Read Hindi, Fiji Luuk 21 Bible Online

Luuk 21 - Hindi, Fiji bible

Luuk 21

¹Yeeshu fir aapan aañkhi uṭhaay ke dekhis ki keise dhani log aapan aapan daan beg meñ chhoṛe hei.

²Aur u i bhi dekhis ki ek gareeb bidhwa dui sikka usman chhoṛis hei.

³Aur tab Yeeshu bolis, “Ham tum log se sachche bataata hei ki i gareeb bidhwa sab se jaada daan chhoṛis hei.

⁴Kaahe ki sab log aapan bachat meñ se daan dees, lekin i to jon kuchh bhi iske kamaai raha, u sab daan kar dees.”

⁵Jab kuchh log Mandir ke baare meñ baat karat rahin, ki keise u sundar sundar patthar se bana hei, tab Yeeshu bolis,

⁶“Kaa tum i sab patthar ke dekhta hei? Ek ṭaaim aai jab ek bhi aapan jagha pe nai bacha rahi. Sab giraay dewa jaai.”

⁷Kuchh log puuchhin, “Guru ji, i sab baat kab hoi? Aur jab hoi tab hamme keise pata lagi?”

⁸Yeeshu bolis, “Saaodhaan raho, kahiñ tumme koi bahkaay nai de, kaahe ke bahut log hamaar naam se aay ke boli, ‘Ham wahi hei’ aur ‘Ṭaaim aay gais hei’ lekin tum sab saaodhaan rahna, uske pichchhe pichchhe nai chala jaana.”

⁹Jab tum laṛaai aur hañgaama ke charcha sunega, tab ḍar nai jaana, kaahe ke i sab ke hoy ke jaruuri hei, lekin ant wahi ṭaaim nai hoi jaai.”

¹⁰Tab u bolis, “Ek jaati dusra jaati se, aur ek raaj dusra raaj pe hamla kari.

¹¹Bhayaanak erthquaik aai, jagha jagha pe kharaab kharaab bimaari aur akaal paṛi, asmaan pe bhayankar cheej aur baṛa baṛa saain dekhaai.

¹²Lekin i sab baat hoy se pahile hamaar naam ke kaaran tum pakṛaayga aur museebat sahega. Tum sab ke chech meñ le jaay ke tumhaar uppar koṭ kachahri karke tumme saja mili aur jel meñ ḍaara jaai. Aur hamaar kaaran tum log raaja aur hakeem ke saamne laawa jaayga.

¹³Tab yahi ṭaaim tumhaar gawaahi aur dewe ke ṭaaim hoi.

¹⁴Chinta nai karna ki tum aapan bachaao meñ kaa bolega.

¹⁵Kaahe ke ham tumme eisan buddhi aur boli de dega ki tumhaar dusman bhi tumhaar saamne tumhaar apmaan nai kare paai.

¹⁶Aur tumhaar maiya bappa, bhaiya, palwaar, aur dost bhi tumme dhoka deke pakaṛwaai aur tum meñ se ketna log ke marwaay bhi ḍaari.

¹⁷Hamaar naam ke kaaran tumme kaafi log nai laaik kari.

¹⁸Fir bhi tumhaar muuṛ ke ek bhi baar naas nai hoi.

¹⁹Aapan majbuuti se tum bacha rahega.”

²⁰Jab tum dekhega ki Yarushalam ke chaaro bagal saulja hei, tab jaan lena ki iske naas hoy waala ṭaaim aay gay hei.

²¹Agar tum Juḍia meñ rahta hei, to pahaaṛ pe bhaag jaao, aur jon ṭaaun ke bhittar rahe hei, ulog bahire nikar jaao, aur jon log gaaoñ meñ rahe hei, ulog ṭaaun meñ nai aana.

²²I jon saja ke ṭaaim hei yahi sab baat likhaan raha aur ab puura bhi hoi.

²³I ṭaaim maañ bane waali aurat ke khaatir bahut kharaab rahi, aur jon duudh piaay hei uske khaatir bhi kharaab hoi. Kaahe ke des meñ bahut museebat aai aur bahut log ke Parmeshwar ke saja bhi mili.

²⁴Bahut log talwaar se bhi maara jaai aur kaafi log to dusra des bandi banaay ke le jaawa jaai. Yarushalam pe bhi dusra des ke raaj chali, jab tak ki ulog ke ṭaaim puura nai hoy jaai.

²⁵“Suuraj, chaañd aur taara meñ rakam rakam ke saain dekhaay lagi. Aur dunia meñ sab jaati ke log meñ sankaṭ aay lagi. Samundar garji aur baṛa baṛa halkora uṭhi, tab sab log ghabraay jaai.

²⁶Log i dekh ke ḍar jaai ki dunia meñ kaa hoy hei aur behosh hoy jaai. Asmaan ke sab sakti hilaawa jaai.

²⁷Tab Manush ke laṛka dekhaai dei, u baadar meñ se bahut baṛa mahima ke sañghe aai.

²⁸Aur jab i sab hoy lagi, tab ḍarna nai, seedha muuṛ uṭhaay ke khaṛa hoy jaana, kaahe ke tab tumhaar mukti nagichche rahi.

²⁹Tab Yeeshu ek kahaani sunaais, “Tum anjeer ke peṛ aur dusra peṛ ke dekhega,

³⁰jab usman nawa patti nikre lagi, tab tum samajh jaata ki garmi ke mausam aay waala hei.

³¹Aur yahi rakam, jab tum i sab hote dekhega to samajh jaana ki Parmeshwar ke raaj nagichche hei.”

³²“Yaad rakhna, jab tak i sab baat nai hoi, tab tak i peeṛhi ke ant nai hoi.

³³Asmaan aur jameen nai rahi, lekin hamaar vachan hardam rahi.”

³⁴“Saaodhaan rahna, eise nai hoy ki tum khali khaay piye meñ mast raho, aur jindagi ke chinta meñ daba raho, aur achaanak u roj fanda ke rakam tumhaar uppar aay jaai.

³⁵Yahi rakam u roj dunia ke sab log pe bina bataay aay jaai.

³⁶Sab ṭaaim saaodhaan rahna, aur preya karte rahna, ki jisse i sab baat se tum bache sako aur Manush ke laṛka ke saamne khaṛa hoy ke tumme himmat rahi.”

³⁷Din meñ Yeeshu Maseeh Mandir meñ jaay ke parchaar karat raha, lekin raat meñ u jaay ke Jaituun pahaaṛ pe rahat raha.

³⁸Aur sab log sabere uṭh ke uske lage Mandir meñ uske achchha achchha baat sune ke waaste aat rahin.