Read Hindi, Fiji Luuk 18 Bible Online

Luuk 18 - Hindi, Fiji bible

Luuk 18

¹Yeeshu aapan chela log ke ek kahaani bataais ki keise ulog hardam bina niraas hoy, preya karte rahin,

²“Ek ṭaaun meñ ek jaj raha, jon Parmeshwar se bhi nai ḍarat raha aur naa to koi admi ke parwaah karat raha.

³Wahi ṭaaun meñ ek bidhwa bhi rahat rahi jon uske lage roj roj aay ke bolat rahi, “Hamaar nyaay karo aur hamaar dusman se hamme bachaao!”

⁴Kuchh ṭaaim tak to u jaj uske nai sunis. Lekin aakhri meñ haar maan ke aapan man meñ sochis, ‘Ham to Parmeshwar se nai ḍarta hei aur naa to koi ke parwaah karta hei.

⁵Fir bhi bhale i bidhwa hamme roj roj tang kare hei, ham iske nyaay jaruur karega, nai to i hamaar naak meñ dam kar dei.’ ”

⁶Prabhu bolis, “U kruk jaj kaa bolis, suno!

⁷To fir Parmeshwar jiske u apne chunis hei, kaa uske nyaay nai kari jon raat din uske bolaate rahe hei? Kaa u ulog ke khaatir deri lagaai?

⁸U jaruur jaldi kari aur ulog ke madat kari. Lekin jab Manush ke laṛka aai to kaa u dharti pe koi biswaasi ke paai?”

⁹Yeeshu kuchh log ke kahaani sunaais, jon sochat rahin ki ulog dusra se achchha hei aur baaki log ulog se nichche hei.

¹⁰“Ek dafe dui admi Mandir meñ preya kare gain, usman se ek Farisi aur dusra ṭeks baṭore waala raha.

¹¹Farisi khaṛa hoy ke aapan man meñ preya kare laga, “E Parmeshwar, ham tumme dhanbaad deta hei ki ham dusra log ke rakam ṭhaggu, ya peṭṭu aur byabhichaar kare waala nai hei, aur naa to i ṭeks baṭore waala ke rakam hei.

¹²Ham to ek hapta meñ dui dafe upwaas rakhta hei aur jon kuchh hamme mile hei uske daswa hissa tumme de deta hei.’

¹³Lekin ṭeks baṭorewaala duur khaṛa hoy ke asmaan ke taraf bhi nai dekhis, aur aapan chhaati peeṭ peeṭ ke bolis, ‘E Parmeshwar, ham paapi pe daya karo!’

¹⁴Tab Yeeshu bolis, ‘Jab duuno admi ghare gain, tab ṭeks baṭorewaala naa ki Farisi, Parmeshwar ke najar meñ achchha admi maana gais. Kaahe ke jon koi apne aap ke baṛa banaay hei, wahi chhoṭa kara jaai, aur jon koi apne aap ke chhoṭa kare hei, uske baṛa banaawa jaai.’ ”

¹⁵Kuchh log to aapan laṛkan ke bhi Yeeshu ke lage laay lagin ki jisse u laṛkan pe aapan haath rakkhe, lekin jab chela log i dekhin to sab ke ḍaaṭe lagin!

¹⁶Lekin Yeeshu u bachcha log ke aapan lage bolaay ke bolis, “Bachcha log ke hamaar lage aay deo, aur ulog ke roko nai, kaahe ke Parmeshwar ke raaj eisane log ke hei.

¹⁷Ham tum se sachche bolta hei! Jon koi Parmeshwar ke raaj bachcha log ke rakam nai apnaay hei, ulog uske raaj meñ kabhi nai jaay saki.”

¹⁸Ek khaas admi Yeeshu se puuchhis, “E achchha guru, ham kaa kari ki hamme anant jeewan mili?”

¹⁹Yeeshu usse bolis, “Tum hamme kaahe ke achchha bolta hei? Khali Parmeshwar achchha hei.

²⁰Tum kaanuun to janta hei, ‘Byabhichaar nai karna. Hatya nai karna. Chori nai karna. Dusra ke waaste jhuuṭa gawaahi nai dena. Aapan maiya aur bappa ke aadar karna.”

²¹U admi tab bolis, “Ham to chhoṭa se i sab kaanuun maanta hei.”

²²Jab Yeeshu i sunis, tab bolis, “Abhi bhi tumme ek cheej kare ke bacha hei. Sab kuchh jon tumhaar lage hei, u sab bech ke gareeb meñ baaṭ deo, aur tab tumhaar khaatir swarag meñ bahut dhan hoi. Aur fir aay ke hamaar pichchhe chalo.”

²³Lekin i sab sun ke u bahut soch meñ paṛ gais, kaahe ke u bahut dhani admi raha.

²⁴Yeeshu jab dekhis ki u ketna udaas hoy gay hei, tab bolis, “Dhani log ke Parmeshwar ke raaj meñ aay ke waaste bahut kaṛa baat hei!

²⁵Usse sahaj to i hei ki ek uuñṭ, ek sui ke naake meñ se eezi se nikar jaai, lekin i nai hoy sake hei ki ek dhani admi Parmeshwar ke raaj meñ jaay saki.”

²⁶Jab bheeṛ i baat sunin, ulog puuchhin, “Tab keise koi bache saki?”

²⁷Yeeshu bolis, “Jon cheej admi log nai kare sake, u Parmeshwar kare sake hei.”

²⁸Tab Peeṭa bolis, “Dekho, ham bhi to sab kuchh chhoṛ ke tumhaar pichchhe chal paṛa.”

²⁹Yeeshu bolis, “Ham tumme sachche bataata hei eisan koi nai hei, jon aapan ghar, aurat, bhaiya-bahini, maiya-bappa aur laṛkan bachchan Parmeshwar ke khaatir chhoṛe hei, i ṭaaim uske laaif meñ bahut kuchh mili. Lekin aage chal ke wahi log ke anant jeewan bhi mili.”

³¹Tab Yeeshu aapan baarah chela log ke alge le jaay ke bolis, “Suno! Ham log ab Yarushalam jaata hei. Jon bhi kuchh Manush ke laṛka ke baare meñ nabi log likhin raha, u sab ab puura hoi.

³²U ab geir Yahuudi ke haath meñ de dewa jaai aur uske bahut apmaan hoi. Uske sañghe log kharaab kharaab harkat kari aur uspe thuuki bhi.

³³Uske bahut jaada peeṭe ke baad uske maar dei, lekin tisra roj u jinda hoy jaai.”

³⁴Lekin i sab baat u chela log nai samajhe sakin, ki Yeeshu kaa bole hei. U jon bhi kuchh bolis raha, u gupt ruup meñ raha, aur ilog ke samajh meñ nai aais.

³⁵Jab Yeeshu Jeriko ke nagichche pahuñchis, tab wahiñ pe ek añdha, rasta ke kinaare beiṭha bheek maañgat raha.

³⁶Jab u añdha bheeṛ ke chale ke awaaj sunis, tab puuchhe lagis, “I sab kaa hoy hei?”

³⁷Log uske bataais, “Naasrat ke Yeeshu jaay hei.”

³⁸Tab u añdha jor se chillaay ke bolis, “E Yeeshu, Ḍeiviḍ ke laṛka, ham pe daya karo!”

³⁹Jon log rasta pe aage aage jaat rahin, ulog añdha ke ḍaaṭin aur bolin ki u chuppe hoy jaay. Lekin u añdha kaahe ke chuppe rahe, u aur jor se chillaais, “Ḍeiviḍ ke laṛka, ham pe daya karo!”

⁴⁰Yeeshu ruk gais aur hukum dees ki u admi uske lage laawa jaay, aur jab u nagichche aay gais, tab puuchhis,

⁴¹“Tumhaar waaste ham kon cheej kare sakta hei?” Añdha bolis, “E Prabhu, yahi ki ham fir se dekhe lagi.”

⁴²Yeeshu usse bolis, “Tab dekho! Tumhaar biswaas tumme ṭheek kar dees hei.”

⁴³Aur wahi lage u añdha dekhe laga aur Parmeshwar ke baṛaai karte Yeeshu ke pichchhe pichchhe chal paṛis. Aur jab sab log dekhis to Parmeshwar ke baṛaai kare lagin.