Read Hindi, Fiji Luuk 14 Bible Online

Luuk 14 - Hindi, Fiji bible

Luuk 14

¹Ek sabat ke roj, jab Yeeshu ek khaas Farisi ke ghare khaana khaay gais raha, tab uske bagal sab log dhyaan se dekhat rahin.

²Aur achaanak huañ pe ek admi aais jiske haath aur goṛ fuula raha.

³Yeeshu, Farisi log aur ruuls banaay waala baṛkua log se puuchhis, “Kaa i ṭheek hei ki sabat ke roj koi ke changa kara jaay?”

⁴Lekin ulog chuppe rahin aur kuchh nai bolin. Yeeshu u bimaar admi ke haath pakṛis aur uske ṭheek kar ke ghare bhej dees.

⁵Tab Yeeshu ulog se puuchhis, “Agar tum meñ se koi ke bul ya laṛka kuaañ meñ gir jaay tab kaa tum uske wahiñ chhoṛ dega kaahe ki u sabat ke roj hei, aur uske wahi lage bahire nai nikaarega?”

⁶Ulog ke paas koi jawaab nai raha.

⁷Jab Yeeshu dekhis ki kon rakam pahuna log aapan aapan waaste achchha achchha jagha khoje hei, tab u ulog se bataais,

⁸“Jab tumme koi saadi meñ bulaay hei, tab sab se achchha jagha pe nai beiṭhna, kaahe ke ulog shaayd tum se bhi baṛa koi aur ke bhi bulaain hoi.

⁹Aur fir ghar waala tum se aay ke boli, “Aapan jagha iske de deo, kaahe ki i tum se baṛa hei.” Tab tumme sarmaay ke dusra jagha beiṭhe ke paṛi.

¹⁰Lekin agar tumme saadi meñ bulaawa jaay aur tum jaay ke pichchhe jagha khoj ke beiṭha, aur gharwaala aay ke tum se boli, “Dost, hiañ nai lekin i aage waala kursi pe beiṭho.” Tab tumhaar aadar sab ke saamne hoi.

¹¹Kaahe ki agar koi samjhe ki u sab se baṛa hei, tab uske nichche kara jaai, aur jon apne aap ke chhoṭa samjhe hei, uske baṛa kara jaai.”

¹²Tab Yeeshu, jon uske bulaais raha, usse bolis, “Agar tum koi ke khaana pe bolaata hei, to aapan dost, bhaiya, saga palwaar, ya dhani log ke nai bolaana, kahiñ eise nai hoy jaay ki ulog bhi tumme badle meñ bolaay le aur jon cheej tum ulog ke sañghe kara hei u tumme lauṭaay de.

¹³Lekin jab tumme koi ke khaana pe bolaay ke hei, to gareeb, langṛa luula, aur añdha log ke bolaao.

¹⁴Tumme aasheesh mili kaahe ki ulog tumme lauṭaay ke nai bolaai, lekin uske badle meñ jab uske log jinda hoy jaai, tab uske fal tumme mili.”

¹⁵Tab uske sañghe khaana khaaywaala ek mehmaan usse bolis, “Ulog ketna khush kismat hei jon Parmeshwar ke raaj meñ khaana khaai!”

¹⁶Yeeshu usse bolis, “Ek dafe ek admi ek baṛa paaṭi rakkhis, aur usman bahut log ke bolaais.

¹⁷Jab sab khaana taiyaar hoy gais, tab aapan naukar ke bolaay ke u bolis ki sab pahuna log se jaay ke bolo, ‘Aao, khaana taiyaar hei.’ ”

¹⁸Lekin sab ke sab bahaana banaay lagin. Ek to bolis, 'Ham ek khet khareeda hei, hamme jaay ke uske dekhe ke hei. Hamme maaf kar deo, ham nai aay paayga.’

¹⁹Dusra bolis, ‘Ham aaj paañch joṛi bul khareeda hei, hamme u sab ke traay ke hei. Hamme maaf kar dena, ham nai aay paayga.’

²⁰Ek aur bolis, “Ham aaj saadi kara, yahi kaaran ham nai aay sakta.”

²¹Naukar aay ke aapan maalik se sab baat bataais. Aur tab ghar ke maalik gussaay ke naukar se bolis, “Ṭaaun ke kona kona meñ jaay ke jetna langṛa luula, añdha aur gareeb log mile, u sab ke jaldi se hiañ le aao.”

²²Aur jab naukar lauṭis, tab maalik se bolis, ‘Maalik, jeise tum ham se bola raha, weisaiyeñ ham kara, lekin abhi bhi aur log ke waaste bahut jagha hei.’

²³Tab maalik bolis, “Jaao aur rasta rasta, kona kona chhaan leo, jon koi bhi mile, ulog ke jabran le aao, ki jisse hamaar ghar puura ke puura bhar jaay.

²⁴Ham tum se bolta hei ki jiske ham pahile bolaaya raha, usman se koi ek bhi hamaar khaana nai cheekhi!’ ”

²⁵Aur jab, ek baṛa bheeṛ Yeeshu ke sañghe chalat raha to u ghuum ke ulog se bolis,

²⁶“Agar koi hamaar pichchhe aay maañge hei, lekin aapan amma bappa, aurat aur laṛkan, bhaiya-bahini aur hiañ tak ki aapan jaan se bahut prem kare hei, to u hamaar chela nai bane sake hei.

²⁷Agar koi aapan kros uṭhaay ke hamaar pichchhe nai chali, to hamaar chela nai bane saki.

²⁸Maan leo, tum ek mahal banaay mañgta hei. To sab se pahile tum kaa karega? Kaa tum beiṭh ke hisaab kitaab nai karega ki ketna kharcha beiṭhi?

²⁹Nai to jab tum faaunḍeishan ḍaar dega aur fir uske puura nai kar paayga, to sab log tum pe hasi.

³⁰Ulog boli, ‘I admi mahal banaay ke suru to karis, lekin puura nai kare paais.’

³¹Kaa koi eisan raaja hei jon laṛaai kare jaai aur pahile beiṭh ke sallaah nai kari ki uske lage khali das hajaar saulja hei, aur uske dusman ke lage bees hajaar, tab hamla keise kara jaai?

³²Agar uske hamla kare ke taagat nai hei to u duur khaṛa hoy ke aapan duut bheji, aur saanti aur mel ke baat cheet kari.

³³Yahi rakam, tum meñ se koi hamaar chela nai bane sake hei jab tak tum aapan sab kuchh chhoṛ nai deo.’ ”

³⁴“Neemak to achchha hei, lekin agar uske sawaad chala jaay, to kon cheej se sawaad kara jaai?

³⁵Ab to u naa to khaad ke kaam aay sake aur naa to maṭṭi ke, khali uske bahire feka jaay hei. Agar tumhaar lage kaan hei aur tum sune sakta hei, to suno!”