Read Hindi, Fiji Luuk 16 Bible Online

Luuk 16 - Hindi, Fiji bible

Luuk 16

¹Yeeshu aapan chela log se bolis, Ek dhani admi ke ek meneja raha, jon uske kaam ke dekh bhaal karat raha. Lekin koi aay ke dhani admi ke bataais ki meneja uske peisa khuub uṛaay hei.

²Dhani admi uske bolaay ke bolis, “I ham tumhaar baare meñ kaa sunta hei? Hamme bataao ki tum kon cheej kara hei! Ab tum hamaar meneja nai rahe sakta.”

³Ab u meneja aapan man meñ sochis, “Ab ham kon cheej karega, hamaar maalik to hamme kaam se nikaare hei. Ham to mohṛhi bhi nai khode sakta, aur bheek maañge ke saram lage hei.

⁴Ham samajh gaya ki hamme kaa kare ke chaahi ki jisse hamaar kaam bhi nai chhuuṭi aur sab koi aapan ghar meñ hamme ijjat se bolaai.”

⁵Aur tab u ek ek karke aapan maalik ke sab karajdaar ke bolaais aur sab se pahila admi se puuchhis, “Tum hamaar maalik ke ketna karja hei?”

⁶U admi bolis, “Ek sao leeṭa tel.” Meneja usse bolis, “I aapan bil leo aur beiṭh ke jaldi se isman ‘pachaas (50) ’ likho.”

⁷Tab u dusra admi se puuchhis, “Tumhaar ketna karja hei?” U bolis, “Ek hajaar basta geñhu,” “I tumhaar hisaab hei, isman ‘aaṭh sao’ likho.”

⁸Aur tab uske maalik u dhokebaaj meneja ke khuub baṛaai karis, kaahe ke u chalaaki se kaam nikaar lees raha, kaahe ke i ṭaaim ke log eisan bartaao kare hei ki jon roshni meñ kaam kare hei, ulog se bhi jaada chalaak rahe hei.

⁹Ham tum se bolta hei, “Chalaaki ke peisa se aapan dost to banaay lega. Lekin jab u khalaas hoy jaai, tab tum anant jeewan meñ bulaay lia jaayga.

¹⁰Jon koi ke chhoṭa chhoṭa baat pe biswaas kara jaay sake hei, u baṛa baat pe biswaas ke laayk hei. Aur jon pe chhoṭa baat ke biswaas nai kara jaay sake hei, tab u baṛa baat pe bhi biswaas kare laayk nai hoi.

¹¹Agar tumme paap ke dhan pe biswaas nai kara jaay sake hei to tumme kon sachcha dhan saupi?

¹²Agar tum dusra ke dhan pe biswaas kare ke laayk nai hei, to jon tumhaar hei u tumme kaahe ke koi dei?”

¹³“Tum dui maalik ke naukar nai hoy sakta hei. Tum ek ke dusra se jaada chaahega ya ek ke nai laaik karega aur dusra se jaada prem karega. Tum Parmeshwar aur peisa ke ek sañghe nai sewa kare sakta.”

¹⁴Farisi log bahut jaada peisa se pyaar karat rahin. Aur jab ulog sunin ki Yeeshu kaa bole hei, to uske khilli uṛaay lagin.

¹⁵Yeeshu ulog se bolis, “Tumahi log hei jon apne aap ke bahut achchha samajhta hei, lekin Parmeshwar tum sab ke dil ke baare meñ jaane hei. U sab jon admi ke khaatir bahut mahañga hei, Parmeshwar ke saamne bahut sasta hei.”

¹⁶“Yuhanna baptisma de waala ke ṭaaim tak, Maozas ke kaanuun aur nabi log Parmeshwar ke raaj ke baare meñ susamaachaar parchaar karin raha aur, sab koi jabarjasti usman ghuse maañge hei.

¹⁷Asmaan aur jameen heraay jaay sake hei, lekin Maozas ke kaanuun se ek chhoṭa baat bhi nai heraay sake hei.

¹⁸Jon admi aapan aurat ke chhoṛ ke dusra aurat se saadi kar le hei, u byabhichaar kare hei. Aur jon u aurat se saadi kare hei jon ke admi uske chhoṛ dees hei, u bhi byabhichaar (aḍalṭri) kare hei.”

¹⁹Ek dhani admi raha jon hardam mahañga kapṛa pahinat raha, aur hardam chamak dhamak aur bahut sukh se rahat raha.

²⁰Dusra bagal Laazras naam ke ek bahut gareeb admi, jon ghaao se bhara raha, aur u dhani admi ke faaṭak pe hardam chhoṛa jaat raha,

²¹ki jisse u aapan peṭ, jon u dhani admi ke ṭaibal se tukṛa gire, wahi se bhar le. Aur khali yahi nai, kutta bhi uske ghaao ke chaaṭa karat rahin.

²²Eisan bhais ki jon kangaal admi raha, u mar gais aur ainjals aay ke uske Abraham ke godi meñ pahuñchaay dees. U dhani admi bhi mara aur uske maṭṭi de dewa gais.

²³U dhani admi narak gais, aur bahut peeṛa sahis, aur aapan aañkhi uṭhaais to dekhis ki u kangaal Laazras Abraham ke godi meñ hei.

²⁴Tab u dhani admi jor se Abraham se bolis, “Ham pe daya karo! Laazras ke bhejo ki u aapan uñgri paani meñ bhijaay ke hamaar jeebh ke ṭhañḍa kare, kaahe ke ham to i aagi meñ taṛapta hei!”

²⁵Lekin Abraham bolis, “Yaad karo beṭa, tum aapan laaif meñ bahut sukh uṭhaaya, tumhaar lage sab achchha cheej raha aur Laazras ke lage sab kharaab cheej raha, lekin ab i to saanti paais hei aur tum taṛapta hei.

²⁶Iske chhoṛ ke tumhaar aur hamaar beech meñ ek gahira gaḍḍha hei, agar hiañ se koi u paar jaay maañge to nai jaay sake hei, aur huañ se koi hiañ aay maañge to nai aay sake.”

²⁷Tab u dhani admi bolis, “E Abraham, hamaar pita, ham binti karta hei ki Laazras ke hamaar bappa ke ghare bhejo,

²⁸kaahe ke hamaar lage paañch bhaiya hei, ulog ke chetaaoni de ke hei, kahiñ eise nai hoy ki ulog bhi i narak meñ aay jaai.”

²⁹Abraham bolis, “Tumhaar bhaiya log ke lage Maozas aur baaki nabi ke buks hei, ulog uske suni.”

³⁰Dhani admi bolis, “E Pita Abraham, etna bas nai hei. Agar murda se lauṭ ke koi ulog ke lage jaay, tabahi ulog badli.”

³¹Lekin Abraham bolis, “Agar ulog Maozas aur nabi ke nai suni, to jon murda se lauṭ ke jaai, uske bhi nai maani.”