Read Hindi, Fiji Luuk 22 Bible Online

Luuk 22 - Hindi, Fiji bible

Luuk 22

¹Ab Akhmeeri (bina yeesṭ ke) roṭi ke teohaar, jon ke fasah bhi bole hei, aay waala raha.

²Baṛa paadri aur agua log i taak meñ rahin ki keise Yeeshu ke maara jaay, kaahe ke ulog usse ḍare lagin raha.

³Aur tab saitaan Juḍas Iskariyoti meñ ghus gais, jon baarah chela log meñ se ek raha.

⁴Juḍas jaay ke baṛa paadri aur Mandir ke pulis se baatcheet karis ki keise u Yeeshu ke pakaṛwaay sake hei.

⁵Ulog bahut khusi bhain aur Juḍas ke peisa deke khaatir raaji hoy gain.

⁶Juḍas ulog ke baat maan ke achchha mauka khoje laga ki keise u bina koi ke janwaay uske pakaṛwaai.

⁷Akhmeeri roṭi waala teohaar aay gais, aur isman fasah ke bheṛa ke bachcha ke bali chaṛhaay ke raha.

⁸To Yeeshu, Peeṭa aur Yuhanna se bol ke bhejis, “Jaao aur hamaar khaatir fasah ke teohaar ke khaana ke taiyaari karo ki ham sab usman bhaag lei.”

⁹Lekin ulog puuchhin, “Ham kahañ tumhaar khaatir iske taiyaari kari?”

¹⁰Yeeshu ulog se bolis, “Jeise tum ṭaaun meñ ghusega, tumme ek admi mili jon paani ke ghaṛa liye hoi, uske pichchhe pichchhe tum bhi u ghar meñ chala jaana jisman u jaai.

¹¹U ghar ke maalik se bolna, ‘Hamaar guru puuchhe hei ki u aapan chela log ke sañghe kahañ fasah ke khaana khaai?’

¹²Ghar ke maalik tumme uppar le jaai aur baṛa ruum dekhaai jon kaam meñ laay ke waaste taiyaar hei. Wahiñ taiyaari karo.”

¹³Peeṭa aur Yuhanna chala gain. Ulog wahi sab paain jeise Yeeshu bataais raha, aur ulog huañ pe fasah ke bhojan taiyaar karin.

¹⁴Jab ṭaaim bhais ki Yeeshu aur uske chela log bhojan kare,

¹⁵tab Yeeshu ulog se bolis, “Hamaar etna dil karat raha ki dukh uṭhaay se pahile ham tum log ke sañghe i fasah ke bhojan kari.

¹⁶Ham tum se bataata hei ki ham tum log ke sañghe dusra fasah ke bhojan nai karega jab tak Parmeshwar ke raaj puura nai hoy jaai.”

¹⁷Tab Yeeshu ek pyaala añguur ke ras aapan haath meñ leke, dhanbaad deke bolis, “Iske leo aur aapas meñ baaṭ leo.

¹⁸Ham tumme bataata hei ki jab tak Parmeshwar ke raaj nai aai, ham waain nai piega.”

¹⁹Tab u aapan haath meñ roṭi leke, dhanbaad dees, aur uske tuuṛ ke aapan chela log ke dees. Tab u bolis, “I hamaar deñhi hei jon tumhaar waaste dewa jaay hei, iske khaao aur hamme eisehiyeñ yaad karna!”

²⁰Jab ulog khaay leen, tab Yeeshu ek dusra pyaala aapan haath meñ lees, aur bolis, “I khuun jon tumhaar waaste bahaaya jaay hei, ek nawa vaacha hei.

²¹Lekin, dekho! Jon hamme dhoka dei, u yahiñ hamaar sañghe ṭaibal pe hei!

²²Manush ke laṛka to weisaiyeñ mari jeise uske khaatir Parmeshwar maañgat raha, lekin jon uske dhoka se pakaṛwaai, uske khaatir bahut kharaab hei!”

²³Tab ulog aapas meñ puuchhe lagin ki kon i kaam kari.

²⁴Chela log jhagṛa kare lagin ki ulog meñ se kon sab se baṛa hei.

²⁵Tab Yeeshu ulog ke bataais, Aur raaja log aapan log pe hukum chalaawe hei, aur shaktishaali neta apne aap ke sab ke dost bataay hei.

²⁶Lekin tum eise nai rahna. U jon tum meñ sab se baṛa hei, u sab se chhoṭa bani, aur jon neta hei, u naukar ke rakam rahi.

²⁷Baṛa kon hei? Jon khaana khaay hei ki jon khaana baaṭe hei? Kaa wahi jon khaana khaay hei? Lekin ham to tumhaar beech meñ khaana baaṭewaala hei.

²⁸Tum sab hamaar sañghe sab museebat meñ raha.

²⁹Aur jeise hamaar Pita hamme raaj dees hei, weisaiyeñ ham bhi tumme wahi hak deta hei.

³⁰Tum hamaar raaj meñ hamaar sañghe beiṭh ke khaayga aur piega, aur raaj gaddi pe beiṭh ke Israayel ke baarah ṭraaib pe nyaay karega.

³¹Yeeshu bolis, “Saayman, hamaar baat suno! Saitaan i hak maañg lees hei ki tumhaar ṭesṭ le, tum sab ke geñhu ke rakam faṭak ke, aur achchha ke kharaab se alag kar dei.”

³²Lekin Saayman, ham tumhaar khaatir preya kara hei ki tumhaar biswaas bana rahe. Aur jab tum hamaar lage lauṭ ke aayga, tab aapan bhaiya log ke madat karega.”

³³Peeṭa bolis, “E Prabhu, ham to tumhaar sañghe jel meñ jaay ke aur mare ke waaste bhi taiyaar hei!”

³⁴Yeeshu jawaab dees, “Peeṭa ham tumme bataata hei ki murga ke bole se pahile teen dafe tum bolega ki tum hamme nai janta hei.”

³⁵Tab Yeeshu aapan chela log se puuchhis, “Jab ham tumme bina pes, bina beg aur bina juuta ke bheja raha, tab kaa tumme koi cheej kamti bhais raha?” Ulog bolin, “Nai to, koi cheej kamti nai bhais!”

³⁶Tab Yeeshu ulog se bolis, “Lekin ab jiske paas pes hei, u uske leke jaay, wahi rakam beg bhi leke jaay, aur jiske paas talwaar nai hei, u aapan kapṛa bech ke talwaar khareed le.

³⁷Kaahe ke Baaibal meñ likhaan hei, ‘U apraadhi ke sañghe gina jaai.’ Yahi hamaar baare meñ likhaan raha, aur bahut jaldi puura bhi hoi.”

³⁸Chela log bolin, “Prabhu hiañ dui talwaar hei!” “Etna bas hei!” Yeeshu bolis.

³⁹Jeise u hardam karat raha, Yeeshu Jaituun pahaaṛ pe gais, aur uske chela log bhi uske sañghe gain.

⁴⁰Aur jab ulog huañ pahuñchin tab u aapan chela log se bolis, “Preya karo ki tumhaar ṭesṭ nai lewa jaay.”

⁴¹Tab Yeeshu thoṛa aage jaay ke ghuṭna ṭek ke preya karis,

⁴²“E Pita, agar tum maañgo, to i dukh ke pyaala hamme piye nai dega. Fir bhi hamaar ichchha nai, lekin tumhaar ichchha puura hoi”

⁴³Tab ek ainjal uske madat ke khaatir aais.

⁴⁴Yeeshu gahira peeṛa meñ raha aur dukhi hoy ke dil se preya karis, ki uske paseena khuun ban ke jameen pe gir paṛis.

⁴⁵Preya kar ke Yeeshu uṭhis, aur aapan chela log ke lage gais. Ulog dukh ke kaaran thak ke soy gay rahin.

⁴⁶Yeeshu ulog se bolis, “Tum log kaahe ke sota hei? Uṭho aur preya karo ki tum log ke ṭesṭ nai lewa jaai.”

⁴⁷Jab Yeeshu baat karat raha, tab ek baṛa bheeṛ aay gais. Usman sab se aage Juḍas raha, jon baarah chela meñ se ek raha. U seedha aay ke Yeeshu ke chumma lees.

⁴⁸Yeeshu, Juḍas se puuchhis, “Kaa tum Manush ke laṛka ke chumma leke, dhoka se pakaṛwaay mañgta hei?”

⁴⁹Jab Yeeshu ke chela log dekhis ki kaa hoy waala hei, tab ulog Yeeshu se puuchhis, “He Prabhu, bolo to ham talwaar chalaai?”

⁵⁰Etna bhi nai, usman se ek to baṛa paadri ke naukar pe talwaar chalaay dees aur uske lefṭ kaan kaaṭ dees.

⁵¹“Bas karo!” Yeeshu bolis. Tab u naukar ke kaan chhuis aur uske achchha kar dees.

⁵²Tab Yeeshu baṛa paadri aur Mandir ke pulis aur agua log, jon uske pakṛe aain raha usse bolis, “Kaa tum log ḍanḍa aur talwaar leke koi chor ke pakṛe aaya hei?

⁵³Ham to tumhaar sañghe raat din Mandir meñ raha, aur tum hamme tab nai pakṛa. Lekin i ṭaaim tumhaar hei aur añdhera ke taagat bhi hei.”

⁵⁴Yeeshu pakṛaay gais aur ulog uske baṛa paadri ke ghare le gain, aur Peeṭa duur se ulog ke peechha karat raha.

⁵⁵Kuchh log añgna meñ aagi baar ke uske bagal meñ beiṭhe rahin, aur Peeṭa bhi wahi log ke lage jaay ke beiṭh gais.

⁵⁶Tab ek naukraani uske dekhis, aur dhyaan se uske bagal dekh ke bolis, “I bhi to Yeeshu ke sañghe raha!”

⁵⁷Peeṭa bolis, “E aurat, ham i admi ke nai janta!”

⁵⁸Kuchh deri ke baad koi aur uske bagal dekhis aur bolis, “Tum bhi to ulog meñ se ek hei!” “Nai, bilkul nai!” Peeṭa jawaab dees.

⁵⁹Aur ek ghañṭa ke baad ek dusra admi jor deke bolis, “Ham daawa se bolta hei ki i admi ulog ke sañghe raha, kaahe ki i bhi to Galilee hei!”

⁶⁰Lekin Peeṭa bolis, “E bhaai, ham nai janta ki tum kaa bakta hei!” Aur jab, Peeṭa bolte raha, tab murga bolis.

⁶¹Aur tab Prabhu Yeeshu ghuum ke Peeṭa ke bagal dekhis. Aur Peeṭa ke yaad aais ki Prabhu usse kon cheej bolis raha, “Bihaan sabere murga bole se pahile tum teen dafe bolega ki tum hamme nai janta hei.”

⁶²Aur Peeṭa bahire jaay ke fuuṭ fuuṭ ke roy lagis.

⁶³Jon log Yeeshu ke pakṛin raha, uske bahut beijjati karin aur khuub maarin aur peeṭin.

⁶⁴Ulog Yeeshu ke aañkhi pe paṭṭi baañdh ke bolin, “Bataao, tumme kon maaris?”

⁶⁵Ulog uske khilli uṛaat rahin aur jhuuṭ jhuuṭ baat bolat rahin.

⁶⁶Sabere sabere, des ke neta log, baṛa paadri log, aur paṛha likha Maozas ke kaanuun jaane waala baṛkuan, ek sañghe milin aur Yeeshu ke ulog ke aage laawa gais.

⁶⁷Ulog bolin, “Hamme bataao! Kaa tum Maseeh hei?” Yeeshu jawaab dees, “Agar ham tumme bataayga to tum sab biswaas nai karega.

⁶⁸Aur agar ham ek sawaal karega, to tum sab jawaab nai dega.

⁶⁹Lekin abhi se, Manush ke laṛka, Mahaan Parmeshwar ke raaiṭ saaiḍ beiṭhi.”

⁷⁰Tab sab koi puuchhin, “Kaa tum Parmeshwar ke laṛka hei?” Yeeshu bolis, “Tumahi to bolta hei ki ham hei!”

⁷¹Ulog bolin, “Ab hamme gawaahi ke kaa jaruurat hei! I to aapan muh se khud ugal dees hei aur ham sab sun lia hei.”