Read Hindi, Fiji Luuk 19 Bible Online

Luuk 19 - Hindi, Fiji bible

Luuk 19

²Huañ pe Zekias naam ke ek ṭeks baṭore waala log ke leeḍa raha, aur u bahut dhani admi raha.

³U Yeeshu ke dekhe maañgat raha, lekin bheeṛ bahut raha aur u bauna raha. Yahi kaaran u Yeeshu ke nai dekhe paat raha.

⁴U jaldi se dauṛ ke ek gular ke peṛ pe chaṛh gais, kaahe ke Yeeshu wahi rasta se jaata.

⁵Jab Yeeshu u jagha pe pahuñchis, tab uppar dekh ke bolis, “Zekias, jaldi nichche aao, kaahe ke hamme aaj tumhaar ghare rahe ke hei.”

⁶Khusi khusi, Zekias wahi lage nichche aay gais aur Yeeshu ke aapan sañghe aapan ghare le gais.

⁷Jon log i sab dekhis, to baṛbaṛaay lagin aur bolin, “I admi to ek paapi hei aur Yeeshu yahi ke ghare jaay hei!”

⁸Tab Zekias khaṛa hoy ke Yeeshu se bolis, “Prabhu, dekho ham aapan aadha propaṭi gareeb meñ baaṭ dega aur agar ham koi se bhi anyaay kar ke kuchh lia hoyga, to ham ulog ke chaar guna lauṭaay dega.”

⁹Tab Yeeshu Zekias se bolis, “Aaj i ghar meñ mukti aais hei, kaahe ke i admi bhi Abraham ke laṛka hei.

¹⁰Lekin Manush ke laṛka to eisan log ke khoj ke mukti dewaay ke waaste aais hei.”

¹¹Jab bheeṛ Yeeshu ke baat sunat rahin, to Yeeshu ulog ke ek kahaani bataais kaahe ki u sab Yarushalam ke nagichche pahuñch gain raha, aur log soche lagin ki Parmeshwar ke raaj aay ke ṭaaim hoy gay hei.

¹²Yeeshu tab bolis, Ek raaj kumaar raha aur ek dafe u ek duur des gais ki raaja ban ke fir lauṭe.

¹³Jaay se pahile u aapan das naukar ke bolaais aur ek ek ke kuchh peisa dees aur bolis, “Hamaar lauṭe tak is se kamaai karna.”

¹⁴Lekin huañ ke log uske haiṭ karat rahin, aur ulog ek duut ke uske pichchhe bhejis aur bataain ki jaay ke sab log ke bataao ki, “Ham sab nai mañgta ki i admi ham pe raaj kare.”

¹⁵Aur jab u raaja ban ke lauṭis tab u aapan das naukar ke bolaais, jiske u peisa dees raha, ki jisse u pata lagaay sake ki uske peisa se ketna kamaais hei.

¹⁶Sab se pahila naukar aay ke bolis, “E swaami, tumhaar peisa se ham das guna aur jaada kamaay lia hei.”

¹⁷Raaja bolis, “Saabaas, hamaar achchha naukar, tum to chhoṭa chhoṭa kaam meñ bharosa ke laayk hei. Ham tumme das ṭaaun ke bos banaayga.”

¹⁸Fir dusra naukar aay ke bataais, “E swaami, tumhaar peisa se ham paañch guna aur kamaaya.”

¹⁹Raaja bolis, “Tum paañch ṭaaun ke bos bano.”

²⁰Ek aur naukar aay ke bolis, “Swaami, dekho i tumhaar peisa hei, ham iske rumaal meñ baañdh ke sambhaal ke rakkha raha.

²¹Ham to tum se bahut ḍarta hei, kaahe ke tum bahut kaṛa admi hei. Jon cheej tum nai rakhta hei, uske uṭhaay leta hei, aur jon tum nai boya, wahi jaay ke kaaṭ leta hei.”

²²Raaja bolis, “E bekaar naukar! Tum jon sab hamme bola wahi tum pe laagu hei! Tum to janta hei ki ham kaṛa admi hei, aur jon ham nai rakhta, uske uṭhaay leta hei aur jon nai boya, wahi kaaṭ leta hei.

²³Tum hamaar peisa kaahe nai benk meñ rakkha ki ham aapan peisa byaaj sahit le leta?”

²⁴Jon log huañ khaṛa raha usse bolis, “Isse u sab peisa le leo aur uske de deo jiske lage das guna hei.”

²⁵Lekin ulog usse bolin, “Swaami, uske lage to das guna hei!”

²⁶Raaja jawaab dees, “Jiske lage hei uske aur mili. Lekin jiske lage nai hei, usse u bhi le lewa jaai jon uske lage hei.

²⁷Ab hamaar dusman log ke leke aao, jon hamme nai maañgat rahin ki ham u sab ke raaja bani. Hamaar saamne ulog ke jaan se maar ḍaaro!”

²⁸Jab Yeeshu sab baat bol dees, tab sab ke aage aage Yarushalam ke bagal chalis.

²⁹Jab u Beitfage aur Bethani meñ u pahaaṛ jis ke naam ‘Jaituun’ raha, uske lage aais, tab aapan chela log meñ se dui ke aage i bol ke bhej dees.

³⁰“Saamne waala gaaoñ meñ jaao. Huañ pahuñchte tumme ek gadhi ke bachcha bañdha mili, u bachcha pe abhi tak koi bhi sawaar nai karis. Uske khol ke hamaar lage le aao.

³¹Agar koi tum se puuchhi, ‘Iske kaahe kholta?’ to bolna, ‘Prabhu ke iske jaruurat hei.” ’

³²Uske chela log jaay ke weisaiyeñ paain jeise Yeeshu bataais raha,

³³Jab ulog gadhi ke bachcha ke kholat rahin, tab uske maalik aay gais aur puuchhis, “Tum log i bachcha ke kaahe ke kholta hei?”

³⁴Ulog jawaab deen, “Prabhu ke iske jaruurat hei.”

³⁵Aur tab u bachcha ke Yeeshu ke lage le gain, aur uske uppar aapan kapṛa bichhaay ke Yeeshu ke us pe beiṭhaay deen.

³⁶Aur jab u jaay laga, tab huañ ke log aapan aapan kapṛa rasta pe bichhaay lagin.

³⁷Jab Yeeshu Jaituun pahaaṛ se nichche utre laga to huañ pe jon chela log ke bheeṛ raha ek sañghe jor se chillaay ke Parmeshwar ke baṛaai kare lagin, kaahe ke ulog sab chamatkaari kaam dekhin raha jon Yeeshu karis raha.

³⁸“Dhann hei u raaja jon Prabhu ke naam se aay hei. Swarag meñ saanti hoy aur asmaan meñ. Prabhu ke mahima hoy.”

³⁹Bheeṛ meñ se kuchh Farisi Yeeshu se bolin, “E guru, aapan chela log ke ḍaaṭo!”

⁴⁰Lekin Yeeshu bolis, “Agar ilog chup hoy jaai to patthar chillaay lagi.”

⁴¹Aur jab Yeeshu Yarushalam ke nagichche pahuñch gais, tab u jagha dekh ke roy dees,

⁴²aur u bolis, “Kaa achchha hota ki tum, khali tum, aaj ke roj saanti ke baat janta. Lekin ab u tumhaar aañkhi se sab chhipaan hei.

⁴³Lekin, ṭaaim aai ki jab tumhaar dusman tumme chaaro bagal se gher lei aur tumme dabaay dei.

⁴⁴Aur tab ulog tumme aur tumhaar laṛkan ke maṭṭi meñ milaay dei. Ek patthar pe patthar khaṛa nai rahe saki. I eise hoi kaahe ke tum u ṭaaim ke nai pahichaana jab tum pe daya kara jaat raha.”

⁴⁵Tab Yeeshu Mandir meñ gais aur biznes kare waalan ke bahire nikaare laga, aur bolis,

⁴⁶“Baaibal meñ likhaan hei, ‘Hamaar ghar preya ke ghar rahi,’ lekin tum log to iske ḍaaku ke aḍḍa banaay dia!”

⁴⁷Sab roj Yeeshu Mandir meñ parchaar karat raha, lekin huañ ke baṛa paadri aur paṛha likha log ke mukhia uske maare ke waaste kosis kare lagin.

⁴⁸Lekin ulog ke koi bhi mauka nai milat raha ki Yeeshu ke naas kare, kaahe ke sab log uske baat dhyaan se sunat rahin.