Read Hindi, Fiji Luuk 20 Bible Online

Luuk 20 - Hindi, Fiji bible

Luuk 20

¹Ek roj Yeeshu Maseeh Mandir meñ susamaachaar ke baare meñ bataat raha aur parchaar karat raha, tab huañ ke baṛa paadri aur paṛha likha log aapan sañghe des ke jaana maana admi ke sañghe aay ke,

²Yeeshu se sawaal kare lagin, “Kiske hukum se tum i kaam karta hei? Aur u kon hei jon tumme hukum dees hei?”

³Tab Yeeshu jawaab dees, “Ham bhi tum se ek sawaal puuchhega. Tum hamme bataao,

⁴Yuhanna ke kon baptisma dees raha? Kaa swarag se hukum mila raha ki admi log ke bagal se?”

⁵Is ke baare meñ u sab apne meñ baat cheet kare lagin, “Agar ham bolega ‘Swarag se’, to u boli, tab tum sab uspe biswaas kaahe nai kara.

⁶Lekin agar ham bolega, ki ‘Admi log ke bagal se’ to sab koi ham log ke patthar se maari, kaahe ke sab jaane hei ki Yuhanna ek nabi hei.”

⁷Tab ulog jawaab dees, “Ham nai janta ki kiske bagal se u hukum mila raha.”

⁸Tab Yeeshu bolis, “Ham bhi tumme nai bataay sakta ki i kaam kare ke hamme kon hukum dees hei.”

⁹Tab Yeeshu ulog ke ek kahaani sunaais, “Ek dafe ek admi añguur ke khet boy ke, kisaan ke kiraaya pe de dees aur apne duur des ghuume chala gay.

¹⁰Jab fasal kaaṭe ke ṭaaim aais, tab u admi aapan ek naukar kisaan ke lage bhejis ki kuchh añguur leke aay jaay. Lekin kisaan log uske maar peeṭ ke khaali haath lauṭaay deen.

¹¹Ab maalik ek dusra naukar ke bhejis, lekin kisaan log wahi kaam karin, naukar ke maar peeṭ ke beijjati kar ke khaali haath lauṭaay deen.

¹²Tisra roj wahi rakam maalik tisra naukar ke bhejis, aur kisaan uske bhi maar peeṭ ke nikaar deen.

¹³Tab khet ke maalik bolis, 'Ab ham kaa kari? Ham aapan dulaara laṛka ke bhejega. Ham janta hei ki ulog iske aadar kari!’

¹⁴Lekin jeise kisaan log u laṛka ke dekhin, aapas meñ baat kare lagin, 'Ek roj yahi khet ke maalik ban jaai. Aao ham log iske maar ḍaari aur i khet ham log ke hoy jaai!’

¹⁵Ulog u laṛka ke khet se bahire nikaar ke maar ḍaarin. Yeeshu puuchhis, “Tab u khet ke maalik u sab ke kaa kari?

¹⁶U aay ke sab kisaan ke maar ḍaari aur aapan khet ke dusra kisaan ke de dei.” I baat sun ke sab log bole lagin, “Eise kabhi nai hoy paay!”

¹⁷Lekin Yeeshu ulog ke bagal dekh ke bolis, “Tab is ke matlab kaa hei jon vachan meñ likha hei, ‘Jon patthar ke kaapenṭa log ṭhukraay deen raha, ab wahi kona ke khaas patthar ban gais hei.’

¹⁸Jon bhi koi i patthar se ṭakraai, uske ṭukṛa ṭukṛa hoy jaai, aur jon ispe giri u pisaay jaai”

¹⁹Baṛa paadri log aur paṛha likha log samajh gain ki Yeeshu i kahaani wahi log ke baare meñ bole hei. Ulog to Yeeshu ke wahi lage pakṛaay maañgat rahin lekin huañ jon bheeṛ raha usse ulog ḍarat rahin.

²⁰Ab Yeeshu ke dusman mauka khojat rahin. Ulog kuchh jaasuus, jon dharam ke naam pe chalat rahin, huañ bhejin ki Yeeshu ke chhoṭa se galti pe pakaṛ ke aur Romi adhikaari ke haath meñ de de.

²¹Jaasuus log Yeeshu se puuchhin, “E guru, ham sab to janta hei ki tum hardam sachche bolta hei aur raaiṭ baat bataata hei, aur i bhi ki tum kabhi koi ke saaiḍ bhi nai leta, iske sañghe Parmeshwar ke rasta sachchaai se bataata hei.

²²Hamme bataao, ‘Raaja ke ṭeks dewa jaay ya nai?’ ”

²³Yeeshu to jaanat raha ki ulog uske fasaay maañge hei.

²⁴Tab u bolis, “Hamme ek chaañdi ke sikka dekhaao. Ispe kis ke chhaapa aur naam hei?” “Raaja ke,” ulog bolin.

²⁵Tab Yeeshu ulog se bolis, “Tab jon bhi Raaja ke hei, u uske deo. Aur jon Parmeshwar ke hei, u Parmeshwar ke deo.”

²⁶Ab to Yeeshu ke dusman bhi uske koi galti nai pakaṛ paain, lekin uske jawaab sun ke hairaan hoy gain aur chuppe rahe gain.

²⁷Saduuki log, jon log murda meñ se jinda hoy pe biswaas nai karat rahin, ulog Yeeshu ke lage aain. Aur puuchhin,

²⁸“E guru, Maozas to hamaar khaatir likhis hei, ‘Agar ek admi saadi kare aur uske ekko bachcha nai hoy, aur u mar jaay, to u admi ke bhaiya aapan bhaiya ke aurat se saadi kar le ki u aapan bhaiya ke waaste aulaad peida kare.’

²⁹Ek dafe saat bhaiya rahin. Pahila bhaiya saadi karis, lekin bina laṛkan ke mar gais.

³⁰Dusra bhaiya aapan bidhwa bhauji ke sañghe saadi karis, aur u bhi bina laṛkan ke mar gais.

³¹Tisra ke sañghe bhi yahi bhais. Yahi rakam saato bhaiya bina aulaad ke mar gais.

³²Aakhri meñ u aurat bhi mar gais.

³³Aur jab u sab bhaiya fir se jinda hoi, tab u aurat kon ke patni hoi? Kaahe ke saato to uske sañghe saadi karin raha.”

³⁴Yeeshu jawaab dees, “I janam ke log saadi byaah kare hei.

³⁵Lekin aay waala ṭaaim meñ pichhla janam meñ jon maris raha aur fir se jinda hoy ke laayk hei, ulog meñ saadi byaah nai hoi.

³⁶Ulog to ainjals ke rakam rahi jon kabhi nai mare saki. Ulog to Parmeshwar ke santaan hei, kaahe ke ulog mar ke jinda hoy gain hei.

³⁷Maozas bhi to i baat ke jare waala jhaaṛi ke kahaani meñ dekhaais raha, hiañ pe u Prabhu ke ‘Abraham ke Parmeshwar, Aayzak ke Parmeshwar aur Jaykab ke Parmeshwar’ bole hei.

³⁸U mara log ke nai, lekin jon jinda hei, ulog ke Parmeshwar hei, kaahe ke sab log uske khaatir jinda hei.”

³⁹Kuchh log jon Maozas ke kaanuun pe chalat rahin, ulog jawaab deen, “E guru, tum ṭheek bola hei!”

⁴⁰Aur fir iske baad Yeeshu se koi baat puuchhe ke himmat nai karis.

⁴¹Yeeshu puuchhis, “Log kaahe ke bole hei ki Maseeha, Raaja Ḍeiviḍ ke santaan ke hoi?

⁴²Ḍeiviḍ to apne aapan Psalms meñ bole hei, ‘Prabhu hamaar Prabhu se bolis, hamaar raaiṭ saaiḍ beiṭho,

⁴³jab tak tumhaar dusman ke tumhaar goṛ tak nai kar dei.

⁴⁴Ḍeiviḍ to khud uske ‘Prabhu’ bole hei. Tab u uske laṛka keise hoy sake hei?”

⁴⁵Jab sab koi sunat rahin aur Yeeshu aapan chela log se bolis,

⁴⁶“Kaanuun ke guru log se saaodhaan rahna, khaas karke ulog se jon lamba lamba kapṛa pahine aur idhar udhar ghuume hei, aur jab ulog maakeṭ aay hei to sab log jhuk ke ulog se namaste kare hei, aur chech meñ ulog ke khaas jagha mile hei, aur paaṭi ke ṭaaim ulog achchha achchha jagha maañge hei.

⁴⁷Wahi log bidhwa ke ghar haṛap le hei aur dekhaawe ke khaatir lamba lamba preya kare hei. Ulog ke to bahut jaada saja mili.”