Read Hindi, Fiji Luuk 23 Bible Online

Luuk 23 - Hindi, Fiji bible

Luuk 23

¹Sabha se sab koi uṭh ke, Yeeshu ke Paaylaṭ ke saamne le gay.

²Huañ ulog Yeeshu pe dos lagaay lagin, “Ham log i admi ke aur log ke bahkaate aur ham log ke raaja ke ṭeks de se rokte pakṛa hei. Aur i bole hei ki yahi hamaar raaja Maseeha hei.”

³Paaylaṭ Yeeshu se puuchhis, “Kaa tum Yahuudi ke raaja hei?” “I to tum khud bolta hei,” Yeeshu jawaab dees.

⁴Tab Paaylaṭ, baṛa paadri aur bheeṛ se bolis, “Ham i admi meñ kuchh dos nai paaya.”

⁵Lekin ulog jor deke bolin, “I Galeel se leke sab Juḍia meñ parchaar kar ke sab ke bahkaay hei, aur etna hee nai, hiañ bhi i aay gais hei.”

⁶Jab Paaylaṭ i sunis tab puuchhis, “Kaa i admi Galeel ke hei?”

⁷Jab Paaylaṭ jaanis ki Yeeshu, Heraḍ ke raaj se aais hei, tab u Yeeshu ke Heraḍ ke paas bhej dees. Heraḍ u ṭaaim Yarushalam meñ raha.

⁸Jab Heraḍ, Yeeshu ke dekhis to bahut khusi hoy gais, kaahe ki u bahut roj se Yeeshu ke dekhe maañgat raha. Heraḍ, Yeeshu ke baare meñ bahut kuchh sunis raha, aur aasra karat raha ki u uske chamatkaar karte dekhi.

⁹Heraḍ, Yeeshu se bahut sawaal karis, lekin Yeeshu ek bhi jawaab nai dees.

¹⁰Baṛa paadri aur Maozas ke kaanuun ke guru log bhi huañ khaṛa hoy ke Yeeshu ke agaiñsṭ kharaab kharaab cheej ke dos lagaay lagin.

¹¹Heraḍ aur uske saulja log Yeeshu pe hase lagin aur uske sañghe kharaab saluuk kare ke baad uske chamke waala kapṛa pahinaay ke Heraḍ ke paas lauṭaay deen.

¹²Wahi roj se Heraḍ aur Paaylaṭ dost ban gain, isse pahile u duuno dusman rahin.

¹³Paaylaṭ tab baṛa paadri, aur agua log aur baaki log ke bolaais.

¹⁴U sab se bolis, “Tum Yeeshu ke hamaar paas laaya hei ki u samasya peida kare hei. Lekin ham tum sab ke saamne usse sawaal kara, aur ham to usman koi dos nai paaya, jon tum sab bolta hei ki i karis hei.

¹⁵Heraḍ bhi isman galti nai paais hei yahi khaatir iske hamaar lage lauṭaay dees hei. I admi ke maut ke saja nai mile ke chaahi!

¹⁶Yahi khaatir ham iske khali chaabuk lagwaay ke chhoṛ dega.” Paaylaṭ i kaaran eise bolis raha ki fasah ke teohaar meñ uske ek keidi ke chhoṛe ke raha.

¹⁷

¹⁸Lekin bheeṛ chillaay uṭhis, “Yeeshu ke maar deo! Hamme Barabba ke deo!”

¹⁹Barabba wahi admi raha jon ṭaaun meñ hañgaama karaais raha aur hatya ke jurum meñ jel meñ rakkha gais raha.

²⁰Paaylaṭ to maañgat raha ki u Yeeshu ke chhoṛ de, yahi kaaran u bheeṛ se ek dafe fir se baat karis.

²¹Lekin ulog chillaate rahin, “Uske kros pe chaṛhaao! Kros pe chaṛhaao!”

²²Paaylaṭ fir tisra dafe ulog se bolis, “I admi kaa galti karis hei? Ham to isman koi kharaabi nai dekha ki jisse iske maut ke saja mile. Ham iske chaabuk lagwaay ke chhoṛ dega.”

²³Sab log jor jor se chillaate rahin aur uske pichchhe paṛ gain ki Yeeshu ke kros pe chaṛhaawa jaay.

²⁴Aakhri meñ, Paaylaṭ u sab ke baat maan lees.

²⁵Tab u Barabba ke, jon hatya aur hañgaama karaat raha, ulog ke maañg pe, chhoṛ dees. Aur fir Paaylaṭ, Yeeshu ke ulog ke hawaale kar dees, ki jisse ulog jon cheej maañge uske sañghe kare.

²⁶Jeise saulja log Yeeshu ke le jaat rahin, ulog gaaoñ se ṭaaun ke taraf aate Saayman naam ke ek Kureni ke pakṛin aur kros ke uske kañdha pe rakkhin, ki jisse u Yeeshu ke pichchhe pichchhe le chale.

²⁷Yeeshu ke pichchhe ek bahut baṛa bheeṛ aat raha, aur bheeṛ meñ aurat log bhi rahin jon Yeeshu ke waaste rowat aur chillaat rahin.

²⁸Yeeshu aurat log ke taraf ghuum ke bolis, “Yarushalam ke sab beṭi. Hamaar khaatir nai ro! Aapan aur aapan laṛkan ke waaste ro.

²⁹Ek roj log boli, ‘U aurat jis ke paas aulaad nai hei ulog khush kismat hei!’

³⁰U ṭaaim sab log pahaaṛ se boli, ‘Hamaar uppar giro!’ aur chhoṭa chhoṭa pahaaṛ se boli, ‘hamme lukaay leo!’

³¹Kaahe ki agar i hariyar peṛ ke sañghe hoy sake hei to suukha peṛ ke sañghe kaa hoi?”

³²Dui aur admi jon apraadhi rahin, ulog ke bhi Yeeshu ke sañghe maut ke saja hoy gais.

³³Jab saulja log u jagha pe pahuñchin, jiske naam “Khopṛi” raha, tab huañ pe Yeeshu ke sañghe dui aur apraadhi ke kros pe chaṛhaain, ek ke Yeeshu ke i bagal aur dusra ke uske u bagal.

³⁴Yeeshu bolis, “E Pita, ilog ke maaf karo, kaahe ke ilog nai jaane hei ki ilog kaa kare hei.” Saulja log daaoñ lagaay ke Yeeshu ke kapṛa ke apne meñ baaṭ leen.

³⁵Sab log huañ khaṛa khaṛa sab dekhat rahin, hiañ tak ki agua log bhi Yeeshu ke taana maarat rahin, “I to ketna log ke bachaais. Agar i Parmeshwar ke chuna Maseeh hei, to kaahe nai apne aap ke bachaay!”

³⁶Kuchh saulja Yeeshu ke khilli uṛaay ke uske khaatir sasta waain leke aain.

³⁷Aur ulog bolin, “Agar tum Yahuudi ke raaja hei to apne aap ke bachaay leo!”

³⁸Uske uppar ek saain lagaay deen raha, jisman likha raha, “I Yahuudi ke raaja hei.”

³⁹Jon dui Yeeshu ke sañghe laṭkaan rahin, usman se ek apraadhi i bol ke uske ninda karis, “Kaa tum Maseeh nai hei? Agar hei to apne aap ke aur hamme bhi bachaao!”

⁴⁰Lekin dusra apraadhi uske ḍaaṭis aur bolis, “Kaa tum Parmeshwar se bhi nai ḍarta hei? Tumme bhi to wahi saja mila jon iske mila hei?

⁴¹Hamme to wahi saja mila jon hamme mile ke chaahi, lekin i to koi kharaab kaam nai karis hei.”

⁴²Tab u Yeeshu se bolis, “E Yeeshu, jab tum aapan raaj meñ aana, tab hamme yaad karna!”

⁴³Tab Yeeshu bolis, “Ham tum se promis karta hei ki aaj tum hamaar sañghe swarag lok meñ rahega.”

⁴⁴Baarah baje ke ṭaaim, suuraj chhip gais aur asmaan kariya hoy gay, aur teen baje tak puura des meñ añdhiyaar chhaais raha, Mandir ke parda bhi beech meñ se faṭ gais.

⁴⁵

⁴⁶Yeeshu jor se chillaay ke bolis, “Pita ji, ham aapan jaan tumhaar haath meñ deta hei!” Yahi bol ke Yeeshu mar gais.

⁴⁷Jab Romi saulja i dekhis to Parmeshwar ke baṛaai kare laga aur bolis, “Sachche ke i admi ke koi dos nai raha!”

⁴⁸Ek baṛa bheeṛ i bhayaanak seen dekhe ke waaste huañ rahin. Ulog jab i sab dekhin, tab ulog ke dil ṭuuṭ gais aur ulog ghare chale gain.

⁴⁹Jon sab Yeeshu ke kareeb dost aur aurat log jon Galeel se uske sañghe aain rahin, ulog kuchh duur pe khaṛa hoy ke i sab dekhat rahin.

⁵⁰Huañ pe ek admi raha jiske naam Josaf raha, u Armathia ke rahe waala raha aur huañ ke maha sabha ke memba bhi raha. Josaf ek achchha aur dharam pe chale waala admi raha. Lekin u sabha ke kaam se raaji nai raha aur u Prabhu ke raaj ke khoj meñ hardam laga rahat raha.

⁵¹

⁵²Josaf jaay ke Paaylaṭ se Yeeshu ke boḍi maañgis.

⁵³U boḍi ke kros se nichche utaaris, aur malmal ke kapṛa meñ uske lapeṭ ke kabar meñ rakkhis, jon chaṭṭaan kaaṭ ke banaawa gais raha, aur jisman koi aur boḍi abhi tak nai rakkha gais raha.

⁵⁴Suk ke roj raha, aur sabat suru hoy waala raha.

⁵⁵U aurat log jon Galeel se Yeeshu ke sañghe aain raha, pichchhe pichchhe jaay ke kabar ke dekhin aur i bhi dekhin ki laash keise rakkha gais hei.

⁵⁶Tab ulog jaay ke achchha mahke waala masaala aur senṭ taiyaar karin aur, sabat ke roj ulog araam karin kahe ke yahi Maozas ke kaanuun raha.