Read Hindi, Fiji Luuk 15 Bible Online

Luuk 15 - Hindi, Fiji bible

Luuk 15

¹Ek roj ṭeks baṭore waala aur paapi log Yeeshu Maseeh ke lage uske sune ke waaste aain.

²Farisi aur Maozas ke kaanuun ke ṭeecha log bhunbhunaay lagin aur bolin, “I admi to paapi log ke sañghe mile hei aur wahi log ke sañghe khaay piye hei!”

³Tab Yeeshu ulog ke i kahaani sunaais,

⁴“Agar tumhaar lage ek sao bheṛa rahta aur usman se ek heraay jaay, to tum kaa karta? Kaa tum u naainṭinaain ke khula meidaan meñ chhoṛ ke u ek jon heraay gais hei, uske jab tak mil nai jaay, nai khojta?

⁵Aur jab u mil jaay to uske tum aapan kañdha pe uṭhaay ke khusi se,

⁶ghare laay ke aapan dost aur paṛosi ke bolaay ke bolta hei, ‘Khusi manaao! Kaahe ke hamaar jon bheṛa heraay gais raha, u mil gais hei.’

⁷Ham tumme bataata hei ki yahi rakam ek man firaay waala paapi ke waaste swarag meñ bhi bahut khusi manaawa jaai, jab ek paapi u sao meñ se Parmeshwar ke bagal ghuumi aur naainṭinaain achchha log ke ghuume ke nai jaruurat hei.”

⁸Aur tab Yeeshu ulog ke ek aur kahaani sunaais, “U aurat kon cheej kari jis ke lage das chaañdi ke sikka hei, aur usman se ek heraay jaay. Kaa u batti baar ke aur jhaaṛu lagaay ke tab tak nai khoji jab tak uske u mil nai jaai?

⁹Aur jab mil jaai tab aapan dost ke bolaay ke boli, 'Aao hamaar sañghe khusi manaao, kaahe ke ham jon sikka heraay dia raha, u ab mil gais hei.’

¹⁰Yeeshu fir se bolis, “Yahi rakam Parmeshwar ke ainjals bhi khusi manaai, jab ek paapi aapan paap se pastaai.”

¹¹Yeeshu ulog se ek aur kahaani bataais, “Ek admi ke dui laṛka rahin.

¹²Usman se jon chhoṭa raha, u aapan bappa ke lage aay ke bolis, “E bappa, jon hamaar hissa ke peisa hei, u hamme de deo.” Aur uske bappa weisaiyeñ karis. Jetna peisa raha, duuno meñ aadha aadha baaṭ dees.

¹³Aur tab thoṛa roj meñ chhoṭa laṛka aapan hissa leke pardes chala gais, aur huañ puura peisa bekaar kaam meñ luṭaay dees.

¹⁴U aapan puura peisa khalaas kar dees, aur wahi ṭaaim u des meñ akaal paṛ gais, aur u kangaal hoy gay.

¹⁵Aur tab u jaay ke wahiñ ek admi ke ghare kaam kare laga, u admi uske khet meñ suar charaay ke waaste bhejis.

¹⁶U bahut bhuuka raha, aur suar ke khaana khaay maañgat raha, uske koi khaana dewe ke taiyaar nai raha.

¹⁷Aakhiri meñ u aapan hosh meñ aais aur bolis, ‘Hamaar bappa ke ketna naukar hei aur ulog ke peṭ bhar ke khaana mile hei, aur ham hiañ bhukke marta hei!

¹⁸Ham aapan bappa ke lage jaayga aur usse bolega, ‘E bappa, hamme maaf kar deo. Ham tumhaar aur Parmeshwar ke agaiñsṭ paap kara hei.

¹⁹Ab ham tumhaar laṛka bolaay ke kaabil nai hei, hamme ab ek naukar samajh ke rakh leo.’ ”

²⁰Aur wahi lage u uṭh ke aapan bappa ke ghare jaay laga. Lekin jab u ghar se kuchh duur pe raha ki uske bappa uske aate dekh lees aur uske uspe taras aay gais, aur dauṛ ke aapan laṛka ke gale lagaais aur chumma le lees.

²¹U laṛka bolis, “E bappa, ham to tumhaar aur Parmeshwar ke agaiñsṭ paap kara hei, aur ab ham tumhaar laṛka bolaay laayk nai hei.”

²²Lekin uske bappa aapan naukar se bolis, “Jaldi se achchha achchha kapṛa laao, aur iske pahinaao. Iske haath meñ chhalla aur goṛ meñ juuta pahinaao,

²³aur jaldi se ek moṭa waala bachhṛa maaro aur pakaao, aur ham sab khaay ke khusi manaayga!

²⁴Kaahe ke i jon hamaar laṛka mar gais raha, ab jinda hoy gais hei aur heraay gais raha, ab mil gais hei.” Aur sab khusi manaay lagin.

²⁵Etne meñ uske baṛa laṛka, jon khet meñ kaam karat raha, ghare lauṭis, aur gaana bajaana aur naache ke awaaj sunis.

²⁶U ek naukar ke bolaay ke puuchhis, “I kaa hoy hei?”

²⁷Naukar bolis, “Tumhaar chhoṭa bhaiya lauṭ aais hei, aur yahi khaatir jab tumhaar bappa uske bhala changa dekhis, to khusi hoy ke sab se moṭa bachhṛa kaṭwaais hei.”

²⁸Aur tab u baṛa bhaiya gussaay gais aur ghar ke bhittar nai jaay maañgis. Ispe uske bappa bahire aay ke baṛa laṛka ke bhittar chale ke chirauri kare laga.

²⁹Lekin u aapan bappa se bolis, “Ham etna saal se tumhaar sewa karte raha, aur tumhaar ek baat bhi nai ṭaala, lekin tum aaj tak hamme ek bakri ke bachcha bhi nai dia ki ham aapan yaar dost ke bolaay ke paaṭi kari.

³⁰Aur tumhaar i laṛka jon tumhaar sab peisa veshya pe luṭaay dees, aur ab tum uske khaatir ek moṭa bachhṛa kaṭwaaya!”

³¹Uske bappa bolis, “Hamaar beṭa, tum to hardam hamaar sañghe hei, aur jon kuchh hamaar hei u tumhaar to hei.

³²Lekin hamme khusi manaay ke chaahi kaahe ke i jon tumhaar bhaiya hei, i mar gais raha, aur ab jinda hoy gais hei, heraay gais raha, ab mil gais hei.”