti ke Prabhu, ham tumme dhanbaad deta hei, ki tum i sab baat paṛha likha aur samajhdaar log se chhipaay ke rakkha, aur saadhaaran log ke saamne laaya. Haañ Pita ji, yahi tumme achchha laga.

²²Hamaar Pita hamme sab kuchh de dees hei, aur wahi hei jon laṛka ke jaane hei. Aur Pita ke bhi khali laṛka jaane hei. Aur laṛka aapan baap ke baare meñ bataay maañge hei, ki jisse sab koi uske baare meñ jaane sake.”

²³Tab Yeeshu aapan chela log ke bagal ghuum ke chuppe se bolis, “Tum pe aasheesh hei ki jon tum i sab dekhta hei!

²⁴Ketna raaja aur nabi log, i sab dekhe aur sune maañgat rahin, jon tum abhi dekha aur suna hei. Lekin ham tum se bataata hei, ki ulog naa to kuchh dekhin aur naa to kuchh sunin.”

²⁵Ek Maozas ke kaanuun ke guru uṭh ke Yeeshu se puuchhis, “Guru, ham kon cheej kari ki hamme anant jeewan mile?”

²⁶Yeeshu jawaab dees, “Baaibal meñ kon cheej likhaan hei? Tum uske keise samajhe sakta hei?”

²⁷U admi jawaab dees, “Baaibal meñ likha hei, ‘Tum aapan Prabhu Parmeshwar se aapan puura man aur jaan se aur aapan puura taagat, aur aapan puura buddhi se prem karo. Aur aapan paṛosi se bhi apne rakam prem karo.’ ”

²⁸Yeeshu bolis, “Tum hamme raaiṭ jawaab dia hei. Agar eisehiyeñ karte rahega, tab anant jeewan mil jaai.”

²⁹Lekin u admi janaay maañgat raha ki u sab kuchh jaane hei, aur Yeeshu se ek aur sawaal puuchhis, “Hamaar paṛosi kon hei?”

³⁰Yeeshu bolis, “Ek admi raha, jon Yarushalam se Jeriko jaat raha, rasta meñ uske ḍaaku log gher leen, aur uspe hamla kar deen. Uske kapṛa utaar ke, aur maar peeṭ ke uske adhmara kar ke, wahiñ chhoṛ ke chala gain.

³¹Ek paadri wahi rasta se jaat raha, lekin jab u choṭaan admi ke dekhis, tab u dusra bagal se chala gais.

³²Wahi rakam ek Levi bhi wahi rasta se aais, aur u choṭaan admi ke dekhis aur u bagal se chala gais.

³³Tab ek Saamri jon ghuume nikra raha, wahi rasta se aais, aur u choṭaan admi ke dekh ke daya karis.

³⁴Aur uske lage aay ke uske ghaao pe tel aur waain ḍaar ke uske marham paṭṭi karis, aur gadha pe beiṭhaay ke ek hoṭel le gais, aur wahiñ uske dekh bhaal karis.

³⁵Dusra roj sabere u hoṭel ke maalik ke dui chaañdi ke sikka deke bolis, “Iske dekh bhaal karna aur jab ham lauṭ ke aayga, tab jetna bacha kucha rahi ham sab bhar dega.” ’

³⁶Tab Yeeshu puuchhis, “I teeno meñ se kon uske paṛosi hei, jon ke ḍaaku log maar ke choṭ pahuñchaain raha?”

³⁷U ṭeecha jawaab dees, “Wahi jon uspe taras khaais raha.” Yeeshu bolis, “Jaao, aur eisehiyeñ karo!”

³⁸Yeeshu aur uske chela log jaate jaate ek gaaoñ pahuñchin, aur huañ pe Maatha naam ke ek aurat ulog ke welkam karis aur ghare le gais.

³⁹Maatha ke ek bahini rahi, jiske naam Meri raha, aur jon Prabhu ke goṛ ke lage beiṭh ke uske updes sunat rahi.

⁴⁰Maatha kaam karte karte dukhi hoy gais aur u Yeeshu ke lage jaay ke bolis, “E Prabhu, kaa tumme koi parwaah nai, ki hamaar bahini sab kaam hamaar uppar chhoṛ dees hei? Usse bolo ki u aay ke hamaar madat kare!”

⁴¹Prabhu jawaab dees, “Maatha, Maatha! Tum bahut baat ke waaste wari karti aur dukhi hoti hei,

⁴²lekin ek baat ke jaruuri hei. Meri wahi cheej chunis, jon sab se achchha hei, aur u usse nai chheena jaai.”