Read Hindi, Fiji Luuk 13 Bible Online

Luuk 13 - Hindi, Fiji bible

Luuk 13

¹Wahi ṭaaim Yeeshu ke bataawa gais ki Paaylaṭ kuchh Galeeli log ke marwaais raha jab ulog balidaan chaṛhaay gain raha.

²Yeeshu jawaab dees, “Kaa tum samajhta hei ki ilog jon maara gain raha, u baaki Galeeli log se jaada paapi rahin, aur yahi kaaran u sab ke i dasa bhais raha?

³Hargiz nai! Lekin tumme ham bataata hei ki agar tum nai pastaayga, to tum sab bhi maara jaayga.

⁴U aṭhaara (18) log ke sañghe kon cheej bhais raha, jon log ke uppar Shiloh ke ṭaawa (tower) gira aur u sab dab ke mar gain. Kaa tum samajhta hei ki ulog Yarushalam meñ rahe waala log se jaada kharaab log rahin?

⁵Hargiz nai! Lekin jab tak tum nai pastaayga, tum sab bhi yahi rakam naas hoy jaayga.”

⁶Yeeshu ulog ke i kahaani sunaais, “Ek admi ke ek añguur ke khet raha aur usman ek anjeer ke peṛ bhi bois raha. Ek roj u admi usman se anjeer khoje gais, lekin uske ek bhi nai mila.

⁷Tab u gaaḍna ke bolaay ke bolis, ‘Ham teen saal se i anjeer ke peṛ meñ fal khojte raha, lekin ek bhi nai mila. Iske kaaṭ ḍaaro! Khaahe ke jhuuṭṭe ke i jagha ghere hei?’

⁸Gaaḍna jawaab dees, ‘Maalik, i saal iske aur rahe deo, ham iske chaaro taraf khod ke khaad ḍaarega.

⁹Aay waala saal agar isman fal nai lagi to jaruur ham iske kaaṭ dega.’ ”

¹⁰Ek sabat ke roj Yeeshu ek Yahuudi ke parchaar kare waala jagha pe parchaar karat raha.

¹¹Wahiñ pe ek aurat rahi jon ke aṭhaara saal se dushṭ aatma bimaar rakkhis raha, uske kamar ṭehṛa hoy gais raha aur u koi rakam se seedha nai hoy sakat rahi.

¹²Jab Yeeshu uske dekhis, tab aapan lage bolaay ke usse bolis, “E aurat, tum ab aapan bimaari se achchhi hoy gayi hei.”

¹³U aurat ke uppar haath rakkhis, aur wahi lage u seedha khaṛi hoy gais aur Parmeshwar ke baṛaai kare lagis.

¹⁴Huañ ke jon dekh bhaal karat raha, u Yeeshu pe bahut gussa bhais, kaahe ke u sabat ke roj koi ke achchha karis raha. Aur tab u sab log se bolis, “Ek hapta meñ chhe roj hoy hei jab hamme kaam kare ke rahe hei. Aur wahi ṭaaim aay ke aapan bimaari dekhaao, sabat ke roj nai.”

¹⁵Prabhu tab jawaab dees, “Tum log kon ke bahkaay mañgta hei? Kaa tum meñ se koi aapan beil ya gadha ke khol ke sabat ke roj paani piaay nai le jaata hei?

¹⁶I aurat jon Abraham ke gharaane ke hei, saitaan iske aṭhaara saal tak jakaṛ ke rakkhe raha. Kaa sabat ke roj iske bañdhan se mukti nai mile sake?”

¹⁷Yeeshu ke jawaab se sab dusman log sarmaay gain. Lekin aur jon log huañ rahin, u sab khusi bhain i dekh ke ki Yeeshu keisan keisan kaam kare hei.

¹⁸Yeeshu tab bolis, “Parmeshwar ke raaj keisan hei? Uske ham kis se tulna kari?

¹⁹U eisan hei ki jab koi ek raai ke daana le jaay ke gaaḍan meñ boy de hei. Daana jame hei aur ek baṛa peṛ hoy jaay hei, aur chiṛia usman aapan ghosla banaay hei.”

²⁰Yeeshu fir se bolis, “Parmeshwar ke raaj ke tulna ham kisse kari?

²¹I eisan hei ki jab ek aurat aaṭa ke tisra hissa meñ yeesṭ milaay hei. Aur thoṛa deri meñ sab aaṭa fuul ke ḍher hoy jaay hei.”

²²Yeeshu, nagar nagar, gaaoñ gaaoñ parchaar karte karte, Yarushalam ke bagal chala jaat raha.

²³Tab koi usse puuchhis, “E Prabhu, kaa khali thoṛa log hee bache saki?” Yeeshu jawaab dees,

²⁴“Patra palla se bhittar jaay ke kosis karo! Ham tum log se bataata hei ki bahut log patra palla se bhittar jaay ke kosis kari lekin jaay nai paai.

²⁵Jab ghar ke maalik uṭh ke ghar ke palla band kar de hei aur tum bahire khaṛa hoy ke palla nok karta hei, ‘E Swaami, hamaar waaste palla khol deo!’ Tab u boli, 'Ham tumme nai janta! tum kahañ se aaya hei.’

²⁶Tab tum bolega, ‘Ham to tumhaar sañghe khaaya pia, aur tum to hamaar ṭaaun meñ parchaar kara!”

²⁷Lekin u boli, ‘Ham to tumme sachche ke nai janta hei! E dushṭ log! Ham se duur hoy jaao!’

²⁸Tab tum daañt peesega aur royga kaahe ke tum Parmeshwar ke raaj meñ Abraham, Aayzak, Jaykab aur sab nabi ke dekhega, jab tum log ke bahire feka jaai.

²⁹Aur tab log eesṭ aur wesṭ, noth aur saauth se aay ke Parmeshwar ke raaj meñ bhojan kari.

³⁰Aur dekhna, jon pichchhe hei, u aage hoy jaai, aur jon koi aage hei u sab pichchhe rahe jaai.”

³¹Ṭheek wahi ṭaaim kuchh Farisi aay ke Yeeshu se bolin, “Hiañ se chala jaao, kaahe ke Heraḍ tumme maare maañge hei.”

³²Yeeshu ulog se bolis, “U lomṛi se jaay ke bolo, ‘Ham aaj aur kal dushṭ aatma ke nikaarta hei aur bimaar log ke achchha karta hei aur tisra roj hamaar kaam khalaas hoy jaai.’

³³Lekin hamme aaj, kal aur parso jaruur jaay ke hei. Kaahe ke i hoy nai sake ki koi nabi Yarushalam ke bahire maara jaai.”

³⁴“E Yarushalam! E Yarushalam! Tumhaar log to nabi log ke maar deen hei aur jon jon tumhaar lage bheja gain hei, ulog ke patthar se maarin hei! Ketna dafe ham mañgta raha ki jeise murgi aapan bachcha ke aapan pañkha ke nichche lukaay le hei, wahi rakam tumhaar bachchan ke saathe ham bhi kari.

³⁵Dekho, ab tumhaar Mandir ujaaṛa jaai, aur tum hamme u ṭaaim tak nai dekhega jab tak i nai bolega, ‘Ki dhann hei u jon Prabhu ke naam se aay hei!”