Read Hindi, Fiji Luuk 12 Bible Online

Luuk 12 - Hindi, Fiji bible

Luuk 12

¹Jab ki hajaar meñ log Yeeshu ke agal bagal jama hoy gain, hiañ tak ki dhakkam dhukka aur ek dusra ke uppar girat paṛat rahin, tab Yeeshu sab se pahile aapan chela log se bolis, “Farisi log ke jhuuṭa parchaar se bach ke rahna. Ulog to yahi rakam ke log ke beokuuf banaay hei.

²Jon kuchh bhi lukaan hei u saamne aai, aur sab seekraṭ bhi saamne aai.

³Jon kuchh bhi tum añdhera meñ bolega u sab ujaala meñ sunaai dei, aur jon bhi tum band ruum meñ fusfusaayga, u chhat pe se parchaar kara jaai.”

⁴“E dost, ham tum sab se bataata hei, log se nai ḍarna. Ulog tumme maar dei, lekin uske baad, ulog aur kuchh nai kare sake hei.

⁵Khali Parmeshwar hei jisse, tumme ḍare ke hei. U khali tumhaar jaan nai lei, lekin u tumme narak meñ bhi feke sake hei. Yahi khaatir khali Parmeshwar hei jisse tum ḍaro!”

⁶“Kaa paañch chiṛia khali dui peisa meñ nai bikaay hei? Lekin Parmeshwar usman se ek ke bhi nai bhulaay hei.

⁷Hiañ tak ki tumhaar muuṛ ke ek ek baar bhi gina gais hei. Yahi khaatir, nai ḍaro! Tum to bahut chiṛia se bhi jaada keemti hei!”

⁸“Agar tum sab ke bataayga ki tum hamaar hei, tab Manush ke laṛka, Parmeshwar ke ainjals se bataai ki tum sab hamaar pichchhe chalta hei.

⁹Lekin agar tum log manush ke saamne hamme nai apnaayga, tab tum log bhi Parmeshwar ke ainjal ke saamne nai apnaawa jaayga.

¹⁰Agar tum Manush ke laṛka ke agaiñsṭ baat karega, tab tum maaf kar dewa jaayga, lekin agar tum Pawitr Aatma ke agaiñsṭ baat karega, tab tum maaf nai kara jaayga.”

¹¹“Jab tumme ofisa log ke saamne laawa jaai, tab tum chinta nai karna ki tum aapan bachaao meñ kaa bolega.

¹²Kaahe ke Pawitr Aatma tumme wahi ṭaaim bataai ki tumme kon cheej bole ke hei.”

¹³Bheeṛ meñ se ek admi Yeeshu se bolis, “Guru, hamaar bhaiya se bolo ki u hamaar sheya, jon hamaar bappa ham log ke khaatir chhoṛ gais raha, hamme de de.”

¹⁴Yeeshu usse bolis, “Hamme kon u adhikaar dees hei ki ham tum log ke jaj bani aur sheya baaṭi?”

¹⁵Tab Yeeshu ulog se bolis, “Saaodhaan raho, aur laalach se apne aap ke bachaao, kaahe ke koi ke jeewan uske dhan daulat se baṛa nai hoy hei.”

¹⁶Aur Tab Yeeshu i kahaani sunaais, Ek dhani admi ke khet meñ khuub fasal bhais,

¹⁷aur u aapan man meñ sochis, “Ham kon cheej kari? Hamaar lage to i sab rakkhe ke etna baṛa jagha nai hei.”

¹⁸Baad meñ u bolis, “Ham janta hei ki hamme kon cheej kare ke hei. Ham aapan i godaam tuuṛ ke aur baṛa godaam wahiñ pe banaayga, aur wahi meñ ham aapan sab anaaj aur baaki cheej bhi rakkhega.

¹⁹Aur tab ham apne aap se bolega, ‘Tum aapan waaste bahut saal ke khaatir cheej baṭor lia hei. Ab jio! Khaao, pio, aur mauj masti karo!’

²⁰Lekin Parmeshwar usse bolis, ‘Beokuuf! Tum aaj raat ke mar jaayga. Tab jon sab cheej tum baṭora hei u kiske hoi?” ’

²¹“Eisane u admi hei jon aapan waaste peisa baṭore hei, lekin Parmeshwar ke najar meñ dhani nai hei.”

²²Tab Yeeshu aapan chela log se bolis, “Ham tum log se bataata hei ki aapan jeewan ke waaste wari nai karo! I nai socho ki tum kon cheej khaayga aur kon cheej pahinega.

²³Khaana aur kapṛa se kahiñ jaada baṛh ke jeewan hei.

²⁴Kaua ke dekho! Ulog naa to kuchh bowe hei aur naa to kaaṭe hei, aur ulog ke lage rakkhe ke waaste jagha bhi nai hei. Lekin Parmeshwar u sab ke dekh bhaal kare hei! Aur tum to i chiṛia se jaada keemti hei!

²⁵Tum log meñ se kon hei jon wari kare se aapan jeewan lamba kare lei?.

²⁶Agar tum chhoṭa chhoṭa kaam nai kare sakta tab aur baat ke wari kaahe karta?

²⁷Dekho keise jañgli fuul fulaay hei! Ulog mehnat kar ke aapan kapṛa nai banaay hei. Aur i bhi sun lo, Soloman bhi aapan sab peisa se, i fuul ke rakam kapṛa nai pahine sakis.

²⁸Parmeshwar to jañgli graas ke bhi jon aaj hei aur kal aagi meñ feñk dewa jaai, u sab ke sundar sundar kapṛa pahinaay hei, to tumme kaahe nai pahinaai? Tumhaar biswaas ketna chhoṭa hei!

²⁹Wari nai karo ki kaa khaay ke hei aur kaa piye ke hei.

³⁰Khali wahi log jon Parmeshwar ke nai jaane hei, i sab cheej ke khaatir wari kari. Tumhaar Pita jaane hei ki tumme kaa chaahi.

³¹Khali Parmeshwar ke raaj ke khojte raho, aur baaki sab kuchh tumme mil jaai.

³²“E hamaar chhoṭa chela log ke jhunḍ, ḍaro nai! Tumhaar Pita tumme raaj de maañge hei.

³³Jon kuchh bhi tumhaar lage hei, u sab bech ke aur gareeb meñ baaṭ deo. Aapan waaste eisan pes banaao jon kabhi faṭi nai, iske matlab hei ki swarag meñ eisan dhan baṭoro, jahañ naa to koi choraay sake hei aur naa to usman koi kirwa paṛe sake hei.

³⁴Tumhaar dil wahiñ laga rahi jahañ tumhaar khajaana hei.”

³⁵“Hardam taiyaar raho aur aapan batti baare raho,

³⁶ṭheek u naukar log ke rakam jon aapan maalik ke saadi meñ se lauṭe tak waiṭ kara kare hei. Jeise u aay ke nok kare hei, naukar wahi lage palla khol de hei.

³⁷U naukar log ketna khush naseeb hei, jon ke maalik lauṭe pe ulog ke jagte aur taiyaar paay hei! Ham tum se bataata hei ki u maalik aapan koṭ utaar ke aur aapan naukar ke beiṭhaay ke khaana khawaai aur sewa kari.

³⁸U naukar log khush naseeb hei jon ke maalik ulog ke taiyaar paay hei, chaahe u aadha raat ke aay ya dusra roj sabere!

³⁹I yaad rakhna ki agar ghar ke maalik janta ki kab chor aai, tab u aapan ghar meñ chori nai hoy deta.

⁴⁰Yahi kaaran hardam taiyaar raho, kaahe ke koi nai jaane hei ki Manush ke laṛka kab aai.”

⁴¹Tab Peeṭa bolis, “E Prabhu, i kahaani khali tum ham se bataata hei, ki sab log se?”

⁴²Prabhu jawaab dees, “Eisan laayk aur samajhdaar naukar kon hei? I wahi hei jon ke maalik aapan sab naukar ke uppar ke leeḍa banaay hei ki u sab log ke ṭaaim se bhojan paani dei.

⁴³Khush naseeb hei u naukar jiske maalik jab lauṭe to uske weisaiyeñ karte paay!

⁴⁴Ham tum se bataata hei ki maalik eisan naukar ke aapan puura kaarbaar sambhaale ke de dei.

⁴⁵Lekin agar u naukar aapan man meñ i baat soche, ki uske maalik ke lauṭe meñ deri hei, aur baaki naukar ke maare peeṭe, aur apne khaay piye meñ laga rahe aur nasa meñ hoy jaay.

⁴⁶Aur eise hoi ki maalik wahi roj lauṭi jon roj uske koi waiṭ nai karat hoi, aur tab kaa hoi, uske maalik uske kaṛa se kaṛa saja deke bahire ulog ke sañghe chhoṛ dei jon pe bharosa nai kara jaay sake hei.

⁴⁷Agar naukar log u kaam kare ke taiyaar nai rahe hei, jon ulog ke maalik chaahe hei, tab ulog ke bahut maar lagi.

⁴⁸Lekin u naukar jon nai jaane ki ulog ke maalik kon cheej maañge hei, aur maar khaay ke kaam kare hei, to ulog ke kamti maar paṛi. Jon ke sab se jaada dewa gais hei, usse jaada maañga jaai, aur jon ke bahut jaada dewa gais hei, usse to aur jaada maañga jaai.”

⁴⁹“Ham dharti pe aagi lagaay aaya hei, aur yahi mañgta hei ki u jaldi se sulag jaay!

⁵⁰Hamme to abhi ek baptisma lewe ke hei, aur jab tak u hoy nai jaai, hamme bahut dukh sahe ke paṛi!

⁵¹Kaa tum samajhta hei ki ham hiañ mel karaay aaya hei? Nai, ham to alag kare aaya hei.

⁵²Kaahe ki ab se jon ghar meñ paañch log hei, ulog meñ aksar jhagṛa hote rahi, teen ke agaiñsṭ dui, aur dui ke agaiñsṭ teen.

⁵³Sab ek dusra ke agaiñsṭ rahiyeñ, baap, beṭa ke aur beṭa, baap ke. Maañ, beṭi ke aur beṭi, maañ ke. Saas, bahu ke aur bahu, saas ke.”

⁵⁴Yeeshu bheeṛ se bolis, “Jab tum wesṭ se baadar aate dekhta hei, tab tum bolta hei, ‘Paani barsi,’ aur barse bhi hei.

⁵⁵Jab saauth se hawa chale hei, tab tum bolta hei, ‘Bahut jaada garam paṛi,’ aur weisaiyeñ hoy hei.

⁵⁶E muurakh log! Tum dharti aur asmaan dekh ke bataay sakta hei ki kaa hoy waala hei, lekin tum i nai janta ki abhi kaa hoy waala hei?”

⁵⁷“Kaahe nai tum apne aap samajh jaata hei ki kon raaiṭ cheej kare ke hei?

⁵⁸Jab koi tum pe dos lagaay hei, koṭ jaay se pahile uske hal kar leo. Agar tum eise nai kara to jaj ke aage ghaseeṭa jaayga. Aur tab jaj tumme jel ke adhikaari ke de dei, huañ tumme jel meñ band kar dewa jaai.

⁵⁹Tum huañ se nai chhuuṭ paayga jab tak ek ek senṭ nai chukaay dega.”